Spesel Wekap! We Bambae Yumi Seremaot Long Septemba
1 Klosap evri man oli glad blong harem ol pijin oli singsing mo blong luk ol naesfala kala long skae taem san i godaon. Be plante oli no luksave se gudfala Papa blong yumi we i stap long heven mo i gat lav, hem nao i wokem ol samting ya. Bambae yumi gat janis blong tokbaot nambawan fasin ya blong Jeova blong wokem ol samting taem bambae yumi seremaot wan spesel Wekap! (Aes. 40:28; 43:10) Fulwan Wekap! blong Septemba i tokbaot kwestin ya: “?I Gat Wan God We i Wokem Evri Samting?”
2 Long Wok Blong Prij: I gud sipos yu save mekem plan blong joen wetem kongregesen evri Sarede blong prij long ol haos wanwan. Yu save seremaot spesel magasin ya long ol narafala dei blong wik tu sipos yu wantem. Olgeta we bambae oli intres moa long Wekap! ya hemia ol tija, mo ol narafala we wok blong olgeta i joen wetem edukesen. Taswe, i gud blong mekem spesel plan blong visitim ol man olsem we oli stap long ples blong yufala.
3 Sipos wan man i intres, putum wan kwestin we bambae yu ansarem taem yu go luk hem bakegen. Olsem nao, yu save putum wan kwestin se: ?Sipos i gat wan God we i Wokem olgeta samting mo i gat lav, from wanem hem i letem ol man oli safa? Taem yu gobak blong luk hem bakegen, yu save tokbaot japta 1 no japta 11 blong buk ya Baebol Tijim. Sipos no, yu save putum wan kwestin we i tokbaot plan blong God long saed blong wol ya, ale taem yu gobak yu save tokbaot japta 3.
4 Long Skul: Sipos yu stap skul yet, i gud yu givim spesel Wekap! ya long ol tija mo ol fren blong yu. Yu save putum wan Wekap! long tebol blong yu, mo maet hemia nomo i naf blong pulum ol yangfala blong oli askem kwestin long saed blong bilif blong yumi. Taem yu mas raetem wan stori no ripot blong skul, yu save yusum ol poen insaed long magasin ya blong pruvum bilif blong yu. Blong givhan long yu, haf ya “Ol Yangfala Oli Askem” long magasin ya i tokbaot kwestin ya: “?Olsem Wanem Mi Save Pruvum Bilif Blong Mi Se God i Wokem Evri Samting?”
5 I stret nomo we ol man oli givim ona long Jeova mo leftemap nem blong hem from ol samting we hem i wokem. (Rev. 4:11) Yumi save givim ona long God blong yumi we i Wokem olgeta samting, mo yumi save halpem ol narafala blong oli mekem sem mak, sipos yumi joen fulwan long wok blong seremaot Wekap! blong Septemba.