Miusik We i Mekem Yumi Haremgud
1 Singsing mo miusik i wan impoten haf blong trufala wosip. Long Isrel bifo, Asaf mo ol brata blong hem oli singsing se: “!Yumi talem tangkiu long Hae God! . . . Yumi sing, yumi presem hem. Yumi talemaot ol bigbigfala samting ya we hem i bin mekem.” (1 Kron. 16:8, 9) Tede, yumi leftemap voes blong yumi blong singsing presem Jeova long ol miting blong kongregesen evri wik. (Efes. 5:19) !Yes, hemia nambawan janis blong presem Jeova!—Sam 69:30.
2 Narafala samting we i save pulum yumi blong tingbaot ol samting long saed blong spirit, hemia ol kaset blong Kingdom Melodies, ol singsing blong Kingdom we i no gat toktok blong olgeta, i gat miusik nomo. Wan sista i talem se: “Taem mi stap lesin long miusik ya, mi stap talem ol tok blong hem long tingting blong mi. !Hemia wan gudfala rod blong tingbaot Jeova oltaem, mo haremgud long miusik ya tu!”—Fil. 4:8.
3 ?Wetaem Yu Save Lesin Long Miusik Ya?: Taem yu plei ol kaset blong Kingdom Melodies long haos, oli mekem se insaed long haos i gat wan filing long saed blong spirit we i givhan blong mekem pis long famle. Wan famle i talem se: “Mifala i plei [miusik ya] bakegen mo bakegen long haos mo long trak. Mifala i neva kam taed blong lesin long ol gudfala miusik ya. Plante taem, Kingdom Melodies i givim stret tingting long mifala mo i putum pis long tingting blong mifala taem mifala i stap mekemrere blong go long Kristin miting, mo taem mifala i stap ron long trak blong go long wan asembli.” Wan sista i talem se: “Taem mi stap mekem ol wok long haos, mi lesin long miusik ya mo hem i rili mekem mi mi hapi. I narakaen we mi mi save glad taem mi stap wasem ol klos. Bambae mi lesin long miusik ya enitaem we tingting blong mi i foldaon. !Hem i mekem mi mi haremgud tumas! . . . Evri singsing i karem glad i kam long mi.” ?Yu ting se i gat sam taem we miusik ya i save givhan long yu tu mo mekem yu yu haremgud?
4 Plante miusik blong naoia i soemaot ol tingting blong wol. Ol papa mama oli save yusum ol kaset blong Kingdom Melodies blong givhan long ol pikinini blong olgeta blong laekem ol gudfala miusik. Plante Baebol stadi mo man we oli intres long trutok, olgeta tu bambae oli glad blong save long ol gudfala singsing ya long saed blong spirit, we oli presem Jeova mo leftemap tingting blong man.—Sam 47:1, 2, 6, 7.