Ol Yangfala Oli Askem . . .

?Olsem Wanem Sipos Hem i Talem ‘No’?

FASTAEM, yu yu bin tingbaot hem olsem wan fren nomo. Be filing blong yu i stat jenis, mo yu stat laekem hem long wan spesel fasin. Maet kaen fasin blong hem i pulum yu, no maet yu laekem smael blong hem. Nating se i olsem wanem, taem i pas, be hem i no talem se hem i laekem yu. Ale, yu yu ting se i gud blong askem long hem sipos hem i wantem wan spesel fasin fren wetem yu. Yu yu askem long hem, be hem i talem ‘no’ long kaen fasin.a

Yu yu harem nogud tumas. Be yu no mas mekem wan krangke samting. Traem skelemgud bisnes ya. I tru, yangfala man ya i talem se hem i no wantem fren wetem yu. Be disisen blong hem i no mekem se yu yu nogud. Plante narafala oli lavem mo respektem yu. Maet yangfala man ya i tekem disisen ya, i no blong agensem yu, be from we hem i gat sam mak we hem wan i wantem kasem, no sam samting we hem i ting se oli moa impoten long laef.

Sipos yu yu wan Kristin, yu save tingbaot tu se ‘oltaem God i stap mekem i stret nomo. Mo hem i no save fogetem ol wok ya we yu yu mekem. Hem bambae i stap tingbaot we yu yu lavem hem.’ (Hibrus 6:​10) Sonjab i talem se: “Yu yu sas yet. Nating se yu no mared, Jeova i save yusum yu bigwan.” Yes, Hae God mo sam narafala oli tinghae long yu, taswe yu no mas ting se yu yu gud blong nating nomo.

Be maet yu harem yet se yu yu nogud mo se neva bambae i gat wan man we i wantem mared wetem yu. Be nating se yu no “stret” long yangfala man ya, maet yu “stretgud” long wan narafala man. (Jajes 14:3) Taswe, yu no mas ting se yu yu nogud from we traehad blong yu blong faenem wan hasban i no karem frut. I moagud blong tingbaot we traehad blong yu i bin givhan long yu long wan narafala rod: Yu Yu luksave se yangfala man ya i no stret long yu. ?From wanem mifala i talem olsem?

?Hem i Stret Long Mi?

Baebol i talem se hasban i mas “lavem woman blong hem, i mas lukaot gud long hem, olsem we i stap lukaot gud long bodi blong hem nomo.” (Efesas 5:​28) Mo Baebol i talem tu se ol hasban oli mas “ona” long woman blong olgeta. (1 Pita 3:7) Long saed blong yu, maet yangfala man ya i laekem yu olsem wan fren. Be taem hem i talem ‘no’ long yu, hem i soemaot se hem i no rere blong lavem yu mo ona long yu olsem woman blong hem. Hem i gat raet blong tekem disisen ya. Tingbaot: ?Sipos wan man i gat filing olsem, yu ting se bambae hem i wan gudfala hasban blong yu? !Traem tingbaot olsem wanem bambae yu harem nogud sipos yu mared long wan man we i no lavem yu mo i no tinghae long yu!

Naoia we hop blong yu blong fren wetem yangfala man ya i no kamtru, maet i gud blong lukluk bakegen long ol fasin blong hem. Ol drim blong yu oli save mekem se yu no bin luk ol slak fasin blong hem we ol narafala oli save luk, mo maet yu no bin makem sam poen long hem long saed blong spirit tu. Tingbaot: ?Hem i bin luksave se filing blong yu i stap kam strong no nogat? ?Hem i gohed blong joen wetem yu from we hem i wantem nomo blong pulum filing blong yu? Sipos i olsem, hem i no rere blong kam wan gudfala Kristin hasban we hem i tingbaot yu mo i kasem save long filing blong yu. I gud we yu bin faenemaot trutok ya, nating se yu harem nogud from.

