!Yu Save Tekem Janis Blong Prij!
1. (a) ?Tekem janis blong prij i minim wanem? (b) ?Hamas man long miting ya, oli harem trutok fastaem from wan Witnes i tekem janis blong prij long olgeta?
1 ?Hamas man long kongregesen blong yu, oli kam long trutok from we wan Witnes i bin tekem janis blong prij long olgeta? Ating bambae yu sapraes long ansa blong kwestin ya. Tekem janis blong prij i min se yumi talemaot gud nius long ol man long eni ples, maet taem yumi tekem plen no sip blong go long narafala ples, yumi visitim ol fren mo famle, ol man raonabaot long yumi, taem yumi go long stoa, long skul, long wok mo plante narafala ples olsem bakegen. !Long wan grup blong 200 Witnes, 40 pesen blong olgeta oli lanem trutok afta we wan Witnes i tekem janis blong prij long olgeta! Fasin ya blong tekem janis blong prij i wan rod we i wok gud.
2. ?Wanem sam eksampol long Baebol long saed blong fasin ya blong tekem janis blong prij?
2 Plante taem, ol man blong talemaot gud nius long faswan handred yia oli tekem janis blong prij. Tingbaot Jisas taem hem i stap pastru long Sameria, hem i prij long wan woman we i kam blong kasem wota long wan wel we Jekob i digim bifo. (Jon 4:6-26) Filip i statem storian wetem wan haeman blong kwin blong Itiopia we i stap ridim buk blong Aesea. Filip i askem se: “?Olsem wanem? ?Yu yu save mining blong tok ya we yu stap ridim?” (Wok 8:26-38) Taem aposol Pol i stap kalabus long Filipae, hem i prij long man we i lukaot long kalabus. (Wok 16:23-34) Biaen, taem Pol i stap kalabus long wan haos, “hem i glad blong tekem olgeta we oli kam blong luk hem, oli kam long haos blong hem. Hem i stap talemaot we God i King, mo we olgeta man oli mas ona long hem, mo hem i stap tijim ol man long gud nius blong Jisas Kraes, Masta blong yumi.” (Wok 28:30, 31) Yu tu yu save tekem janis blong prij nating se yu yu stap sem. ?Olsem wanem yu save mekem samting ya?
3. ?Wanem i save halpem yumi blong winim fasin ya blong stap sem?
3 I Gud Yu Mekem Tingting Blong Yu i Strong: Plante long yumi i faenem se i had blong statem storian wetem ol man we yumi no save olgeta. Mo nating se yumi save wan man finis, samtaem yumi harem se i had blong talemaot trutok long hem. Be sipos yumi tingting dip long gud fasin blong Jeova, ol nambawan trutok we hem i givim long ol man blong hem, mo long ol trabol we i kasem ol man long wol, samting ya bambae i pulum yumi blong wantem talemaot trutok. (Jona 4:11; Sam 40:5; Mat. 13:52) Antap moa, yumi save askem long Jeova blong i ‘mekem tingting blong yumi i strong.’ (1 Tes. 2:2) Wan brata we i go long Gilead skul i talem se: “Plante taem mi luk se prea i halpem mi taem mi harem se i had long mi blong toktok long ol man.” Sipos yu fraet lelebet blong toktok, i gud yu mekem wan sotfala prea long Jeova long tingting blong yu.—Neh. 2:4.
4. ?Wanem mak we yumi save putum, mo from wanem?
4 Tekem janis blong prij i no min se yumi mas statem storian blong yumi wetem wan fastok we yumi rere finis long hem mo wan vas long Baebol. Maet wan gudfala rod hemia blong putum mak ya blong statem wan storian, we yumi no harem se yumi mas prij long man ya wantaem. Plante pablisa oli talem se taem oli statem wan storian olsemia, samting ya i mekem tingting blong olgeta i strong blong talemaot trutok long man ya taem storian i gohed. Sipos man ya i no wantem storian, yumi no mas fosem hem blong toktok. I gud we yumi finisim storian wetem kaen fasin mo yumi gohed.
5. ?Wanem i halpem wan Kristin sista we i stap sem, blong tekem janis blong prij?
5 Taem wan Kristin sista we i stap sem, i go long maket, hem i lukluk stret long man mo i smael long hem. Sipos man i smael long hem, ale hem i talem wan smol toktok long man ya. Sipos man ya i ansa gud long hem, samting ya i givim strong tingting long sista ya blong storian moa wetem hem. Sista i lesin gud long wanem we man ya i talem mo i traem blong luk se wanem haf blong gud nius, we man ya bambae i intres long hem. Long rod ya, sista i givimaot plante buk mo magasin, mo tu hem i statem Baebol stadi.
