?Yumi Tokbaot Wanem Long Ol Magasin?

Wajtaoa Maj 15

“Mifala i wantem invaetem yu yu kam long miting blong Lodsapa long Sande, Eprel 4. [Yusum laswan pej blong magasin no pepa blong Memoriol blong eksplenem smol long saed blong miting ya. Ale ridim Luk 22⁠:19.] Fas haf blong Wajtaoa ya i tokbaot mining blong lafet ya mo i talem olsem wanem yumi mas mekem lafet ya.”

Wekap! Maj 22 (Inglis/Franis)

Tokbaot wan trabol we i kamaot long nius, we ol manples oli save long hem, nao askem se: “?Samtaem yu bin tingbaot se from wanem God i letem olkaen trabol olsem oli hapen? [Letem man i ansa. Nao ridim Jemes 1⁠:13.] Stori ya, we oli raetem i go fastaem long ol yangfala, i eksplenem from wanem God we i gat lav i no mekem wan samting yet blong finisim ol trabol we oli mekem man i safa.”

Wajtaoa Epr. 1

“I gat plante vas blong Baebol we oli pulum intres blong man, be ating i gat wan vas we i pulum tingting blong plante man moa. Hemia vas we i tokbaot mak blong wael anamol. ?Yu yu harem tok long saed ya finis? [Letem man i talem tingting blong hem. Ale ridim Revelesen 13⁠:​16-18.] Baebol nomo i givim ansa long tokhaed ya. Magasin ya i soemaot wanem we Baebol i talem long saed ya.”

Wekap! Jen./Maj (Bislama)

“Tede ol man oli stap yusum plante kaen doti tok swea. I gat sam man we oli no save toktok gud, oli mas talem wan swea oltaem. ?Be wanem tingting blong God long saed ya? [Letem man i ansa. Ale ridim Efesas 4⁠:29.] Stori we i stap long pej 22 long Wekap! ya i tokbaot olsem wanem yumi save lukaot long olkaen tok olsem.”