!Wan Spesel Wekap! Blong Seremaot Long Manis Jenuware!
1 Plante man oli askem kwestin long saed blong Baebol from we oli rili wantem save sipos buk ya i save halpem olgeta. Oli askem ol kwestin olsem: ?Sipos ol man oli raetemdaon Baebol, from wanem yumi talem se hem i Tok blong God? ?From wanem mi mi save trastem Baebol blong lidim mi long laef? ?Sipos mi mi spenem taem blong mi mo mi traehad blong ridim mo stadi Baebol, bambae samting ya i givhan long mi olsem wanem? ?I gud blong mi yusum weswan Baebol? Hemia nao sam long ol kwestin we spesel Wekap! ya blong Jenuware-Maj bambae i ansarem. Stamba tok blong hem se “?Yu Yu Save Trastem Baebol?”
2 Yumi wantem seremaot spesel Wekap! ya long olgeta ples long teritori blong yumi. Sipos yu naf, i gud yu joen wetem kongregesen evri Sarede long manis blong Jenuware blong prij long ol haos wanwan. Spesel Wekap! ya bambae i kamaot long Inglis mo Franis long manis Novemba, taswe yu save stat blong yusumgud magasin ya long manis Novemba. Soem spesel Wekap! ya long ol famle, ol man raonabaot long haos blong yu, ol man we yu wok wetem olgeta, ol tija, ol pikinini we yu skul wetem olgeta, mo ol visit blong yu. Karem sam kopi blong magasin ya wetem yu taem yu go long stoa mo taem yu wokbaot blong go long narafala ples. Ol elda oli odarem finis, moa kopi blong spesel Wekap! ya blong meksua se kongregesen i gat naf magasin blong seremaot.
3 Statem Wan Baebol Stadi: Sipos yu givimaot magasin ya long wan man, bifo we yu finisim storian blong yutufala yu save mekem rod blong yu statem wan Baebol stadi wetem hem long nekis visit. Maet yu save talem wan samting olsem: “Nekis taem, mi laekem blong soem long yu ansa we Baebol i givim long kwestin ya, ‘?Wanem stamba tingting blong God long saed blong wol ya?’ ” Taem yu gobak blong luk hem bakegen, karem buk ya Baebol Tijim wetem yu, mo soem pej 4-5 long hem, no tokbaot haf 1-3 long japta 3. Wan narafala samting we yu save talem hemia se: “Nekis taem, mi laekem blong storian long saed blong wan profet tok long Baebol we i stap kamtru naoia.” Taem yu gobak, soem japta 9 blong buk mo tokbaot haf 1-3 wetem hem. No maet yu save talem nomo long man we i intres se: “Plante man i faenem i had blong kasem save long wanem we oli ridim long Baebol. Nekis taem, mi laekem blong soem long yu olsem wanem yu save kasem save long wanem we yu ridim long Baebol blong yu.” Long nekiswan visit, karem buk ya Baebol Tijim mo soem olsem wanem yumi stap yusum buk ya blong stadi.
4 Ol “tok blong Baebol” nomo oli save mekem yumi ‘waes blong God i save sevem yumi.’ (2 Tim. 3:15) !Taswe, yumi evriwan yumi wantem joen fulwan long wok blong seremaot spesel Wekap! ya mo givhan long ol man blong oli save trastem Baebol moa!