Program Blong Nekiswan Seket Asembli
Long taem ya we ‘laef i kam strong tumas,’ yumi nidim waes blong God, nao yumi save mekem we Jeova i glad long yumi mo i stap glad long yumi oltaem. (2 Tim. 3:1) Seket asembli blong sevis yia 2005 bambae i givim ol gudfala advaes mo ol tok blong leftemap tingting blong yumi. Stamba tok blong asembli ya: “Letem ‘Waes We i Kam Long Heven’ i Lidim Yu.”—Jem. 3:17.
Faswan tok we i gat fo haf blong hem, hemia “Soemaot ‘Waes We i Kam Long Heven’ Long Laef Blong Yumi.” Ol haf ya bambae oli givhan long yumi blong luksave olsem wanem blong gat klin fasin, pis, skelgud long tingting mo fasin blong yumi, mo rere blong obei. Biaen, seket elda bambae i tokbaot tri narafala samting long saed blong waes we i kam long heven. Distrik elda bambae i finisim faswan dei blong asembli ya wetem wan tok we i soemaot olsem wanem ol Kristin minista oli gat evri samting we oli nidim blong tokbaot waes blong God, nating se plante man oli jikim olgeta se ‘oli no gat nem mo oli no skulgud.’—Wok 4:13.
Long seken dei, bambae i gat wan tok bakegen we i gat tri haf blong hem: “Traehad Blong Folem Ol Fasin We Oli Save Givhan Long Yumi Blong Yumi Lefleftemap Yumi.” Ol haf ya bambae oli givhan long yumi blong luksave ol samting we oli save mekem yumi kam slak long saed blong spirit, mo olsem wanem blong stap longwe long ol samting ya. Bambae ol haf ya oli soemaot tu, wanem we yumi save mekem long ol miting blong kongregesen, long wok blong prij, mo insaed long famle, blong yumi givhan long ol narafala blong oli kam strong moa. Pablik tok ya, “?Waes Blong God i Stap Givhan Long Yumi Long Wanem Rod?,” bambae i halpem yumi blong gat tangkiu from ol gudfala frut we yumi kasem taem yumi folem ol rul blong God long laef blong yumi. Laswan tok, hemia “Fasin Blong Folem Waes Blong God Bambae i Protektem Yumi.” Tok ya bambae i mekem tingting blong yumi i strong blong lukluk i go long Jeova long ol las dei ya, blong kasem waes blong hem.
Wan impoten haf blong evri asembli, hemia baptaes blong ol niufala disaepol. Mo tu, long asembli ya bambae yumi mekem Tiokratik Skul mo Wajtaoa Stadi blong wik ya. Jeova i wantem se waes we i kam long hem i givhan long yumi evriwan. Ol advaes mo ol tok blong leftemap tingting we yumi harem long seket asembli ya bambae i mekem yumi kam strong moa long saed blong spirit.—Prov. 3:13-18.