!Yumi Mas Gat Strong Tingting Blong Talemaot Kingdom!
1 Jeova i wan God we i stap mekem ol gudfala wok. Mo hem i gat strong tingting blong finisim ol wok ya. Ol samting we hem i mekem oli halpem gud ol man we oli mekem wok blong hem. Jisas i mekem sem mak olsem Papa blong hem, hem tu i wok wetem strong tingting. Hem i soemaot fasin ya long yumi, blong bambae yumi biaen long hem. Taem hem i stap long wol, hem i wantem tumas we evri samting long haos blong God oli mas stret gud. Tingting ya i stap wok long hem olsem faea we i stap laet. Taswe hem i ronemaot ol man we oli mekem haos blong God i kam olsem ples blong mekem maket. (Jon 2:14-17) Yumi tu yumi mas gat strong tingting long wok we yumi mekem blong Jeova God. Olsem nao bambae yumi man we yumi “strong blong mekem ol gudfala samting.”—Taet. 2:14.
2 Ol gudfala wok we ol Kristin oli mekem, i save givhan bigwan long ol man raonabaot long olgeta. Tru ya, taem yumi halpem ol man blong oli kasem save mo mekem wok blong Jeova, yumi stap mekem i gud long olgeta. Wok ya i impoten moa bitim ol narafala samting we yumi save mekem. (Jon 17:3) Blong halpem ol man olsem, yumi mas gat strong tingting blong talemaot Kingdom mo pulum ol man oli kam disaepol.
3 ?Wanem ya strong tingting? Long Grik lanwis, tok ya “strong tingting” i minim se wan samting i “boel,” olsem taem yu boelem wota long faea. Taem wan Kristin i wantem tumas blong mekem samting we i gud mo i stret, i olsem we wan faea i laet long tingting blong hem. Nao bambae hem i gat strong tingting blong wok, olsem wota we i boel, i no save stap kwaet. Ol man we oli wok blong God oli mas gat fasin ya taem oli talemaot Kingdom. ?Olsem wanem? ?Yumi gat strong tingting taem yumi prij? ?Yumi traem evri rod blong halpem ol man blong oli save olgeta samting we Jeova i wantem mekem?
4 Long manis Novemba, bambae yumi seremaot ol buklet ya Ol Witnes Blong Jeova—?Oli Hu? ?Wanem Bilif Blong Olgeta?, ?Wanem Bambae i Hapen Long Yumi Taem Yumi Ded? no wan narafala buklet we kongregesen i gat i stap. Yumi mas reregud blong save se weswan long ol buklet ya i stret gud long ples we bambae yumi prij long hem, mo weswan i stret long ol man we bambae yumi mitim olgeta long evri haos.
5 Sipos yumi wantem gat strong tingting blong mekem gudfala wok, yumi mas reregud fastaem. ?Olsem wanem? ?Yumi save finis wanem fastok we bambae yumi yusum long wok blong prij long manis ya? ?Olsem wanem bambae yumi seremaot buklet long man? ?Wanem poen bambae yumi tokbaot? Yumi mas tektaem blong ridim ol buklet we yumi gat, mo yumi mas glad tumas long ol save we bambae man i kasem from ol buklet ya. Sipos yumi mekem olsem, bambae yumi gat strong tingting blong seremaot ol buklet ya taem yumi prij.
6 Tede, taem i sot. En i klosap nomo, mo nius we yumi stap talemaot long ol man i impoten tumas. From samting ya nao, yumi mas gat strong tingting blong talemaot Kingdom, mo yumi mas halpem ol narafala blong oli save God mo Baebol. Sipos yumi gat strong tingting blong tijim ol man long ol gudfala samting ya we i save givim laef long olgeta, yumi soemaot we yumi fasgud long Jeova mo yumi laekem hem. Tingbaot ol kwestin ya: ‘?Mi mi gat strong tingting blong mekem ol gudfala wok? ?Mi mi wok had mo mi stap givim ful paoa blong mi long wok blong prij?’ Ansa blong yu long tufala kwestin ya i soemaot sipos yu stap wok wetem tingting we i strong olsem faea no nogat. Sipos yumi gohed oltaem blong talemaot Kingdom, bambae yumi mekem we tingting blong yumi i strong moa blong wok. Olgeta man we oli stap wajem yumi bambae oli luksave se yumi ya, yumi wan kampani blong man we i gat strong tingting blong mekem ol gudfala wok.