?Wanem i Save Talemaot Fiuja Blong Yu?
Plante man oli bilif se gudlak mo badlak i save kontrolem fiuja blong olgeta. Bilif ya i pulum olgeta blong mekem sam samting we oli ting se bambae i mekem laef blong olgeta i kamgud moa.
BILIF WE PLANTE MAN OLI GAT
ASTROLOJI: Sam man oli bilif se posisen blong ol sta long taem we oli bon, i makemaot fiuja blong olgeta. Taswe oli ridim ol horoscope blong save fiuja blong olgeta mo mekem ol desisen.
FENG SHUI: Sam man oli bilif se sipos oli disaenem o putum sam samting long wan spesel fasin, bambae oli sakses long laef. Lo Winga blong Hong Kong i talem se: “Wan ekspet blong feng shui i talem se mi mas putum wan kristol glas long wan spesel ples long stoa, blong mi save winim moa mane.”
ONA LONG FAMLE WE I DED: Sam man oli bilif se sipos oli ona long famle blong olgeta we i ded o long ol narafala god, hemia bambae i protektem olgeta mo kasem blesing. Van, long Vietnam i talem se: “Mi mi bilif se sipos mi ona long famle blong mi we i ded, bambae mi gat wan gudfala laef naoia mo bambae i protektem famle blong mi.”
LAEF LONG WAN NARAFALA BODI: Plante oli bilif se laef i gohed nomo. Taem man i ded, be hem i gohed blong laef bakegen long wan narafala bodi. Oli bilif se ol gudfala samting o ol nogud samting we i stap kasem wan man naoia, oli kamaot from ol samting we hem i bin mekem long narafala laef blong hem bifo.
Nating se plante man oli talem se hemia ol giaman bilif, be oli stil mekem sam samting olsem ridim laen long han, horoscopes, Ouija® boards, tarot kad mo ol narafala samting. Oli harem se maet ol samting ya i save talemaot fiuja blong olgeta.
?OL SAMTING YA OLI GIVHAN?
Olgeta we oli mekem ol samting ya, ?oli rili gat wan gudfala laef mo wan fiuja we i sef?
Tingbaot stori blong Hào long Vietnam. Hem i yusum astroloji, feng shui mo i stap ona long famle we i ded. ?Ol samting ya oli givhan long hem? Hào i talem se: “Mi lusum plante mane long bisnes, mi gat plante kaon, famle i raorao, mo tingting blong mi i foldaon bigwan.”
Qiuming long Taewan, hem tu i bilif long astroloji, laef bakegen long narafala bodi, gudlak mo badlak, feng shui, mo ona long famle we i ded. Afta we hem i luklukgud long ol bilif ya, hem i se: “Mi luksave se ol bilif ya oli agensem olgeta bakegen, mo i mekem man i konfius. Mi luk se plante taem, ol samting we astroloji i talem, i no tru. Long saed blong laef bakegen long wan narafala bodi, sipos yu no rimemba ol samting long laef blong yu bifo, ?olsem wanem yu save jenisim laef blong yu blong mekem se nekis laef blong yu i gud moa?”
“Mi luksave se ol bilif ya oli agensem olgeta bakegen, mo i mekem man i konfius.” —QIUMING, TAEWAN
Hào mo Qiuming, mo plante narafala oli faenemaot se gudlak mo badlak, ol sta, ona long famle we i ded, mo bilif ya blong laef bakegen long wan narafala bodi, oli no save talemaot fiuja blong yumi. ?Hemia i min se yumi nogat kontrol long fiuja?
Plante oli harem se blong gat wan gudfala fiuja, oli mas gat hae edukesen mo mane. ?Olgeta we oli jusum ol samting ya oli kasem wanem?
a Long atikol ya mo long ol narawan we i kam biaen, mifala i jenisim sam nem.
b Tok ya i stap long Tabu Baebol long Galesia 6:7. Ol kantri long Esia oli stap talem sem tingting ya se Sipos yu planem melen, bambae yu gat ol melen, sipos yu planem bin bambae yu gat ol bin.