Program Blong Nekis Seket Asembli

I stret nomo we ol man oli leftemap Jeova. ?Olsem wanem yumi leftemap Jeova? ?Wanem sam traem we samfala oli kasem taem oli mekem olsem? ?Wanem ol blesing we olgeta we oli leftemap God naoia oli stap kasem? Program blong seket asembli blong sevis yia 2008, bambae i givim ol ansa we oli stret long ol kwestin ya. Stamba tok blong asembli ya hemia ‘Long Olgeta Fasin Blong Yufala, Oltaem Yufala i Mas Leftemap God.’ (1 Kor. 10:31) Bambae yumi tokbaot ol rij kakae long saed blong spirit we bambae yumi kasem long tufala dei ya.

Distrik elda bambae i mekem tufala tok ya “?From Wanem Yumi Mas Leftemap God?” mo “Soemaot Wan Gudfala Eksampol Blong Mekem Samting We God i Wantem.” Brata ya bambae i givim pablik tok ya tu, “?Hu Ya Ol Man We Oli Leftemap God?” mo laswan tok ya, “Joengud Tugeta Blong Leftemap God Long Fulwol.” Brata ya bambae i lidim Tiokratik Skul tu. Seket elda bambae i mekem ol tok ya, hemia “I Gud Yumi Glad Blong Soemaot Se God i Gat Olgeta Paoa,” mo “Tingbaot Ol Nid Blong Seket,” mo “Gohed Blong ‘Stanap Strong Long Ol Trutok,’ ” we i stanap long 2 Pita 1:12. Mo tu, bambae yumi lanem olsem wanem “Wok Blong Paenia i Leftemap God.” “Leftemap God Long Evri Haf Blong Laef Blong Yumi,” hemia faswan long tufala tok ya we wanwan long tufala i gat fo haf long hem. Faswan tok ya bambae i tokbaot mining blong 1 Korin 10:31. Tok ya we i gat fo haf blong hem, “Mekem Wok Blong Jeova Blong Presem Hem” bambae i tokbaot ol defren haf blong wosip blong yumi. Bambae yumi glad long Wajtaoa stadi mo tok long saed blong vas blong dei long Sande. Bambae i gat baptaes tu.

Bighaf blong ol man oli no wantem luksave se God i stap. Plante man oli letem ol plan blong man i pulum tingting blong olgeta nao oli no moa tingting dip long bigfala paoa blong Jeova. (Jon 5:44) Be yumi glad blong spenem taem blong tokbaot olsem wanem ‘Long Olgeta Fasin Blong Yumi, Oltaem Yumi Mas Leftemap God.’ Mekem plan naoia blong stap long tufala dei blong asembli ya mo haremgud long fulwan program.