Jeova i Stap Tijim Yumi
1 Profet Aesea i talem se: “Hae God Jeova hem wan i givim tang long mi olsem tang blong olgeta we hem i tijim, blong mekem mi mi naf blong givim ansa long man we i taed.” (Aes. 50:4) Blong mekem olsem, Jeova i gat fulap rod, be wan long ol rod we hem i yusum, hemia Tiokratik Skul. Long Theocratic Ministry School Guidebook pej 38, i gat ol tok ya: “Nating se yufala i mekem wan samting plante taem finis, be i moa gud we yufala i rere bifo we yufala i mekem samting ya bakegen.” Nating se yumi joen long skul ya sam manis i pas nomo no yumi joen long hem stat long 1943, dei we skul ya i kamaot, be advaes ya i stret long yumi wanwan.
2 Olgeta we oli mekem tok long skul ya oli mas rere gud fastaem. Oli no mas bitim taem we oli gat blong mekem tok blong olgeta. Ol tok long saed blong program blong Tiokratik Skul oli talem klia se: “Wan tok i no save bitim stret taem blong hem.” Sipos wan brata we i mekem tok namba 1 i bitim taem oltaem nomo, bambae brata we i lukaot long skul i save go luk hem mo hem i save givim advaes long hem. Brata we i lukaot long Tiokratik Skul, hem tu hem i mas statem miting ya long stret taem mo hem i mas respek long taem we hem i gat blong givim ol advaes.
3 Yumi evriwan i save win bigwan from “Ol Poen Blong Baebol Riding.” Fasin blong talemaot ol poen we i stap long riding i no naf. Brata we i mekem tok ya i mas soemaot long olgeta long kongregesen from wanem mo olsem wanem ol poen we oli stap long riding ya oli gudfala poen.
4 Ol sista oli yusum plante smol store blong mekem tok namba 3, be maet samfala oli laenap long tok blong olgeta, i bitim sam narafala. Tiokratik Skul i blong givhan long yumi blong talemaot trutok long fasin we i stret mo klia. Taswe i moa gud we smol store blong tok blong yumi i kamaot long wok blong prij, no taem wan pablisa i holem wan jans blong prij.
5 Sipos tok namba 4 i stanap long ol haf blong buk Young People Ask—Answers That Work, bambae ol yangfala no ol nyufala studen oli mekem tok ya. I klia we studen we i mekem tok ya i mas save rid. Ol haf we ol studen oli wok long hem bambae oli jenis evri wik, wan wik oli kamaot long buk Young People Ask mo narafala wik long Reasoning buk. Blong mekem tok namba 3 mo tok namba 4, studen i mas yusum stampa tok we i stap long program blong skul.
6 Yumi mas lukaot gud taem we yumi ademap sam narafala poen bakegen long ol tok blong yumi. Maet yumi gat wan no tu haf nomo blong tokbaot. Be nating, yumi save mekem gudfala tok long ol poen ya. Mo yumi save finis long stret taem sipos yumi ridim ol vas mo yumi eksplenem olgeta, yumi yusum ol pija tok, mo sam samting olsem. Plante taem yumi no gat nid blong tokbaot ol narafala poen we oli no stap long pepa blong skul. Olgeta we oli lesin long yumi oli mas gat rod blong folem ol tok blong yumi long buk ya we tok blong yumi i stanap long hem.
7 God we yumi wosip long hem i olsem wan springwora we i ron olwe nomo, waes mo save blong hem i bigfala tumas, i bitim mak. (Rom 11:33) Sipos plante taosen yia oli pas, be bambae yumi nidim yet blong save long sam moa samting bakegen. Sipos yumi wok had blong kasem waes blong God, bambae tingting blong yumi i strong moa blong leftemap nem blong Papa blong yumi long heven, bambae yumi nafgud blong winim olgeta trabol we yumi kasem long laef, mo bambae yumi harem gud mo yumi glad oltaem. Taswe, bambae yumi joen oltaem long Tiokratik Skul mo bambae yumi mas wok strong blong kasem gudfala frut from rod ya we Bigfala Tija blong yumi i yusum blong givhan long yumi. Bambae yufala i kasem mak ya long 1991 sipos yufala i rere gud mo yufala i joen oltaem long Tiokratik Skul.