Program Blong Nekiswan Spesel Dei Asembli
Long niufala sevis yia, stamba tok blong spesel dei asembli i stanap strong long Baebol: “Stap Daon, Aninit Long Han Blong God—Blokem Setan.” (Jem. 4:7) !Hemia gudfala advaes blong yumi we laef blong yumi i fulap long trabol! Sipos yumi obei long God, hemia, yumi agensem Setan stret. Asembli ya bambae i tijim yumi olsem wanem blong stanap strong agens long ol rabis trik we Setan i stap yusum blong traem spolem bilif blong yumi. ?Wanem sam sas samting we bambae yumi kasem long asembli?
Bambae seket elda i tokbaot, “Ol Memba Blong Famle Oli Mas Stap Daon Aninit Long Han Blong God.” Bambae hem i soemaot olsem wanem fasin ya i save givim paoa long ol famle blong oli no letem ol traem blong wol oli winim olgeta. Brata we i kam long ofis blong Sosaeti bambae i givim faswan tok blong hem, we stamba blong hem se, “?I Minim Wanem Blong Blokem Setan?” Bambae hem i eksplenem from wanem, mo olsem wanem, yumi mas tekem strong aksin blong blokem ol samting we Setan i mekem blong traem spolem yumi long saed blong spirit. I gat tu haf blong tok ya we oli stret long ol yangfala, from we olgeta tu oli mas stap wekapgud long ol trik blong Setan. Plante Kristin man mo woman oli no bin joen long ol samting blong wol taem oli yangfala. Bambae yumi glad blong lesin long ol stori we oli talemaot long saed blong sam samting we oli bin hapen long laef blong olgeta.
Fasin blong putum yu yu stap daon aninit long han blong narafala, i wan samting we olgeta man long wol oli mas mekem. Taswe, laswan tok blong brata we i kam long ofis blong Sosaeti, bambae i tokbaot fo haf blong laef blong yumi we yumi mas stap daon aninit long han blong narafala, olsem we God i wantem: (1) long saed blong ol gavman, (2) long kongregesen, (3) long wok, mo (4) long famle. !Hemia ol nambawan advaes ya!
Olgeta we oli wantem tekem baptaes long spesel dei asembli ya oli mas talemaot long presiden elda kwiktaem. Yumi evriwan i mas makem stret dei blong asembli long kalenda blong yumi, mo mekem plan blong go long fulwan asembli. Sipos yumi putum yumi i stap daon aninit long han blong Jeova oltaem, bambae yumi kasem ol blesing we oli no save finis.