Miusik—Presen Blong God We i Gat Bigfala Paoa Long Hat Blong Yumi

MAN BLONG WEKAP! LONG SPEN I RAETEM STORI YA

MIUSIK i gat bigfala paoa. Hem i save kwaetem tingting blong yumi, i save wekemap filing blong yumi, mo i save mekem yumi glad. Miusik i save soemaot glad blong yumi, mo i save soemaot soasore blong yumi. Klosap evri laen blong man, bifo mo tede tu, oli gat miusik blong olgeta. Yes, miusik i olsem wan lanwis we i toktok i go long tingting mo hat blong yumi. Hem i rili wan presen we i kamaot long God.—Jenesis 4:21.

Stat long taem we yumi jes bon, ating yumi stap harem miusik finis. Ating mama blong yumi i bin singsing long yumi blong mekem yumi slip. Taem yumi kam yangfala, ating yumi laekem miusik we i wekemap ol filing long hat blong yumi. Mo taem yumi kam bigman, plante long yumi i haremgud yet blong lesin long miusik we i mekem tingting blong yumi i kwaet, maet long en blong wan bisi dei, no taem yumi stap ron long trak.

Ol tok blong wan singsing i save soemaot sam samting long saed blong kalja no histri blong wan kantri. Ol man Isrel bifo oli singsing blong makem sam spesel taem. (Eksodas 15:1-21; Jajes 5:1-31) Profet Moses i wokem wan singsing we i tokbaot sam samting long histri blong ol man blong God, mo i givim gudfala advaes tu we i kamaot long hat blong hem. (Dutronome 32:1-43) Ating ol singsing ya oli givhan gud long ol man, blong oli holem ol tok ya blong hem i stap long tingting blong olgeta.

!Yu Yu Save Mekem Miusik!

Maet yu stap tingting se, ‘Mi mi no save mekem miusik.’ Be traem tingbaot voes blong yu. From we voes blong yumi i save mekem plante defren saon, klosap yumi evriwan i save mekem miusik, nating se yumi no gat wan gita no kibod blong plei long hem. Yu nidim nomo blong openem maot blong yu mo singsing. Mo taem yu mekem olsem, yu no mas wari sipos miusik we i kamaot i narakaen lelebet. Sipos yu praktis, ating bambae yu kamgud moa.

Wan buk we oli raetem long lanwis blong Spen (Psychologies) i talem se: “Voes blong yumi i joen stret wetem stamba blong ol dip filing blong yumi, mo i no gat wan narafala instramen we i save soemaot ol filing ya olsem voes blong yumi.” Wan woman blong singsing, nem blong hem Ainhoa Arteta, i talem se: “[Taem yumi singsing] yumi harem se yumi glad. Mi mi ting se i gud we taem yumi wantem singsing blong soemaot filing blong yumi, yumi no mas fraet, yumi letem voes blong yumi i kamaot olsem yumi wantem nomo.”

From we miusik i save gat bigfala paoa long hat blong yumi, i gud we yumi jusumgud ol miusik blong yumi. Wan singsing we i naes tumas i save gat ol tok long hem we i nogud we i nogud. Maet hem i givim tingting se i oraet nomo blong no laekem nating narafala man, blong mekem rabis fasin long saed blong seks, mo blong faet. Wan man we i wantem mekem God i glad i no save lesin long ol kaen miusik olsem. (Efesas 4:17-19; 5:3, 4) Tok blong God i talem se: “Samting we yu mas lukaot moa long hem i bitim ol narafala samting, hemia hat blong yu. Yu mas blokem ol samting we oli save kam spolem hat blong yu, from we hat hem i stamba blong laef.” (Ol Proveb 4:23, NW) Yes, i impoten tumas we yumi jusumgud miusik blong yumi.a

Gudfala Miusik i Save Givhan Long Helt Blong Yumi

Wan buk (Principles and Practice of Stress Management) i talem se: “Klosap olgeta laen blong man oli gat miusik blong olgeta. Wan risen blong samting ya, hemia from we miusik i gat paoa blong givhan long helt blong man mo mekem man i haremgud.” Wan narafala buk i talem se, taem yumi singsing, evri haf blong bodi blong yumi i kam fulap long saon mo i seksek smol. Taem hem i seksek olsem, ol haf insaed long bodi oli no moa taet, oli kam slak, mo maet samting ya i givhan blong mekem sobodi i lus.

