Ansa Long Wan Kwestin

◼ ?I stret blong klapem han taem oli talemaot se kongregesen i tekembak wan brata no sista we oli bin putumaot hem?

Jeova God i lavem yumi tumas. Long Baebol, hem i soem rod long man we i tanem tingting from ol sin blong hem. Taem man ya folem ol rod ya, Jeova i glad long hem mo Kristin kongregesen i tekembak hem. (Sam. 51:12, 17) Taem samting ya i hapen, Baebol i leftemap tingting blong yumi blong soemaot long man ya we i rili tanem tingting blong hem se yumi lavem hem.​—2 Kor. 2:​6-8.

I tru se yumi glad tumas taem wan memba blong famle no wan fren i kambak long kongregesen. Be nating se i olsem, i gud we yumi stap kwaet taem oli talemaot long kongregesen se man no woman ya i kam memba blong kongregesen bakegen. Wajtaoa blong Oktoba 1, 1998, pej 17, i talem se: “Be yumi mas tingbaot se bighaf blong kongregesen oli no save wanem nao i mekem se kongregesen i putumaot wan man mo wanem nao i mekem se kongregesen i agri long hem bakegen. Mo tu, maet rabis fasin blong hemia we i tanem tingting blong hem from sin blong hem, i mekem trabol long tingting blong samfala long kongregesen no mekem i soa long filing blong olgeta​—we maet i stap longtaem. From samting ya, i gud blong tingbaot filing blong olgeta ya. Olsem nao, taem oli talemaot se kongregesen i tekembak man ya we i tanem tingting blong hem, maet i moa waes blong talemaot sam tok blong welkamem hem taem i no gat narafala i stap we filing blong olgeta i trabol.”

Yumi harem gud tumas taem yumi luk wan man i kambak long trutok. Nating se i olsem, i no stret blong klapem han long taem we oli talemaot se kongregesen i tekembak hem.