?Yu Wan Nomo Long Famle Blong Yu We Yu Stap Long Trutok?

¹ !Hem i wan bigfala blesing taem yumi luk we ful famle oli stap mekem wok blong Jeova! Be i no evriwan we i stap long wan fasin blong laef olsem we i gat glad long hem. Plante brata mo sista blong yumi oli wan nomo long famle blong olgeta we oli stap mekem wok blong Jeova. Yumi mas leftemap olgeta from gud eksampel we oli stap soemaot long fasin blong holemstrong mo stanap strong longtaem long trutok.​—⁠2 Tes. 1:⁠4.

² Ol papa mo mama: ?Long kongregesen blong yufala i gat sam sista we oli gat pikinini be hasban blong olgeta oli no stap long trutok, no we oli agensem olgeta? Wan mama i raetem se: “Mi mas wok blong winim kakae blong famle​—⁠mi mas go long stoa blong pem evri samting, klinim haos, kuk, somap, mo lesin long ol problem blong ol pikinini blong mi,” antap moa mi mas tekem ful famle i go long ol miting mo long wok blong prij. Yes, i stret nomo blong yumi talem sam gudfala toktok blong givhan long olgeta, mo tu blong yumi halpem olgeta.

³ ?Yumi save mekem wanem blong halpem olgeta? Sam yangfala pablisa oli save mekem fren wetem ol pikinini we sam nomo long famle blong olgeta oli stap long trutok, blong oli joen wetem ol gudfala fren. Ol pablisa we oli gat ekspiryens oli save givhan blong mekem Baebol stadi wetem ol pikinini ya mo halpem olgeta blong goaot oltaem long wok blong prij. Wan famle i rere blong halpem wan sista we hasban blong hem i no stap long trutok. Sam taem afta, wetem kaen fasin, famle ya i invaetem hasban blong sista ya blong joen long sam wok we olgeta long kongregesen oli joen blong mekem raonabaot long Haos Kingdom. Samting ya i mekem se hasban blong sista ya i agri blong stadi Baebol mo hem i kam pablisa we i givim laef blong hem long God mo i tekem baptaes.

⁴ Ol yangfala pablisa: Plante long ol yangfala pablisa blong yumi, oli wan nomo long famle blong olgeta blong stap long trutok. Nating se i gat strong kastom blong famle mo ol strong tok blong leftemap fasin blong go long yunivesiti, wan yangfala brata long kantri blong Is i stanap strong long tingting blong hem blong mekem paenia. From gudfala eksampel blong hem, yangfala sista blong hem tu i akseptem trutok mo naoia tufala tugeta i stap mekem paenia.

⁵ Ol yangfala pablisa we ol papa mama blong olgeta oli no stap long trutok oli nidim help we i save lidim olgeta, long saed blong speret mo bodi. Plante we oli olfala moa oli kaen blong soem se oli intres long ol yangfala ya wanwan, mo oli kam olsem ol papa mama blong olgeta long saed blong speret. Long saed blong wan yangfala Baebol studen, wan famle i raetem se: “Mifala i leftemap tingting blong hem blong prea, blong yusum ol rul blong Baebol long laef blong hem, blong hem i save gat moa respek mo gat longfala tingting long papa mama blong hem.” Famle ya i givhan long hem blong go long wan intenasnal asembli mo naoia hem i stap gohed mo stap long rod blong tekem baptaes.

⁶ Ol oldfala no ol handikap: Yumi gat fasin tangkyu tu long ol olfala no ol handikap we oli stap long kongregesen nating se oli no prij tumas. Sipos yu wan long olgeta ya, mifala i wantem talem long yu se fasin blong yu blong stanap strong mo holemstrong long wok blong God, i mekem bilif blong mifala i kam strong.​—⁠Prov. 16:⁠31.

⁷ Plante olfala no olgeta we oli handikap oli bin yusum yangfala taem mo paoa blong olgeta long wok blong Jeova, mo naoia ating oli stap olgeta nomo. Yumi no wantem fogetem olgeta naoia. Sipos yu spenem smoltaem nomo wetem olgeta bambae oli glad tumas from. Be tu, maet yumi save halpem olgeta taem yumi go blong pem sam samting blong olgeta long stoa mo sam narafala samting, no tekem olgeta i go long miting mo long wok blong prij. Wan famle i givhan long wan olfala wido we pikinini blong hem, hemia wan nomo we hem i gat, i ded. Long semtaem we oli stap givhan long hem blong haremgud long saed blong bodi, oli halpem hem tu long sam bisnes we hem i mas stretem long saed blong loa.

⁸ Sipos yu wan nomo long famle blong yu we yu stap long trutok, mifala i wantem talem bakegen long yu se mifala i kea long laef blong yu long saed blong speret. Taem mifala i wok mo joen wetem yufala samting ya i leftemap tingting blong mifala tu, mo mifala i talem tangkyu long Jeova from gud wok we yufala i stap mekem.​—⁠1 Tes. 1:​2, 3.