Wan Giaman Fren
Ating yu yu gat wan “fren” we yutufala i save yutufala taem yutufala i yangfala nomo. Fren ya i bin mekem yu yu harem olsem we yu bigman finis, mo i halpem yu blong yu joen gud wetem ol narafala fren blong yu. Taem yu harem nogud no yu wari, oltaem hem i “mekem yu yu harem gud” bakegen. Yes, yu dipen long hem blong i givhan long yu long plante haf blong laef blong yu.
Be taem i pas, nao yu faenemaot sam nogud samting long saed blong hem. Hem i wantem stap wetem yu oltaem, nomata se sam narafala fren blong yu oli no wantem se hem i stap taem oli kampani wetem yu. Yu yu mekem plante samting blong spolem helt blong yu from we fren ya i mekem yu yu harem se yu bigman finis. Antap long samting ya, hem i stilim haf pei blong yu.
I no longtaem i pas, yu traem blong no moa fren wetem hem, be hem i no wantem lego yu. Hem i kam olsem masta blong yu. Yu harem nogud, yu stap tingting se i moagud sipos yu no bin mitim hem fastaem.
HEMIA nao kaen fasin fren we ol man blong smok oli gat wetem sigaret. Wan woman we nem blong hem Earline i smok blong 50 yia, nao hem i tingtingbak, i se: “Long taem ya, sigaret i halpem mi moa i bitim sipos mi gat wan fren we i stap wetem mi. Sigaret i no jes wan olfala fren, be samtaem hem i wan fren ya nomo we mi mi gat.” Be Earline i luksave se sigaret i wan giaman fren, yes hem i wan enemi stret. Ol tok we yumi ridim antap oli stret long Earline. Wan samting nomo i defren, hemia se, taem Earline i lanem se fasin blong smok i nogud long ae blong God from we i save spolem bodi we God i givim long yumi, hem i no moa smok.—2 Korin 7:1.
Wan man we nem blong Frank, hem tu i wantem lego smok blong i save mekem God i glad. Be wan no tu dei afta we hem i tekem laswan sigaret blong hem, hem i sek we i stap wokbaot fo leg aninit long haos blong hem, we i wan floahaos, i stap lukaot ol haf sigaret we oli foldaon i go aninit. Frank i talem se: “Long taem ya nao mi mekem desisen blong mi blong lego smok. Taem mi luk we mi wokbaot fo leg mo mi stap karemaot ol doti blong traem faenem ol haf sigaret, mi luk se mi go bitim mak olgeta. Stat long taem ya, mi no moa smok bakegen.”
?From wanem i no isi blong lego smok? Ol man we oli stadi long saed blong smok tabak, oli faenemaot sam risen from wanem i olsem: (1) Tabak i wan samting we i save pulum man blong kam slef blong hem olsem ol drag. (2) Nikotin we man i pulum long sigaret i save kasem bren long seven seken nomo. (3) Smok i save kam wan haf blong laef blong man from we plante man oli smok long taem blong kakae, dring, storian, taem oli wari, mo long narafala taem tu.
Nating se i olsem, eksampol blong Earline mo Frank i soemaot se, man i save lego fasin ya blong smok. Sipos yu yu wan man blong smok mo yu wantem lego, i gud yu ridim ol haf we oli kam biaen. Maet oli givhan long yu blong statem wan niufala fasin blong laef.