?Taem Man i Pua We i Pua Tumas, Laef Blong Hem i Olsem Wanem?
TAEM man i pua we i pua tumas, hem i save lusum laef blong hem from. Man we i pua we i pua tumas, i min se hem i no gat inaf kakae, wota mo faeawud. Mo tu, man i no gat gudfala ples blong slip, i no kasem tritmen long hospital mo i no skul. Wan bilian man oli pua we oli pua tumas. Namba ya i klosap sem mak long fulnamba blong ol man we oli laef long Not mo Saot Amerika. Nating se i olsem, bighaf blong ol man we oli laef long ol kantri olsem long Wes Yurop mo Not Amerika, oli neva save se man we i pua we i pua tumas i olsem wanem. Naoia bambae yumi ridim toktok blong samfala we oli pua we oli pua tumas.
Mbarushimana i laef long Ruwanda, long Afrika, wetem waef blong hem mo faef pikinini blong tufala. Namba sikis pikinini blong tufala i kasem malaria mo i ded. Mbarushimana i talem se: “Mi mo ol brata sista blong mi, mifala evriwan sikis. Papa blong mi i mas seraotem graon blong hem long mifala evriwan. Graon we Papa i givim long mi i smol tumas, mekem se mi mo famle blong mi i mas muv i go long wan taon. Mi mo waef blong mi, mitufala i wok, mo wok blong mitufala i blong karem ol bag ston mo ol bag sanbij. Haos blong mifala i no gat windo long hem. Mifala i stap go karem wota blong mifala long wan wel we i stap long stesen blong polis. Mifala i kakae wan taem nomo long dei, be taem mifala i no gat wok, mifala i no kakae long ful dei. Long taem olsem, mi aot long haos from we mi no wantem harem ol pikinini oli stap krakrae from we oli hanggri.”
Victor mo Carmen tufala i mekem wok ya blong riperem ol sus. Tufala i laef long kantri blong Bolivia, long wan taon we i stap longwe long ol narafala taon. Tufala i gat faef pikinini. Rum we tufala i rentem i stap long wan haos we brikis blong hem oli wokem long sofmad, be haos ya i brokbrok, i lik, mo i no gat lektrik long hem. Long skul blong ol pikinini, ol klasrum oli fulap gud, mekem se gel blong Victor i no moa gat wan tebol blong hem. Ale, Victor i mas mekem wan tebol blong gel ya, olsem nao, hem i save go long skul. Victor mo waef blong hem tufala i mas wokbaot 10 kilometa blong go katem faeawud, blong oli save kukum kakae mo boelem wota blong dring. Carmen i talem se: “Mifala i no gat toelet. Taswe, mifala i mas go long reva ya we mifala i stap yusum blong swim mo tu blong sakem doti long hem. Plante taem ol pikinini blong mitufala oli sik.”
Francisco mo Ilídia tufala i stap long kantri blong Mosambik, long wan ples afsaed long taon. Long ol faef pikinini blong tufala, wan i ded from we hem i kasem malaria mo i no gat ples long hospital, blong hem i save slip mo kasem tritmen blong sik ya. Tufala i planem raes mo kumala long smol graon blong tufala, olsem nao oli save gat kakae blong tri manis. Francisco i talem se: “Samtaem, mifala i no moa gat kakae from we i no gat naf ren, mo ol stilman oli stilim kakae blong mifala. Taem i olsem, mi katem bambu mo mi salem long ol man we oli stap mekem haos, ale mi winim smol mane blong mifala. Mo tu, mifala i mas wokbaot tu aoa blong go karem faeawud long bus. Mi mi karem wan bandel faeawud mo waef blong mi tu i karem wan bandel, from we wan i blong kuk long wik mo wan i blong salem.”
Plante man oli harem olsem se i gat wan samting i rong mo i no stret long wol ya. Hemia from we 1 long evri 7 man oli laef olsem Mbarushimana, Victor, mo Francisco, be plante milian narafala oli harem gud from we oli gat plante samting long laef blong olgeta. Samfala oli traem mekem sam samting blong stretem trabol ya. Long haf we i kam biaen, bambae yumi tokbaot wok we oli mekem mo ol plan blong olgeta.
[Tok blong pija long pej 3]
Carmen mo tu pikinini blong hem, oli stap kasem wota long wan reva