Givhan Long Olgeta Blong Oli Kasem Moa Save
1 Taem yumi stap prij, plante taem yumi mitim ol man we oli no laef insaed long teritori blong yumi no we oli toktok wan narafala lanwis, olsem fasin ya we nambut i yusum blong toktok (saen lanwis). Maet sam narafala we yumi go luk olgeta oltaem blong storian long saed blong Baebol, oli muvaot mo oli go laef long defren ples. ?Olsem wanem yumi save mekem rod blong ol man olsem oli kasem moa save? Blong mekem olsem, yumi yusum pepa ya Please Follow Up (S-43).
2 Ol man oli intres moa long gud nius sipos yumi toktok long prapa lanwis blong olgeta. (Wok 22:1, 2) Taswe, sipos yumi mitim wan man we i toktok narafala lanwis, yumi mas fulumap pepa ya nating sipos man ya i no soem intres long gud nius blong Kingdom. Be, i no nid blong yumi fulumap pepa ya sipos i gat plante man long teritori blong yumi we oli toktok lanwis ya, mo i gat samfala we oli prij oltaem long olgeta long prapa lanwis blong olgeta. Sipos i olsem, yumi nidim blong fulumap pepa ya nomo taem wan long olgeta i soemaot intres.
3 Fulumap Pepa: Wetem kaen fasin, traem blong save nem blong man ya, adres blong hem, mo telefon namba blong hem. Makemdaon sipos hem i intres bigwan no smol nomo, wanem taem yumi save faenem hem, buk we hem i karem no i askem, mo lanwis we hem i toktok gud long hem. Afta we yumi fulumap pepa ya, yumi mas givim kwiktaem long sekretari blong kongregesen, nao hem bambae i sanem i go long kongregesen no grup we i save givhan long man ya.
4 Sanem Pepa i Go: Sipos sekretari i no save weswan kongregesen no grup we i mas kasem pepa ya, no hem i no save adres blong olgeta, hem i save ring i go long Teritori Des long branj ofis blong kasem stret save ya. Taem hem i sanem pepa ya, i no nid blong hem i luk elda we i lukaot long olgeta kongregesen long wan taon.
5 Sipos wan kongregesen no wan grup i kasem pepa ya Please Follow Up we wan pablisa i fulumap finis, oli mas mekem plan kwiktaem blong go luk man ya. Taem yumi traehad blong mekemgud wok blong yumi, yumi save trastem se bambae Jeova i openem hat blong olgeta ya we i stret “blong oli kasem laef ya we i no save finis.”—Wok 13:48.