Wan yangfala man i soemaot se Marcia i spesel, ale samting ya i pulum filing blong Marcia. Taem Marcia i askem long hem wanem filing blong hem, hem i talem se hem i tingbaot Marcia olsem wan fren nomo. ?Wanem i givhan long Marcia blong winim filing blong harem nogud? Hem i talem se: “Mi tingting wetem bren blong mi, i no wetem hat blong mi. Samting ya i givhan long mi blong winim filing blong mi.” Hem i tingbaot ol fasin blong gudfala hasban we Baebol i tokbaot, nao hem i luksave se yangfala man ya i no gat ol fasin ya. Samting ya nao i givhan long hem blong haremgud bakegen.

Wan yangfala man i talem ‘no’ long Andrea. Biaen, Andrea i luksave from ol fasin we boe ya i mekem long hem, se hem i no bigman long tingting blong hem. Andrea i luk se hem i no rere blong mared, mo Andrea i glad we Jeova i mekem hem i luksave samting ya. Hem i talem se: “Mi mi bilif se Jeova i save protektem yumi long samting we i save spolem yumi, be yumi mas trastem Hem.” Mo tu, i tru se plante yangfala man oli gat gudfala fasin nomo, mo maet oli talem ‘no’ from sam risen we oli gud nomo. ?Nating se i olsem, olsem wanem yu save winim filing blong harem nogud?

?Olsem Wanem Blong Haremgud Bakegen?

Maet hat blong yu i nidim taem blong kasemgud se hem i bin talem ‘no.’ Filing blong yu i bin gru sloslo, nao bambae i tekem taem blong lego ol filing ya. Yu no save lego ol filing blong lav wantaem nomo, olsem we yu kilim wan laet. !Maet long sam dei yu harem se ol filing ya bambae oli winim yu! Be yu no mas hareap. Letem taem i pas, nao ol filing ya tu bambae oli lus. Be sipos yu wantem lusum ol filing ya kwik moa, yu no mas letem wan samting i pulum olgeta blong oli kam strong bakegen.

Olsem nao, yu no mas tingting bakegen mo bakegen long evri wod mo fasin we yu bin mekem blong soemaot filing blong yu long yangfala man ya. Sipos yu tingting tumas olsem, maet bambae yu ting se hem i no rili minim ‘no,’ no maet bambae yu ting se wan narafala rod i save wok. Yu mas luksave se yu no save jenisim filing blong hem. Nating sipos yu bin jusum wan narafala rod blong talemaot filing blong yu long hem, ating bambae hem i talem ‘no’ yet.

Wan narafala trap, hemia blong drim. Maet yu drim se yutufala i save haremgud tugeta olwe. Ol drim ya oli save mekem yu yu haremgud, be oli no tru. Taem oli finis, yu yu harem nogud bakegen mo hat blong yu i soa. Yu mas traehad blong stopem fasin ya blong haremgud blong smoltaem, afta, harem nogud blong smoltaem. Sipos no, yu save stap longtaem we ol filing blong yu bambae oli olbaot nomo.

Yu mas traehad blong sakemaot ol drim long tingting blong yu. Taem yu stat drim, girap mo go wokbaot samples. Mekem wan wok we i save tanem tingting blong yu i go long wan narafala rod. Tingbaot ol samting we oli save mekem tingting blong yu i strong, i no ol samting we oli daonem tingting blong yu. (Filipae 4:8) Fastaem, samting ya i had, be sloslo, bambae yu winim faet ya mo bambae yu faenem pis.

Ol gudfala fren oli save leftemap tingting blong yu. (Ol Proveb 17:17) Be Sonja i givim woning ya: “I no naf blong joen wetem ol fren blong yu we oli no mared, we evriwan oli yangfala, mo we oli wantem mared. Yu yu nidim ol fren we oli olfala moa, we oli save givhan long yu blong skelemgud bisnes ya.” Mo yu no mas fogetem se i gat wan Man i stap we hem i save givhan long yu bitim ol narafala.

