Yusum Gud Baebol
1. ?Yu yu save mekem wanem taem yu stap rerem wok blong prij?
1 I gud yumi jusum wan vas blong Baebol blong yusum long enikaen magasin no buk we yumi plan blong seremaot long olgeta we oli lesin. (Hib. 4:12) Sipos yumi jusum wan vas we i stap insaed long magasin no buk we yumi seremaot, samting ya i save mekem i isi long yumi blong soemaot magasin no buk ya. Long sam ples, ol pablisa oli faenem se i moa stret blong holem Baebol long han blong olgeta taem oli kam long man no taem oli prij long ol haos wanwan.
2. (a) ?Olsem wanem yumi save statem storian blong yumi wetem wan vas blong Baebol? (b) ?Wanem vas nao bambae i pulum intres blong ol man long teritori?
2 Statem Storian Wetem Wan Vas Blong Baebol: Sam pablisa oli askem tingting blong man long saed blong vas blong Baebol we bambae oli ridim long hem. Long rod ya, oli pulum tingting blong man i go stret long Tok blong God. Maet sam long ol fastok ya bambae i stret long teritori blong yu.
◼ “?Sipos yu gat paoa, bambae yu yu mekem ol jenis ya oli kamtru long wol?” Ridim Revelesen 21:4.
◼ “?From wanem yumi laef long wan taem we i gat fulap trabol?” Ridim 2 Timoti 3:1-5.
◼ “?Yu yu ting se komuniti blong yumi i save kam wan gudfala ples sipos evri man oli folem advaes ya?” Ridim Matiu 7:12.
◼ “?Yu yu ting se bambae ol pikinini blong yu oli save laef long wan taem olsem?” Ridim Ol Sam 37:10, 11.
◼ “?Yu yu ting se i gat wan taem i stap kam we ol tok ya bambae oli kamtru?” Ridim Aesea 33:24.
◼ “?Yu yu harem finis nius blong gavman ya we bambae i tekem ples blong ol narafala gavman olsem we vas ya i tokbaot?” Ridim Daniel 2:44.
◼ “?Yu yu stap tingbaot samtaem blong askem kwestin ya long God?” Ridim Job 21:7.
◼ “?Yu yu ting se samtaem bambae yumi save luk bakegen ol fren mo famle blong yumi we oli ded finis?” Ridim Jon 5:28, 29.
◼ “?Ol ded man oli save wanem samting we yumi, we yumi laef yet, yumi stap mekem?” Ridim Prija 9:5.
3. ?Olsem wanem yumi save halpem ol man blong oli kasem save long vas we yumi ridim?
3 Eksplenem, Yusum Pijatok, Mekem i Wok: Taem wan man i rere blong lesin, yumi no mas toktok kwik blong flatem storian blong yumi. Yumi mas tekem taem blong eksplenem, yusum pijatok mo mekem hem i tingting long vas ya we yumi ridim, blong hem i save kasem save long hem. (Neh. 8:8) Taem ol man oli kasem save mo oli akseptem tijing blong God, samting ya i save mekem ol gudgudfala jenis long laef blong olgeta.—1 Tes. 2:13.
4. ?Olsem wanem yumi save yusum gud Baebol long ol visit blong yumi?
4 Gohed blong yusum gud Baebol taem yu pulum man blong i intres moa. Yu save mekem sem samting taem yu mekem ol visit bakegen: (1) Jusum wan vas we i laenap wetem storian blong yu. (2) Bifo we yu ridim vas ya, askem wan isi kwestin we i laenap stret wetem poen long vas we bambae yu ridim. Ale ridim vas ya. (3) Eksplenem, yusum pijatok mo soem long man olsem wanem hem i save mekem samting ya i wok long laef blong hem. Traehad blong givim save long Tok blong God evri taem we yu visitim man ya. Maet i no longtaem bambae yu save statem wan Baebol stadi wetem hem.