Statem Toktok Taem Yu Mekem Visit
1 Blong gat gudhan blong statem toktok wetem wan man we i soem intres finis, traem yusum ol samting we yu bin tokbaot wetem hem finis. Bigfala tingting se yu wantem givhan long man ya blong luksave gudfala save mo buk we yu bin livim wetem hem.
2 Tekem taem blong mekemrere bifo yu mekem visit. Jusum ol tok we oli stap long buk blong mekem man i intres. Traem gat fasin luksave blong faenemaot wanem samting yu mas toktok wetem man ya mo hamas haoa yu save stap wetem hem. I gud blong tokbaot wan no tu poen nomo, mo sipos hem i soemaot sam intres yu save gohed moa. Tingbaot ol stampa tok ya:
3 ?Hu ya oli stap talem se oli speret blong dedman? Tok ya i stanap long Jenesis 6:1, 2 mo Jud 6, olsem we buklet ya Speret Blong Ol Dedman i eksplenem mo i soemaot pija long pej 8.
Yu save statem tok olsem se:
◼ “Taem mi kam visitim yu fastaem, yumitu bin tokbaot poen ya se ol speret oli no stap laef mo ded long wol ya. Be mi askem wan kwestin long yu blong yu stap tingbaot, se: ?Hu ya oli stap talem se oli speret blong dedman? Mi glad blong kambak mo tokbaot smol wetem yu long ansa we i kamaot long Baebol.”
4 Wanem samting yumi mas mekem blong save laef aninit long Kingdom blong God. Yu save yusum Jon 17:3 blong tokbaot stampa poen ya, olsem we buklet ya Speret Blong Ol Dedman long pej 23-27 i eksplenem.
Long stat yu save talem se:
◼ “Mi glad long storeyan blong yumitu long promes ya blong God blong finisim rabis fasin. [Askem long man blong tekem buklet blong hem Speret Blong Ol Dedman.] Wan kwestin we yumi wanwan i mas wari long hem se: ?Wanem samting yumi mas mekem blong harem gud taem jenis ya i kamaot? Makem tok blong Jisas we hem i talem long Jon 17:3, olsem we i stap long buklet blong yu long pej 25.”
5 ?Wanem samting yumi nidim we bambae oli kamtru long Paradaes long wol? Yu save yusum wan long olgeta vas ya, Sam 65:9-13 mo 72:16 no Daniel 7:13, 14. Ol tok we i laenap wetem ol vas ya i stap long buklet ya Speret Blong Ol Dedman long pej 30-31.
Maet yu save statem tok blong yu olsem se:
◼ “Taem mi kam long ples ya long [givim dei], yumi bin tokbaot promes ya blong God se, Pikinini blong hem i save mekem ol man we oli ded finis oli laef bakegen long Paradaes long wol. ?Wanem sam long ol gudfala samting we yumi save harem gud long hem long taem ya? Buklet blong yu i soemaot sam vas blong Baebol we oli tokbaot sam blong ol blesing ya.” Yusum ol tok we i stap antap, ridim wan no tu vas long Baebol mo yusum ol tok we i kamaot long buklet long pej 30-31.
6 Plante man oli soemaot intres long mesej blong Kingdom taem yumi stap prij. Yumi makem se ol man oli glad long storeyan long Baebol we yumi stap mekem wetem olgeta. Taswe, yumi mas visitim olgeta we oli soemaot intres, mo traem tijim trutok long olgeta.—Mat.10:11; 28:19, 20; Jon 21:17; Rev. 22:17.