Wan Spesel Taem Blong Leftemap Tingting
1 Evri dei, plante samting oli traem bilif blong ol man blong Jeova. Setan i save se hem i gat smol taem nomo i stap. Taswe, hem i stap traehad laswan blong spolem bilif we yumi gat long Jeova. (Rev. 12:12) From samting ya, i impoten tumas we yumi ‘joen long Masta blong yumi, blong kasem paoa. Hem i gat olgeta paoa, mo yumi mas kam strong long paoa blong hem.’ Olsem nao, ‘taem dei blong faet long Setan i kam, be bambae yumi save stanap strong. Long fasin ya, bambae yumi save faet long ol enemi gogo kasem en blong hem, nao biaen, bambae yumi save stanap strong yet.’—Efes. 6:10, 13.
2 Wan rod we Jeova i mekem blong yumi kasem paoa, hemia fasin blong joen wanples wetem ol Kristin brata. Aposol Pol i luksave se samting ya i impoten. Hem i wantem tumas blong kampani wetem ol Kristin brata blong hem. Long rod ya, ‘bilif blong olgeta i save givhan long hem, olsem we bilif blong hem tu i save givhan long olgeta,’ nao olgeta evriwan oli save stap “strong.” (Rom 1:11, 12) Blong givim paoa long yumi blong mekem wok blong God, Hed Kampani i mekem plan blong yumi save leftemap tingting blong narafala, mo narafala i save leftemap tingting blong yumi long Distrik Asembli long yia ya. Nem blong asembli ya, “Ol Man Blong Talemaot Kingdom We Oli Wok Strong.” Long eria we branj ofis blong Niukaledoni i lukaot long hem, bambae i gat wan asembli long Port Vila, Vanuatu (Ogis 23-25), tu asembli long Nouméa (Septemba 6-8 mo 13-15) mo wan Asembli blong tu dei long Walis long Oktoba 5-6, 2002.
3 Stap Long Asembli Ya: Meksua se yu stap long olgeta dei blong asembli ya. Yumi ‘givhan long yumi’ taem yumi kam bifo we faswan singsing i stat, mo yumi stap gogo yumi talem “Amen” wetem fulhat blong yumi long en blong laswan prea. (Aes. 48:17, 18) Longtaem lelebet bifo long asembli, plante long yumi i mas tingbaot blong jenisim program blong wok blong yumi. Olsem nao, yumi meksua se yumi gat naf spel blong stap long ol tri dei blong asembli ya. I tru, maet i no isi blong pulum masta blong yu blong givim spel long yu blong go long asembli. Be Jeova i promes se bambae hem i givhan long yu blong mekem samting we hem i wantem. (1 Jon 5:14, 15) Mo tu, yu mas mekem rod long sip no plen blong go long asembli, mo faenem wan ples we yu save slip long hem long ples blong asembli. Sipos yu no mekem ol samting ya yet, yu mas hareap. I nogud blong jes hop se ol samting ya bambae oli kamaot gud. Yumi save sua se Jeova bambae i blesem traehad blong yumi blong stap long ol tri dei blong asembli ya.—Prov. 10:22.
4 Tingrere Long Ol Tok We Bambae i Leftemap Tingting: Long en blong wan distrik asembli, ating yu bin talem finis, se: “!Hemia i beswan asembli we mi bin go long hem!” ?From wanem yu yu harem olsemia? From we, yumi ol sinman, sloslo yumi save kam taed mo lusum paoa blong yumi. Long taem ya, yumi harem se yumi nidim tok blong leftemap yumi long saed blong spirit. (Aes. 40:30) Wan sista i talem se: “Rabis wol ya i stap mekem mi mi taed, be ol asembli oli givhan long mi blong gat stret tingting bakegen long saed blong spirit. Oli givim paoa we mi nidim. I luk olsem se oli kam long stret taem blong leftemap tingting blong mi.” Ating yu tu yu bin gat filing olsem.
5 I no ol tok mo laef stori nomo long asembli we oli leftemap tingting blong yumi. Be i gat sam narafala gudfala samting tu. Wan brata i talem se: “Mi mi laekem tumas ol tok we oli soemaot klia olsem wanem blong folem ol rul blong Baebol long laef blong yumi. Yes, ol drama tu oli impoten blong soemaot long yumi ol gudfala eksampol mo ol nogud eksampol blong bifo. Mi glad tu blong luk ol niufala buk, mo mi stap harem gud long olgeta longtaem afta we mi kambak long ples blong mi.”
6 Ol asembli oli ol impoten samting we Jeova i stap givim long yumi ‘long taem ya klosap long Lasdei, we laef long wol ya i kam strong tumas.’ (2 Tim. 3:1) Oli givhan long yumi blong folem advaes ya we i kamaot long God se: “Yufala i mas lukaot gud, yufala i no slip, mo yufala i mas stanap strong long bilif blong yufala. Yufala i no mas fraet, oltaem tingting blong yufala i mas strong.” (1 Kor. 16:13) !Taswe, yumi mas gat strong tingting blong stap long evri haf blong asembli ya mo harem gud long Distrik Asembli ya “Ol Man Blong Talemaot Kingdom We Oli Wok Strong”! !Bambae hem i givim ol gudfala samting blong leftemap tingting blong yumi!
[Tok blong pija long pej 3]
Mekem Plan Blong Stap Long Ol Tri Dei
■ Askem masta blong yu blong givim spel.
■ Faenem wan ples blong slip long taon we asembli i stap long hem.
■ Mekem rod long sip no plen blong go long asembli mo kambak.