Jeova​—⁠Wan Fren We i Givhan

Long taem bifo, wan man blong Jeova i kasem wan traem we i mekem hem i harem nogud, nao hem i prea long Jeova blong i givhan long hem. ?Wanem i kamaot? Hem i raetem se: “Taem we mi mi wari, mo mi stap tingting tumas, oltaem yu mekem tingting blong mi i kam gud bakegen, yu stap mekem mi mi glad.” (Ol Sam 94:19) Sipos yu prea long Jeova wetem bilif, bambae hem i leftemap tingting blong yu mo i givhan long yu. Andrea i mekem olsem. Hem i talem se: “Prea i impoten tumas blong givhan long yu blong winim soa long hat blong yu mo blong gohed long laef.” Sonja tu i tokbaot prea, i se: “Prea i save givhan long yu blong tinghae long yu wan, nating se narafala i laekem yu no i no laekem yu.”

I no gat wan man long wol ya we i save kasem save fulwan long ol filing blong yu, be Jeova i save. Hem i wokem ol man mo woman blong oli wantem mared mo serem lav blong olgeta. Hem i save strong paoa ya long bodi blong man mo woman we i pulum tufala blong lavlavem tufala, mo hem i save olsem wanem blong kontrolem paoa ya. Hem i save givhan long yu blong winim soa we yu harem long hat blong yu, from we 1 Jon 3:​20 i talem se: “God i hae moa long tingting blong yumi, mo hem i save evri samting.”

Holem Stret Tingting

Mared i save givim bigfala glad, be i no mared nomo we i givim glad. Yumi kasem glad taem yumi mekem wok blong Jeova, mo i no ol mared man mo woman nomo we oli save mekem wok ya. Long sam fasin, olgeta we oli no mared oli gat moa janis from we oli no kasem “trabol long laef blong olgeta” olsem 1 Korin 7:​28 i tokbaot. Trabol ya i minim ol wari mo traem we oli kasem ol mared man mo woman. Mo tu, olgeta we oli no mared oli fri moa, nao oli save yusum laef blong olgeta fulwan long wok blong Jeova. Taswe, Baebol i talem se: “Sipos . . . boe i gohed, i mared, hem i mekem i gud. Be sipos . . . boe i stap nomo, i no mared, hem i mekem i gud moa.” (1 Korin 7:​38) Nating se yu wantem tumas blong mared, sipos yu tingting dip long ol tijing ya blong Baebol, yu save holem stret tingting mo haremgud long laef blong yu naoia.

Maet sam fren blong yu oli traem leftemap tingting blong yu, oli talem se: “Yu no wari, wan dei bambae yu faenem wan man we i nambawan.” I tru, from we wan man i no wantem yu, hemia i no min se bambae yu stap yu wan blong olwe. Be wan yangfala Kristin woman, Candace, i tingting olsem: “Mi mi rili trastem Jeova. Mi no ting se hem i mas givim wan hasban long mi blong mekem mi mi hapi. Be mi save se sipos mi no mared, bambae hem i givim samting we mi mi nidim blong tekem ples blong mared.” Gudfala tingting ya i givhan long hem blong winim tingting we i foldaon.

Long wol ya, traehad blong plante man mo woman blong fren tugeta i no wok. Be plante mared tu oli no wok. Sipos yu trastem Jeova mo yu obei long ol advaes blong hem, hem i save tekemaot filing ya blong harem nogud mo mekem yu yu glad. Yu save harem olsem King Deved we i raetem se: “[Jeova] yu yu save olgeta samting we mi mi wantem. Yu yu harem we mi stap krae from we mi harem nogud tumas. Be Hae God, mi mi trastem yu. Yu yu Masta blong mi, mo yu God blong mi, bambae yu harem krae blong mi.”​—⁠Ol Sam 38:​9, 15.

[Ol futnot]

[Tok blong pija long pej 30]

Haremgud long help we God i stap givim