!Long Novemba Bambae Yumi Seremaot Kingdom Nius N. 38!
1. ?Wanem kwestin we plante man oli stap askem? ?Olsem wanem wok we yumi mekem long Novemba, bambae i ansa long kwestin blong olgeta?
1 Ded i wan enemi blong olgeta man, nating we bilif blong olgeta i defdefren. (1 Kor. 15:26) Plante man oli wantem save se, ?ol dedman oli stap wea? ?Bambae yumi save luk olgeta bakegen? From samting ya, stat long 1 Novemba, bambae yumi joen long wan spesel wok blong seremaot Kingdom Nius N. 38, we nem blong hem, “?Ol Dedman Bambae Oli Laef Bakegen?” Spesel wok ya, bambae i givhan long ol man blong oli kasem ansa long kwestin blong olgeta. Afta long spesel wok ya, bambae yumi yusum Kingdom Nius N. 38 long wok blong prij, olsem ol narafala traket.
2. ?Kingdom Nius ya i olsem wanem?
2 Kingdom Nius Ya i Olsem Wanem: Kingdom Nius N. 38, oli wokem long wan wei we yu save benem. Olsem nao, yu save luk taetel blong hem wetem kwestin ya se, “?Yu ting se . . . yes? no? maet?” Taem man i openem Kingdom Nius ya, bambae hem i luk samting we Baebol i talem blong ansa long kwestin we i stap long taetel. Mo tu, bambae hem i luk sam gudfala promes we i stap long Baebol, mo olsem wanem ol save ya oli save givhan long hem. Mo bambae hem i faenemaot tu, from wanem hem i save bilif long Baebol. Mo long las pej blong Kingdom Nius ya, i gat wan kwestin we yu save askem long man blong pulum tingting blong hem, mo yu askem long hem sipos hem i wantem save moa.
3. ?Wanem rod blong seremaot Kingdom Nius N. 38?
3 Rod Blong Seremaot: Wok ya blong seremaot Kingdom Nius, bambae i sem mak nomo long wok we yumi mekem, blong seremaot ol pepa blong singaot man i kam long Memoriol mo asembli. Ol elda bambae oli talemaot long yumi rod we bambae yumi folem blong finisim ol teritori blong yumi. Bambae oli folem leta blong 1 Eprel 2013 we oli kasem. Ol kongregesen we oli gat smol teritori, oli save givhan long ol kongregesen klosap we oli gat bigfala teritori. Sipos yufala i kasem Kingdom Nius N. 38, i gud yufala i tekem i naf nomo blong wan wik. Afta we yufala i prij long olgeta haos wanwan, mo yufala i finisim olgeta teritori blong yufala, yufala i save seremaot ol traket ya long ol pablik ples. Sipos yufala i finisim olgeta traket ya bifo en blong manis, yufala i save seremaot ol magasin. I gud se long fas sarede blong manis, yumi joen blong seremaot Kingdom Nius ya i bitim we yumi statem ol Baebol stadi. Mo long ol wiken, sipos yumi luk se i stret, yumi save givimaot ol magasin tu. ?Olsem wanem? ?Yu yu mekem plan finis blong joen fulwan long spesel wok ya?