Ansa Long Wan Kwestin
◼ ?I stret blong klapem han afta long en blong wanwan haf blong Tiokratik Skul mo Miting Blong Kingdom Wok?
Taem Jeova i wokem wol “ol moning sta oli singaot bigwan tugeta, oli glad, mo olgeta pikinini blong God oli stat singaot mo klapem han blong olgeta from we oli harem gud.” (Job 38:7, NW) Ol pikinini ya blong God, hemia ol enjel, oli wantem presem Jeova from nambawan wok blong hem blong wokem ol niufala samting we oli soemaot waes, gudfala fasin, mo paoa blong hem.
I gud sipos yumi soem se yumi gat bigfala tangkiu from traehad blong ol brata blong givim tok mo mekem ol pleplei. Eksampol, yumi stap klapem han taem oli mekem tok mo pleplei long taem blong ol spesel dei, olsem ol asembli. Ol brata oli mas spenem moa taem mo oli traehad moa blong rerem ol nambawan tok ya. Yumi no klapem han nomo from traehad blong olgeta we oli mekem tok ya, be yumi soemaot tangkiu tu long Jeova mo ol tijing we hem i givim long yumi tru long Tok blong hem Baebol mo ogenaesesen blong hem.—Aes. 48:17; Mat. 24:45-47, NW.
?Be olsem wanem, yumi save klapem han long en blong ol defdefren haf blong Tiokratik Skul mo Miting blong Kingdom Wok? I no gat rul blong blokem fasin ya sipos samfala oli wantem soemaot se oli glad long wan tok. Eksampol, yumi save klapem han sipos wan studen i givim faswan tok blong hem. Be sipos fasin blong klapem han i kam olsem wan kastom nomo we yumi mekem oltaem be yumi no tingting se from wanem yumi mekem, ale fasin ya i no moa gat mining. Taswe i moagud yumi no klapem han long en blong ol wanwan haf blong miting.
Maet yumi no klapem han long en blong wanwan haf blong Tiokratik Skul mo Miting Blong Kingdom Wok, be i gat narafala rod we yumi evriwan i save mekem blong soem tangkiu from ol tijing we yumi kasem mo from traehad blong olgeta we oli save mekem ol haf blong miting ya. Yumi save mekem olsem taem yumi wekap gud mo lesin gud long ol tok we ol brata oli givim. Mo tu, afta long miting, yumi save go luk olgeta we oli bin gat haf long miting blong talem tangkiu from ol traehad blong olgeta.—Efes. 1:15, 16.