Ansa Long Wan Kwestin
◼ Long ol miting mo long wok blong prij, ?wanem sam rul blong Baebol we i gud blong tingbaot sipos yumi yusum mobaelfon?
‘I Gat Taem Blong Man i Stap Kwaet, Mo i Gat Taem Blong Man i Tok.’ (Pri. 3:7): Mobaelfon i givim janis long ol man blong oli save toktok tugeta mo sanem mesej long eni taem. Be i nogud yumi letem mobaelfon i pulum tingting blong yumi i gowe long ol impoten wok we yumi ol Kristin yumi stap mekem. Traem tingbaot ol miting blong yumi. Yumi kam long ol miting blong wosipim Jehova mo blong kasem tijing blong hem. Mo tu, yumi kam joen wetem ol brata mo sista blong bambae bilif blong olgeta i givhan long yumi. (Dut. 31:12; Sam 22:22; Rom 1:11, 12) Taswe, taem yumi stap long miting, i gud yumi ofem mobaelfon. Yumi save jekem ol mesej blong yumi nomo taem yumi stap gobak long haos. Sipos yu no save ofem mobaelfon blong yu from we yu stap wet long wan impoten kol, i gud yu mekem se i no ring strong. Sipos i ring strong, bambae i spolem ol narafala long miting.
“Mi Mekem Ol Samting Ya From Gud Nius.” (1 Kor. 9:23): Samtaem, mobaelfon i givhan long yumi long wok blong prij. Traem tingbaot taem ol brata mo sista oli stap prij long wan teritori, maet brata we i lidim olgeta i yusum mobaelfon blong save ples we oli stap long hem. Taem ol pablisa oli gat sam visit no Baebol stadi, samtaem oli yusum mobaelfon blong jekem sipos visit no stadi i stap, olsem nao oli no wokbaot longwe blong nating. Be i gud yumi tingbaot blong ofem fon blong yumi, taem yumi stap storian wetem ol man long wan haos. (2 Kor. 6:3) Mo tu, taem yumi stap wet long ol narafala pablisa long teritori, i nogud yumi ring no sanem mesej long ol fren blong yumi. Olsem nao, tingting blong yumi bambae i stap strong long wok blong prij mo long ol pablisa we yumi stap wetem olgeta.
Yumi Mas Lukaot Rod Blong Givhan Long Ol Narafala Man. (1 Kor. 10:24; Fil. 2:4): Yumi no mas ting se, i oraet nomo blong kam let long miting blong prij from we yumi save ring long ol brata blong faenemaot weples oli stap. Taem man i kam let, ol brata oli mas jenisim ol plan we oli mekem finis. I tru se samtaem i gat sam samting i hapen we yumi no save bos long hem, ale yumi kam let. Be sipos yumi lan blong kam long stret taem oltaem, bambae yumi soemaot se yumi tingbaot plan we Jehova i mekem, yumi tingbaot brata we i lidim miting blong prij, mo ol narafala pablisa.