Ansa Long Wan Kwestin
◼ ?Olsem wanem blong save sipos i stret blong givim buk long man no nogat?
Bigfala samting we yumi mas tingbaot, hemia se man we yumi prij long hem, hem i wantem save moa long Baebol no nogat. Sipos man i wantem save moa, yumi givim tu magasin, no wan buklet, no wan buk long hem. Maet yumi luk se wan man i save givim smol presen mane nomo blong sapotem ol wok blong kingdom long fulwol, no maet hem i no gat mane nating. Nating se i olsem, yumi save givim buk long hem yet. (Job 34:19; Rev. 22:17) Be yumi no givim ol buk mo ol gudfala samting we yumi seremaot long ol man we oli no tinghae long hem.—Mat. 7:6.
?Olsem wanem blong save sipos man we yumi prij long hem i wantem save moa? Sipos hem i glad blong storian wetem yumi, hemia i soemaot se hem i wantem save moa. Maet yumi luk se hem i lesin gud taem yumi toktok, hem i ansa taem yumi askem kwestin, mo hem i glad blong talemaot tingting blong hem. Mo man we i lukluk long Baebol taem yumi ridim ol vas, i soemaot se hem i tinghae long Tok blong God. Plante taem, i gud yumi askem long hem sipos bambae hem i ridim buk we yumi wantem givim long hem. Ol pablisa oli mas waes blong luksave sipos man i wantem save moa no nogat. Taem yumi prij long ol man long rod no long wan narafala ples olsem, i no stret blong givimaot ol magasin, ol buklet, mo ol buk olbaot long eniman we yumi mitim. Sipos yumi no save se man i wantem save moa no nogat, i moa gud yumi givim wan traket long hem no wan pepa blong singaot hem i kam long miting.
Namba blong ol buk mo magasin we wan pablisa i karem long ples blong buk, i no dipen long hamas presen mane we hem i givim. Be i dipen long hamas buk mo magasin we hem i save seremaot long wok blong prij. Presen mane i no blong pem ol buk mo magasin, be i blong givhan long olgeta wok we yumi mas mekem blong talemaot gud nius long fulwol. Nating se yumi rij no yumi pua, bambae yumi no givim haf mane blong yumi we i stap nating, blong sapotem wok ya. Defren olgeta, bambae yumi givim presen mane long gladhat blong yumi from we yumi tinghae long wok blong Kingdom. (Mak 12:41-44; 2 Kor. 9:7) From we yumi tinghae long wok ya, bambae yumi no westem ol buk mo magasin. Bambae yumi karem olgeta nomo we yumi nidim.
[Tok blong makem poen long pej 2]
Ol pablisa oli mas waes blong luksave sipos man i wantem save moa no nogat