!Yu Save Kasem Ol Gudgudfala Samting!
1. ?From wanem yumi mas tingbaot wok blong fultaem paenia?
1 ?Olsem wanem? ?Yu yu wantem kasem bigfala glad mo gat wan laef we i gat mining? ?Yu yu glad mo haremgud taem yu halpem ol narafala? ?Yu yu wantem mekem moa long wok blong Jeova? Sipos yu talem yes long ol kwestin ya, ale yu yu save mekem wok olsem wan fultaem paenia. I tru, yumi mas tingbaot wok we yumi mas mekem insaed long famle mo ol narafala wok we Baebol i talem se yumi mas mekem, mo tu yumi mas tingbaot helt blong yumi mo ol samting we bodi blong yumi i no naf blong mekem.
2. Tokbaot sam long ol gudgudfala samting long saed blong spirit we ol paenia oli kasem.
2 Ol tok we tabu spirit i lidim Solomon blong raetem, i joenem blesing blong Jeova wetem ol rij samting we man i save gat. (Prov. 10:22) Tede, blesing blong Jeova i mekem man i rij fastaem long saed blong spirit. Ol blesing we ol fultaem paenia oli kasem long saed ya, oli plante we oli plante. Wan eksampol, oli kasem bigfala glad taem oli lego ol samting we olgeta nomo oli wantem, nao oli “pemaot taem” blong givhan long ol narafala man. (Kol. 4:5, NW; Wok 20:35) Jeova i luk mo i glad long ol wok we oli mekem from lav we oli gat long hem. Ol “gudgudfala samting” ya we oli hivimap long heven oli no save lus samtaem. (Mat. 6:20; Hib. 6:10) Antap moa, fasin fren we ol paenia oli gat wetem Jeova i save kam strong moa taem oli mekem ‘ae blong olgeta i klia gud’ mo oli trastem Jeova blong i givim ol samting we oli nidim evri dei.—Mat. 6:22, 25, 32; Hib. 13:5, 6.
3. ?Olsem wanem fasin blong wantem ol rij samting long saed blong spirit i defren long fasin blong wantem ol rij samting long saed blong bodi?
3 Plante taem, traehad we ol man oli mekem blong kasem ol rij samting long saed blong bodi i ‘krangke mo i stap spolem olgeta.’ (1 Tim. 6:9, 10; Jem. 5:1-3) Hemia i defren long ol blesing we oli kamaot long Jeova. Taem ol paenia oli spenem moa taem long wok blong prij, samting ya i halpem olgeta blong oli skelemgud ol samting mo blong oli gat klia tingting long saed blong ol samting we oli moa impoten. (Fil. 1:10, NW) Wan brata we i spenem fulap taem long wok blong hem olsem wan enjinia, i lego wok ya blong i save mekem wok blong paenia. Hem i talem se: “Mi faenem se wok blong paenia i no givim wari, olsem wok ya blong kasem mane. Naoia mi stap halpem mo tijim ol man long trutok. Hem i wan wok we i givim glad mo i pulum mi blong traehad moa blong halpem ol man.”
4. ?Olsem wanem ol fultaem paenia oli kasem blesing taem oli karem blesing i go long ol narafala?
4 Wan Blesing Blong Ol Narafala: Tede yumi stap long taem ya we ‘laef long wol i kam strong tumas.’ (1 Tim. 3:1) Ol man long olgeta ples blong wol oli rili nidim wan samting blong putum tingting blong olgeta i stap strong long hem. Taswe ol man blong talemaot Kingdom oli glad bigwan blong givhan long ol man ya we oli harem se oli no moa gat hop, blong oli save lanem mo laekem trutok, nao olgeta tu oli save glad. !Ol fultaem paenia oli haremgud tumas taem oli spenem moa long 800 aoa evri yia, long wok ya blong sevem laef blong man!—1 Tim. 4:6.
5, 6. ?Wanem i save givhan long yu blong kam wan fultaem paenia?
5 ?Olsem wanem? ?Yu yu stap tingting gud blong luk sipos yu save mekem wok ya blong fultaem paenia? Maet i nidim we yu lego ol samting long laef blong yu we oli no impoten mo yu “pemaot taem.” (Efes. 5:15, 16, NW) Plante oli mekem olsem taem oli mekem se laef blong olgeta i no moa fasfas tumas, nao oli no moa spenem tumas taem long wok blong winim mane be oli mekem moa long wok blong Kingdom. ?Olsem wanem? ?Yu yu save stretem ol samting long laef blong yu, blong yu save joenem ol paenia ya?
6 Prea long Jeova blong hem i givim waes long yu nao yu yu save mekem wan program we i wokgud. (Jem. 1:5) ?Wanem ol blesing we bambae yu kasem? !Hemia ol rij samting long saed blong spirit we i plante we i plante! Mo tu, Jeova bambae i blesem yu taem i givim ol samting we yu nidim long saed blong bodi. (Mat. 6:33) Long saed ya, olgeta we oli traem trastem Jeova bambae oli save kasem ‘olgeta gudgudfala samting i kam long olgeta we i plante we i plante.’—Mal. 3:10.