!Ol Niufala Traket Oli Nambawan!
1. ?Wanem niufala tul we yumi save yusum long wok blong prij?
1 Long yia 2013, long asembli blong tri dei we nem blong hem “!Tok Blong God i Trutok!” yumi kasem faef niufala traket. Mo tu, yumi kasem wan narafala traket we hem i Kingdom Nius Namba 38, we nem blong hem “?Ol Dedman Bambae Oli Laef Bakegen?” Ol sikis niufala traket ya oli defren long ol narafala traket we yumi gat finis. ?From wanem oli defren? ?Olsem wanem blong seremaot olgeta?
2. ?From wanem oli wokem ol niufala traket ya?
2 ?From Wanem Ol Niufala Traket Ya Oli Defren Long Ol Narafala Traket?: Plante taem gudfala frut i kamaot taem yumi folem ol rod ya long wok blong prij: (1) Yumi askem kwestin we i pulum man blong storian. (2) Yumi ridim wan vas blong Baebol. (3) Yumi givim buk no magasin long hem. (4) Yumi askem wan kwestin, mo yumi mekem plan blong kambak. Oli wokem ol niufala traket ya blong givhan long yumi blong yumi folem ol rod ya.
3. ?Yumi mekem olsem wanem blong seremaot ol niufala traket ya long wok blong prij?
3 ?Olsem Wanem Blong Seremaot?: (1) Afta we yu talem halo long man, yu soem ol kwestin we oli stap long fored blong traket ya, mo yu askem tingting blong hem. (2) Yu openem traket ya, mo yu tokbaot “Samting We Baebol i Talem.” Sipos yu luk se i stret, yu ridim vas ya stret long Baebol. Mo sipos man ya i no bisi, yu save tokbaot kwestin ya se “?Save Ya i Givhan Long Yu Olsem Wanem?” (3) Yu givim traket ya long hem, mo yu talem long hem blong i ridim ol narafala save insaed long hem. (4) Bifo yu aot, yu soem kwestin we i stap biaen long traket ya, aninit long tok ya “Yu Traem Tingbaot” mo yu mekem plan blong kambak blong ansa long kwestin ya.
4. ?Olsem wanem blong visitim man we i tekem traket?
4 I isi nomo blong visitim man we i karem traket. Yu save yusum ol vas we oli stap aninit long kwestin we yu bin soem long hem. Bifo we yu lego hem, yu soem pija blong buklet ya Gud Nius we i stap daon long traket. Mo yu tekem buklet ya, yu soem wan stadi long buklet ya we i stret long storian blong yutufala, mo yu askem long hem sipos hem i laekem buklet ya. Sipos hem i tekem, yu mekem plan blong kambak, blong yutufala i tokbaot sam moa save long buklet ya. Taem yu mekem olsem, saye yu statem wan Baebol stadi. Sipos yu no givim buklet long man ya, yu save givim wan narafala traket long hem, mo yu mekem plan blong kambak.
5. ?From wanem yumi mas tinghae long ol traket?
5 Yumi yusum ol traket long wok blong prij bitim 130 yia finis. Nomata se ol traket ya oli defdefren, be gudfala frut i kamaot, taem yumi yusum olgeta long wok blong prij. Yumi mas yusum gud ol nambawan traket ya, olsem nao bambae yumi gohed blong mekem se save blong Baebol i kasem olgeta ples long wol.—Prov. 15:7.