Wok Blong Makem Ol Man We i Sevem Laef Blong Olgeta
1 Bifo we Jeova i mekem ol stret jajmen blong hem i kamtru, oltaem hem i givim woning mo i mekem wan rod blong ol man we oli gat tingting daon, oli save stap sef. Long taem blong Esikel, i gat ol man we oli stap harem nogud mo oli stap krae from ol nogud fasin. Jeova i mekem se ol gudfala man ya oli kasem wan mak we i sevem laef blong olgeta. (Esik. 9:4-6) Wok blong prij blong yumi tede i mekem sem wok ya. Yumi save kam wan impoten tul long wok ya.
2 Wok blong faenem ol man we oli gat gudfala hat, hemia i faswan samting nomo. Afta, yumi mekem plan blong visitim olgeta bakegen. Long fastaem we yumi luk ol man ya, yumi mekemrere blong visitim olgeta bakegen, taem yumi raetemdaon ol buk we yumi givim long olgeta, mo ol storeyan we yumi mekem wetem olgeta. Frut we yumi kasem i dipen bigwan long ol samting we yumi mekemrere blong talem mo blong mekem, taem yumi gobak.
3 Taem yu gobak long wan man we yu bin livim “Laef Foreva” buk wetem hem, yu save talem se:
◼ “Lastaem we mi bin luk yu, yumitu tokbaot nambawan hop blong luk ol bubu blong yumi, we bambae oli laef bakegen long wan Paradaes wol. ?Yu yu agri se Kingdom blong God nomo i save mekem promes ya i kamtru? (Wet blong man i ansa.) Jisas i eksplenem wanem we Kingdom blong God bambae i mekem, taem wil blong God i kamaot long wol ya. Hemia nao gud nyus ya we hem i talem se ol man blong hem bambae oli talemaot long ful wol.” Ridim Matyu 24:14. Nao yu save yusum japta 19 long buk ya, blong eksplenem wanem bambae i hapen afta we ‘en ya’ i kam.
4 Maet yu laekem moa blong tokbaot Baebol nomo wetem “Trutok” buk. Yu save talem se:
◼ “I luk olsem we kolosap olgeta man we mifala i save olgeta, oli wantem kasem ol advaes we i save wokgud, blong winim ol problem we oli kamaot evri dei long laef blong yumi. ?Weples yu ting se yumi save kasem advaes we yumi save trastem? [Wet blong man i ansa.] Plante man we oli trastem advaes blong ol fren blong olgeta mo ol narafala waes man, oli bin harem nogud long risal we i kamaot. Be, plante milyan man oli faenemaot se ol advaes blong Baebol nomo, yumi save trastem. Baebol i tijim yumi olsem wanem blong winim enikaen problem we yumi kasem. [Ridim 2 Timote 3:16, 17.] Maet yu bin faenem se i hadwok blong kasem save long Baebol. Be mi mi glad blong soem long yu olsem wanem yu save yusum buk ya blong faenem ol advaes we i waes.” Blong gohed, openem “Trutok” buk long pej 177 mo 178. Nao ridim sam toktok blong soem olsem wanem lav i save givhan long yumi blong stretem ol smosmol trabol long famle.”
5 Wetem tingting blong statem wan Baebol stadi, maet yu jus blong yusum buk ya “Yu Save Laef Foreva Long Paradaes Long Wol.” Yu save yusum fastok ya:
◼ “Yumi laekem tumas ol famle blong yumi mo yumi wantem se oli gat wan gudfala laef. ?Olsem wanem wan wol olsem hemia, bambae i mekem i gud moa long famle blong yu?” Soem ol pija long pej 156 mo 157. Ridim wan no tu vas we oli stap long ol pej ya, mo eksplenem se Jeova God nao i mekem ol promes ya, mo hem i no save gyaman. Soem lis blong ol japta long pej 5 mo 6, mo askem man blong haos weswan long ol japta ya hem i intres moa long hem. Ale, openem buk long japta we hem i jusum, nao storeyan long wan no tu haf blong hem.
6 ?Yu yu wantem givhan long wan man blong kasem mak ya we bambae i sevem laef blong hem? Yu save mekem samting ya, sipos yu ‘finisim olgeta minista wok blong yu,’ long fasin we yu mekemrere gud mo gobak kwiktaem long ol man we oli intres.—2 Tim. 4:5.