Ansa Long Wan Kwestin

◼ ?Yumi mas tingbaot wanem samting taem yumi yusum mobael fon, mo ol smosmol mesin we oli givim signal se i gat man i wantem toktok i kam long yumi (pager)?

Ol samting ya i mekem we yumi save toktok wetem narafala man, nomata weples yumi stap long hem. Hemia i gud, be yumi mas lukaot se yumi no stap yusum ol samting ya long taem we oli save pulum tingting blong yumi i gowe long ol Kristin miting no long wok blong prij. ?Olsem wanem samting ya i save hapen?

Tingbaot sipos mobael fon i singaot taem yumi stap toktok long wan man long wok blong prij. ?Man ya bambae i tingting olsem wanem? ?Sipos yumi stopem storian blong yumi blong ansa long mobael fon, man blong haos i save ting se yumi wanem kaen man? Yumi no wantem mekem eni samting we bambae i blokem narafala blong lesin long gud nius blong Kingdom. (2 Kor. 6:3) Taswe, sipos yumi stap karem wan mobael fon no smosmol mesin ya pager wetem yumi, yumi mas mekem se hem i no singaot yumi long taem we i save spolem yumi no ol narafala long wok blong prij.

?Olsem wanem sipos yumi stap wet nomo taem narafala i stap givim witnes? ?I oraet blong yusum ol samting ya? Traem tingbaot: ?Sipos yumi makemaot wan spesel taem blong joen long wok blong prij, yu no ting se i stret we yumi putum tingting blong yumi i stap long wok ya nomo? Blong soem se yumi ona long tabu wok ya, plis, yumi mas traem lukaot long ol prapa bisnes blong yumi long wan narafala taem. (Rom 12:7) Be, hemia i no min se i rong blong yusum mobael fon blong givim witnes long narafala no blong mekem plan wetem narafala blong go visitim hem.

I waes tu blong lukaot blong no yusum mobael fon taem yumi stap draevem trak. Ol man we oli stadi long bisnes ya, oli faenemaot se man we i mekem olsem, i stap long denja blong gat wan akseden. Yumi mas obei gud long ol loa we oli blokem man blong yusum mobael fon taem hem i draevem trak.

Yumi kam long ol Kristin miting mo asembli blong mekem wosip long Jeova mo blong letem hem i tijim yumi. ?Taswe, yu no ting se fasin tangkiu from ol tabu miting ya i mas pusum yumi blong ofem ol mobael fon, blong oli no blokem yumi mo ol narafala blong lesin? Sipos i gat wan impoten samting we yumi mas lukluk long hem kwiktaem, yumi mas mekem olsem afsaed long ples blong miting. No yumi save lukaot long ol narafala samting ya mo ol prapa bisnes blong yumi long taem we yumi no stap mekem wosip.—1 Kor. 10:24.

I gud we fasin blong yumi blong yusum ol mobael fon, i soemaot oltaem se yumi tingbaot ol narafala mo se yumi tinghae long ol samting long saed blong spirit.