Yumi Mas Gat Gudhan Blong Yusum Baebol
1. ?Baebol i save givhan gud long yumi blong mekem wanem?
1 Sipos yumi gat gudhan blong yusum Tok blong God, samting ya bambae i givhan long yumi blong talemaot trutok mo tijim trutok long fasin we i klia. Mo bambae i halpem yumi tu blong soemaot klia ol giaman tijing mo kastom blong man.—2 Tim. 2:15; 1 Pita 3:15.
2. ?Wanem bambae i givhan moa long yumi blong gat gudhan blong faenem ol vas?
2 Save Moa Long Saed Blong Baebol: Long saed blong enikaen tul, yumi gat gudhan blong yusum tul ya taem yumi save gud hem. Sipos yu ridim Baebol fulwan, bambae yu kasem save gud long bigfala tingting blong Baebol. Mo tu, bambae i halpem yu blong rimemba ol vas, mo bambae i moa isi long yu blong faenem stret vas we yu nidim. Taem yu stap traehad blong save moa long saed blong Baebol, ol toktok blong yu bambae i givhan moa long ol man we yu mitim olgeta long wok blong prij, mo long ol narafala ples we yu tekem janis blong prij long olgeta. Ol tok blong yu bambae i soemaot moa se yu bilif long samting we yu stap talem, mo se yu wantem tumas blong serem save ya wetem ol narafala.—1 Tes. 1:5.
3, 4. (a) ?Wanem samting we yumi save mekem blong save moa long saed blong Baebol? (b) ?Wanem sam narafala rod we yu yusum finis blong save moa long saed blong Baebol?
3 Long ol miting blong kongregesen, lanem fasin ya blong openem Baebol mo ridim ol vas we ol brata oli tokbaot. Taem yu stadi yu wan mo yu rerem ol miting, jekem ol vas we oli no raetem fulwan long paragraf, mo tingting dip long olgeta blong save olsem wanem oli joen wetem laef blong yu. Plante oli luk se i moagud blong ridim ol vas stret long Baebol, i bitim we oli lukluk long kompiuta no long wan pepa we oli printim long kompiuta. Sipos yu ridim ol vas stret long Baebol, bambae i moa isi long yu blong faenem ol vas ya taem yu wantem yusum olgeta long wok blong prij.—Jon 14:26.
4 Sam famle oli putum wan taem blong kam wanples blong traem lanem ol vas blong Baebol. Wan rod blong lanem olgeta, hemia se oli save yusum ol kad we oli raetem ol tok blong wan vas long wan saed blong kad, mo long narasaed blong kad, oli raetem weples blong faenem vas ya long Baebol. Ale, olgeta wanwan oli karem wan kad, oli luk vas we i stap long kad, nao oli traem talem ol tok blong vas ya, sipos no, oli luk ol tok blong vas we oli raetem long narasaed blong kad, nao oli traem talem weples vas ya i stap long Baebol. Wan narafala samting we i save mekem se yumi gat gudhan blong yusum Baebol, hemia sipos yumi mekem ol pleplei long haos, blong rerem ol fastok blong yusum long wok blong prij. Mo tu yumi save lanem olsem wanem blong yusum Baebol blong ansa long man we i sakem tok blong blokem yumi long wok blong prij, mo yumi save rerem ansa long kwestin we man i askem.
5. ?From wanem yumi wantem traehad moa blong gat gudhan blong yusum Baebol?
5 I no gat wan narafala buk we i gud olsem Baebol. Baebol nomo i gat ol toktok we i save ‘mekem man i waes, blong God i sevem hem.’ (2 Tim. 3:15) Bighaf blong ol man we yumi prij long olgeta oli no save ol nambawan trutok blong Baebol. Taswe yumi mas traehad moa blong gat gudhan blong yusum Baebol, nao yumi save soemaot long olgeta ol gudfala samting we i stap long Baebol.—Prov. 2:1-5.