Talemaot Gud Nyus—Yusum Gud Ol Traket
1 Long 1987, Sosaete i wokem 4 nyufala traket long Bislama—From Wanem Yu Yu Save Bilif Long Baebol; ?Wanem Bilif Blong Ol Wetnes Blong Jeova?; Laef Long Pis Blong Nyufala Wol; ?Olsem wanem long ol Fren Blong Yumi We Oli Ded? ?Olsem wanem? ?Yu yu stap yusum gud olgeta long wok blong prij?
2 Plante pablisa i putum ol traket aninit long doa taem oli no faenem man long haos. Mo tu oli givim olgeta long ol man we oli bisi tumas, nao oli no save lesin long olgeta. Samfala i talem se taem oli yusum wan traket blong mekem ol faswan tok blong olgeta, samting ya i halpem olgeta blong pulum tingting blong ol man. Sam narafala pablisa oli givim olgeta long ol man we oli no tekem wan buk no wan magasin, be oli intres long trutok yet.
Wetaem Mo Olsem Wanem Blong Yusum Olgeta
3 Sipos yumi rere blong holem olgeta jans blong givim olgeta, bambae yumi save mekem wan gudfala wok. Yumi save yusum olgeta blong talemaot gud nyus long ol famle blong yumi, taem yumi go spel sam ples, taem yumi go long stoa, no long wok blong yumi. Ol pikinini oli save yusum olgeta taem oli go long skul. Yu yu save karem sam traket wetem yu, long basket no long poket blong sot blong yu. Sipos yu gat sam traket wetem yu, samting ya i save pulum yu blong holem plante jans blong prij long ol man. Yes, yu tu yu save traem faenem sam jans blong givimaot traket.
4 Yumi save yusum ol traket blong givim wan gudfala wetnes. I tru we ol tok blong ol traket oli sot nomo, be oli klia mo oli stanap long ol tok blong Baebol. Oli gat sam naes pija long olgeta, mo oli save givhan gud long yumi long wok blong prij. From samting ya, yumi mas holem kwik ol jans blong givim olgeta long evri ples.
Long Wok Blong Prij
5 Ol traket ya oli pulum ol man blong tingtinggud. Taswe, taem yu yu stap long wok blong prij, yu yu save yusum gud olgeta blong pulum tingting blong ol man long mesej blong Kingdom. Sam pablisa oli soemaot nem blong traket ya long ol faswan tok we oli mekem. Yu tu, traem mekem olsem. Yu save talem se: “!Halo! Mi mi glad blong faenem yu long haos blong yu. Mi mi stap talemaot wan mesej we i nambawan. Hem i stap insaed long traket ya, nem blong hem Laef Long Pis Blong Nyufala Wol. Traket ya i blong yu. Hem i fri nomo. [Givim long man, mo pulum tingting blong hem long pija] ?Ating yu tu, yu wantem laef long wan ples we i kwaet olsemia?” Sipos man i letem yu yu mekem, yu save gohed mo talemaot stampa tok blong prij, mo soemaot ol buk blong manis.
6 Plante taem i stret blong talem se mesej blong yu i stanap long Baebol. Ating traket ya From Wanem Yu Yu Save Bilif Long Baebol i save halpem ol man long ples blong yu. Yu save talem se: “Tede, mifala i stap givim tok ya we i stanap long Baebol. Hem i fri nomo. Hemia i blong yu. [givim hem i go] Yu save luk se hem i tokbaot Baebol. ?Wanem tingting blong yu? ?Yu ting se ol man tede oli no moa trastem Baebol? [Letem man i ansa] Bambae traket ya i save halpem yu blong luksave from wanem yu yu save trastem ol tok blong Baebol.” Ale, yu save talem stampa tok blong prij, mo storebaot ol blesing we Jeova i wantem givim long ol man.
7 Plante pablisa oli traem finis blong givim ol traket, mo oli faenem we oli halpem olgeta bigwan blong talemaot “gud nyus.” (Mat. 24:14) Ol traket oli halpem yumi long wok blong prij long ol haos, mo taem yumi wantem holem wan jans blong prij. Taswe yumi mas yusum gud olgeta blong talemaot Kingdom blong God long ol man.