6. ?Olsem wanem blong statem wan storian taem yumi tekem janis blong prij?
6 Traem Statem Wan Storian: ?Yumi save talem wanem blong statem wan storian wetem man? Taem Jisas i stap storian wetem woman ya long wel, hem i statem storian blong hem taem i askem woman ya blong i givim wota blong hem i dring. (Jon 4:7) Taswe yu save statem wan storian taem yu talem halo long man no yu askem wan kwestin long hem. Taem yutufala i stap storian, maet yu luk wan janis we i stret blong yu tokbaot wan tingting blong Baebol long hem mo planem sid blong trutok long hat blong hem. (Pri. 11:6) Samfala oli askem kwestin we i pulum tingting blong man, blong hem i wantem save moa, nao hem i askem kwestin. Oli luk se taem oli mekem olsem, oli kasem plante frut long wok blong olgeta. Maet yu save mekem olsem taem yu stap wet blong luk dokta, ale yu save statem storian blong yu olsem, “Bambae mi glad tumas taem i no moa gat sik.”
7. ?Olsem wanem fasin blong luksave sam samting long saed blong laef blong wan man, i save halpem yumi blong statem wan storian?
7 Wan samting we i save givhan long yumi blong statem wan storian hemia taem yumi luksave sam samting long saed blong laef blong wan man no woman. Sipos yumi luk se wan papa no wan mama i gat ol pikinini we oli gat gudfala fasin, maet yumi save talem ol gudfala toktok long hem, mo askem long hem se, “?Wanem i givhan long yu blong tijim gud ol pikinini blong yu?” Wan sista i lesingud long samting we ol narafala long wok oli stap tokbaot mo i talemaot sam save we bambae oli intres long hem. Taem hem i faenemaot se wan woman long wok blong hem i stap plan blong mared, sista ya i givim wan Wekap! long hem we i tokbaot olsem wanem blong mekemrere wan mared. Long rod ya, sista ya i gat janis blong storian plante taem wetem woman ya long saed blong Baebol.
8. ?Olsem wanem yumi save yusum ol buk mo magasin blong statem storian?
8 Wan narafala rod blong statem wan storian, hemia blong ridim wan long ol buk blong yumi taem i gat narafala man i stap, we i save luk yumi. Wan brata i openem Wajtaoa no Wekap! long wan haf we i save pulum tingting blong man mo hem i stat blong ridim haf ya. Sipos hem i luk we narafala i stap lukluk long magasin we hem i ridim, ale, hem i askem kwestin long man ya no i tokbaot smol wanem we haf ya i tokbaot. Long rod ya, hem i save storian wetem ol man mo talemaot trutok long olgeta. Taem yumi livim wan buk no magasin blong yumi long ples we man i save luk, hemia i save pulum ae mo tingting blong olgeta we yumi wok wetem no skul wetem olgeta, blong oli askem kwestin long yumi.
9, 10. (a) ?Yumi save mekem wanem blong tekem janis blong prij long man? (b) ?Olsem wanem yu yu mekem samting ya?
9 Traem Mekem Se Yu Gat Moa Janis Blong Prij Long Man: Wok blong prij i impoten tumas naoia. From samting ya, yumi no mas wet blong tekem janis blong prij long man taem wan storian i kamaot olsem nomo. Defren olgeta, yumi mas lukaot evri rod blong talemaot trutok long man taem yumi mekem ol defren samting long laef blong yumi evri dei. I gud blong tingrere se wanem kaen man bambae yu mitim, mo tingbaot olsem wanem bambae yu statem wan gudfala storian wetem man olsem. I gud blong holem wan Baebol mo sam magasin, buk no traket wetem yu. Olsem nao, yu save seremaot olgeta long ol man we oli intres.—1 Pita 3:15.
10 Plante pablisa oli luk se taem oli tingting gud, i gat plante defren rod we oli save yusum blong tekem janis blong prij long man. Wan sista we i stap long wan stori haos we i gat sekiuriti blong hem, i go long rum we ol man long stori haos ya oli go long hem blong spel. Ale sista ya i plei long wan gem we hem i mas joenem ol smosmol pis kad blong mekem wan naesfala pija long saed blong ol samting raonabaot long yumi. Taem ol man oli stop mo talem se pija ya i naes, ale, sista ya i yusum janis ya blong statem storian wetem olgeta mo tokbaot promes blong Baebol long saed blong ‘wan niufala heven mo wan niufala wol.’ (Rev. 21:1-4) ?Yu save tingbaot sam samting we yumi save mekem blong yumi save tekem janis blong prij long moa man?