Taswe sam dokta oli talem long ol man we oli wari mo bodi blong olgeta i taet tumas, se oli mas lesin long miusik we i kwaet mo slo nomo. Miusik olsem i save mekem olgeta oli glad tu. Long sam hospital, i gat miusik i stap plei long spesel rum ya blong man we i sik tumas. Miusik i mekem i gud tu long ol bebi we oli bon bifo long stret taem blong olgeta, mo long ol man we dokta i katem olgeta. Buk ya (Principles and Practice of Stress Management) i tokbaot sam stadi we ol man oli mekem, nao oli faenemaot se miusik we i kwaet mo i slo i save “mekem se taem dokta i stap katem man, blad blong man ya i no kam fulap tumas long ol homon we bodi i wokem taem man i fraet mo i wari.”

Miusik i mekem i gud long ol woman we oli stap bonem pikinini tu, from we i mekem se oli no taetem olgeta tumas. Plante dokta blong tut oli mekem miusik i plei long ples blong pulum tut, nao ol man oli no fraet tumas blong kam luk olgeta. Be miusik mo singsing i save mekem plante moa samting yet. Hem i save givhan long yumi blong kam klosap moa long God.

‘Mi Stap Presem God Long Ol Singsing Blong Glad’

Sipos yumi seraotem Baebol i go long ten haf, wan long ol haf ya hem i ol singsing nomo. ?Yu yu save samting ya finis? Ol buk we oli fulap moa long ol singsing, hemia Ol Sam, Sing blong Solomon, mo Ol Krae. Yumi no sapraes se bighaf blong ol 300 ples we Baebol i tokbaot singsing, oli joen wetem wosip blong God. King blong Isrel, Deved, we hem i gat gudhan blong plei miusik mo wokem ol singsing, i talem se: “[Jeova] i paoa blong mi . . . Mi mi stap presem hem, long ol singsing blong glad.”—Ol Sam 28:7.

Long Jerusalem, Deved i bin jusumaot 4,000 man long laen blong Livae, blong oli plei miusik mo singsing. Long olgeta, i gat 288 we “oli kasem trening blong mekem singsing i go long Jeova, olgeta evriwan we oli nambawan long wok ya.” (1 Kronikel 23:4, 5; 25:7, NW) I klia se ol man ya oli mas praktis oltaem. Yes, miusik i impoten tumas long wosip blong olgeta, taswe ol man long kwaea oli no nidim blong mekem ol narafala wok long haos blong God, oli fri nomo blong gohed blong lanem ol singsing blong olgeta.—1 Kronikel 9:33.

Long naet bifo we Jisas i ded, hem wetem ol aposol blong hem oli singsing blong presem God, ating oli singim Ol Sam 113 kasem 118. Long taem blong Jisas, taem ol man oli mekem lafet blong Pasova, oli singim ol Sam ya we oli kolem “Ol Halel Sam.” (Matiu 26:26-30) Nem ya “Ol Halel Sam” i stap joen wetem tok ya “Haleluia” we oli talem bakegen mo bakegen long ol singsing. “Haleluia” i minim “Presem Ja,” mo nem ya “Ja” i sot nem blong God ya we i antap olgeta, Jeova. Ol man blong raetem Baebol oli yusum sot nem ya long plante naesfala vas we oli wokem.—Ol Sam 83:18, NW.

Ol faswan Kristin tu oli singsing taem oli wosipim God. Wan buk (The History of Music) i talem se: “Ol faswan Kristin oli singsing taem oli mekem wosip tugeta no olgeta wanwan. Folem kastom blong ol man Jiu, oli mekem singsing long ol haos prea blong olgeta, mo taem oli kam Kristin oli gohed yet long fasin ya . . . Ol man we oli joen long niufala bilif ya oli singim ol Hibru Sam . . . , mo oltaem oli stap wokem ol niufala singsing blong presem God.” Tede tu, ol Kristin Witnes blong Jeova oli laekem tumas blong singsing presem God, olgeta wanwan, mo taem oli joen wanples long ol Kristin miting blong olgeta.

Yumi save soemaot klosap evri filing blong yumi tru long miusik, mo hem i gat bigfala paoa tu long hat, tingting, mo bodi blong yumi. From samting ya, yumi mas gat bigfala respek long ‘presen ya we i nambawan, mo we i kamaot long heven nomo.’ (Jemes 1:17) Yes, i gud yumi yusum presen ya oltaem mo long waes fasin.

[Futnot]