11. ?Olsem wanem blong mekem plan blong storian bakegen wetem man we i intres taem yu tekem janis blong prij long hem?
11 I Gud Yu Visitim Olgeta We Oli Intres: Sipos man we yu prij long hem i lesin gud, traem mekem wan plan blong yu save storian wetem hem bakegen. Sipos i stret, maet yu save talem long hem se: “Mi glad tumas blong storian wetem yu. ?Weples mi save faenem yu blong yumi save storian bakegen?” Samfala pablisa oli raetemdaon ples we oli stap long hem mo telefon namba blong olgeta mo oli givim long man ya, mo oli talem se: “Mi glad long storian blong yumitu. Sipos yu wantem save moa long saed blong wanem we yumi tokbaot, hemia telefon namba blong mi. Yu save ring long mi.” Sipos yu no save go visitim bakegen man ya we i intres, mekem plan blong ol brata sista long stret kongregesen, oli save visitim man ya. Hemia i min se yu mas fulumap pepa ya Please Follow Up (S-43) mo givim long sekretari blong kongregesen blong yu kwiktaem.
12. (a) ?Taem yumi tekem janis blong prij, from wanem yumi mas kaontem taem blong yumi? (b) ?Wanem ol gudfala frut we oli kamaot taem yumi tekem janis blong prij long man? (Lukluk bokis ya “!Ol Gudfala Frut We Oli Kamaot From Fasin Ya Blong Tekem Janis Blong Prij Long Man!”)
12 Taem yumi tekem janis blong prij long man, yumi mas kaontem taem we yumi spenem blong storian wetem hem. Hemia i min se yumi mas meksua se yumi kaontem taem blong yumi, nating sipos yumi storian sam minit nomo evri dei. Tingbaot samting ya: !Sipos evri pablisa long fulwol oli tekem janis blong prij long man, faef minit evri dei, bambae yumi bitim 17 milian aoa evri manis!
13. ?Wanem i mas pulum yumi blong tekem janis blong prij?
13 Yumi gat ol nambawan risen blong tekem janis blong prij long man. Hemia from we yumi lavem God mo ol man raonabaot long yumi. (Mat. 22:37-39) Yumi talem tangkiu long fulhat blong yumi long Jeova from ol gudfala fasin blong hem mo stamba tingting blong hem. Samting ya nao i pulum yumi blong wantem tokbaot ‘ol gudgudfala samting we hem i mekem long paoa blong hem olsem King.’ (Sam 145:7, 10-12) Naoia we i gat smol taem yet i stap, yumi tingbaot laef blong ol man raonabaot long yumi. Samting ya tu i pulum yumi blong tekem evri janis blong talemaot gud nius long olgeta. (Rom 10:13, 14) Taem yumi tingting gud mo reregud fastaem, yumi evriwan i save tekem janis blong prij mo kasem glad we i kamaot taem yumi talemaot trutok long wan man we hat blong hem i stret.
[Tok blong makem poen long pej 4]
Sipos yu putum mak ya blong talem halo long ol man mo statem storian wetem olgeta, samting ya bambae i givhan long yu
[Tok blong makem poen long pej 4]
Sam Tingting Blong Statem Wan Storian
◼ I gud yu prea blong kasem help blong statem wan storian
◼ Yu jusum ol man we oli kaen mo we oli no hareap tumas
◼ Yu lukluk man stret long ae blong hem, smael mo talem wan tok long saed blong samting we yu luk se hem i intres long hem
◼ Yu mas lesingud
[Tok blong makem poen long pej 5]
Plante pablisa oli luk se taem oli tingting gud, i gat plante defren rod we oli save tekem janis blong prij long man
[Bokis blong pija long pej 6]
!Ol Gudfala Frut We Oli Kamaot From Fasin Ya Blong Tekem Janis Blong Prij Long Man!
• Wan brata i karem trak blong hem i go long ples blong riperem trak. Taem hem i stap wet, hem i prij long ol man we oli stap raonabaot long hem mo i givim wan smol pepa long olgeta blong singaot olgeta i kam long pablik tok blong asembli. Long nekis yia biaen, long wan asembli, wan brata we hem i no save nating, i kam sekhan long hem olsem we tufala i savegud tufala. !Hemia wan long ol man ya we hem i givim smol pepa ya long olgeta long ples blong riperem trak! Man ya i bin go long pablik tok mo i askem blong gat wan Baebol stadi. Mo naoia hem wetem waef blong hem, tufala tugeta i baptaes.
• Wan sista we i lanem trutok from we wan Witnes i tekem janis blong prij long hem, i tekem janis blong prij long ol man long skul we trifala pikinini blong hem oli skul long hem. Hem i mekem skul ya i kam olsem wan spesel teritori blong hem. Long teritori ya, hem i save mitim ol man we oli laef raonabaot long hem mo ol papa mama tu we oli kam blong wet long ol pikinini blong olgeta mo we oli kam long ol miting we skul ya i gat wetem ol papa mama. Taem hem i talemaot nem blong hem finis long narafala, ale, hem i talem wan smol tok we i kamaot long hat blong hem, se hem i tinghae long Baebol olsem nambawan tul blong halpem hem blong tijim gud ol pikinini blong hem. Biaen hem i jenisim storian i go long wan narafala samting. Be from we hem i talem smol toktok finis long saed blong Baebol, hem i luk se i moa isi long hem blong tokbaot Baebol bakegen long wan narafala taem we oli storian. From rod ya we hem i folem, hem i halpem 12 man blong kam long trutok mo tekem baptaes.
• Taem wan man blong insurens i kam blong visitim wan sista, sista ya i tekem janis blong talemaot trutok long hem. Hem i askem long man ya sipos hem i wantem wan insurens we i givim gudfala helt long hem, i mekem hem i hapi mo i givim laef we i no save finis long hem. Man ya i talem yes mo i askem long sista se wanem kaen insurens ya we sista ya i stap tokbaot. Ale, sista ya i soemaot ol promes blong Baebol long man ya mo i givim wan buk long hem. Long wan naet nomo, man ya i finisim buk ya. Biaen hem i stat blong stadi Baebol. Hem i stat blong kam long ol miting mo biaen hem i baptaes.
• Wan sista i stap mekem wan trip long plen. Ale, hem i stat storian wetem woman we i sidaon klosap long hem mo i talemaot trutok long woman ya. Taem plen i foldaon, sista ya i givim adres mo telefon namba blong hem long woman ya mo i talem long woman ya blong askem wan Baebol stadi long nekis taem we wan witnes i pas long haos blong hem. Long nekis dei, tu sista i prij long woman ya long haos blong hem. Woman ya i stat blong stadi Baebol, i gohed gud, i baptaes mo smoltaem biaen, i statem 3 Baebol stadi.
• Wan olfala brata we i gat 100 yia blong hem mo we i blaen i stap long wan hospital blong ol olfala. Plante taem brata ya i stap talem se, “Yumi nidim Kingdom.” Tok ya i mekem se ol nes mo ol sikman oli wantem we hem i eksplenem long olgeta se wanem ya Kingdom. Wan long ol woman we i wok long hospital ya i askem long brata ya se bambae hem i mekem wanem long Paradaes. Brata ya i ansa se: “Bambae mi save lukluk mo wokbaot bakegen mo bambae mi bonem wiljea blong mi.” From we brata ya i blaen, ale, hem i askem long woman ya blong i ridim ol haf blong Wajtaoa mo Wekap! long hem. Woman ya i wantem karem ol magasin ya i gobak long haos, ale taem gel blong brata ya i kam visitim hem, woman ya i askem long gel ya sipos i save karem olgeta. Wan nes i talem long gel blong brata ya se: “Niufala samting we mifala i stap tokbaot long hospital ya hemia: ‘Yumi nidim Kingdom’”
• Wan sista i stap laen blong karem kakae long wan restoron. Ale, hem i harem wan grup blong ol olfala oli stap sidaon raon long wan tebel klosap, oli stap tokbaot ol samting long saed blong politik. Wan long olgeta i talem se gavman i no save winim ol problem blong yumi. Sista ya i stap tingting se, ‘Hemia janis blong mi ya.’ Sista ya i talem wan sotfala prea mo i go toktok long olgeta. Afta we hem i talemaot se hem i hu, hem i tokbaot wan gavman we bambae i finisim ol trabol blong man. Gavman ya hemia Kingdom blong God. Mo hem i givim wan buklet we hem i holem wetem hem. Long semtaem ya, man we i lukaot long restoron i wokbaot stret i kam long sista ya. Sista ya i stap tingting se, maet man ya bambae i talem long hem blong i aot long restoron. Be defren olgeta, man ya i talem long sista ya se hem i stap lesin taem sista ya i stap storian wetem ol man ya mo hem i askem sipos hem i save gat wan buklet tu. Wan woman we i wok long restoron ya, hem tu i stap lesin ale, hem tu i kam long sista ya mo wota blong ae blong hem i stap ron. Woman ya i wan Baebol studen fastaem mo hem i wantem blong stadi bakegen.