Talemaot Gud Nyus Wetem Positif Tingting
1 Yumi evriwan i wantem haremgud mo faenem mining long samting we yumi mekem, i tru moa long saed blong wok blong mekem disaepol. ?Wanem samting i save mekem yumi haremgud olsem? Fastaem, yumi mas holem wan positif tingting taem yumi stap bisi long gudfala wok ya blong halpem ol narafala. (Prov. 11:25) Fasin blong yumi blong talemaot gud nyus i mas soem se yumi rili bilivim samting we yumi stap talem. Sipos ol toktok blong yumi i kamaot long hat blong yumi, ale ol man bambae oli luksave se yumi rili bilif long ol tok ya mo yumi no gat tu fes. (Luk 6:45) Sipos yumi lanem fasin blong storeyan bakegen mo bakegen long haos, bambae yumi harem se i no hadwok tumas blong toktok wetem ol man long teritori blong yumi. Samting ya bambae i givhan bigwan long yumi long Septemba, taem yumi stap seremaot buk ya Revelesen—Kolosap i Kasem Nambawan En Blong Hem! Maet yu faenem se ol advaes we i kam biaen bambae i givhan long yu blong talemaot gud nyus, wetem positif tingting.
2 Taem yu stap seremaot buk ya “Revelesen,” yu save talem se:
◼ “?Yu bin harem se buk blong Revelesen long Baebol i tokbaot fo man we oli ron long hos? [Wet long ansa.] I gat plante defren tingting long saed blong mining blong ol man ya we oli ron long hos. ?Yu save se pijatok ya i haf blong wan profet tok blong Baebol, we i stap talemaot ol samting we oli mas hapen long taem blong yumi, mo se yumi evriwan i joen long profet tok ya? [Wet long ansa.] ?Yu yu laekem blong save mining blong profet tok ya mo olsem wanem i joen wetem laef blong yumi?” Sipos man blong haos i intres, yu save soem ol pija long japta 16 blong Revelesen buk, mo tokbaot sam vas we oli raetem long blak raeting. No maet yu yusum traket ya ?Wol Ya Bambae i Lus No i Stap? blong tokbaot sam haf blong vison ya. Askem man blong haos blong karem buk ya, mo mekem wan stret taem blong kambak blong tokbaot sam moa haf blong vison ya mo mining blong hem.
3 Taem yu gobak blong visitim olgeta we yu bin storeyan wetem olgeta long saed blong fofala man blong ron long hos long Revelesen, maet yu save talem olsem:
◼ “Lastaem yumitu bin storeyan tugeta, yumi tokbaot fofala man blong ron long hos long Revelesen, mo mining blong olgeta long taem blong yumi. ?Yu faenem se i had blong bilif we Hemia we i wokem heven mo wol i intres long fyuja blong yumi? [Wet long ansa.] I gud blong save se Man we i Wokem Olgeta Samting i mekem disisen finis long saed blong fyuja.” Ridim Aesea 46:9, 10. Sipos man blong haos i intres, yusum ol pija mo smol stampa tok long pej 302 blong Revelesen buk, blong tokbaot ol gudfala samting we God i promes se bambae oli kamaot long wol ya. Ridim haf 4 long pej 303, mo askem man blong haos blong mekem Baebol stadi. Sipos hem i talem yes, statem stadi long Save buk.
4 Maet yu traem blong storeyan olsem taem yu stap seremaot buk ya “Revelesen”:
◼ “Taem mi stap storeyan wetem ol man raonabaot, mi luk se bighaf blong olgeta oli wantem stap long wan ples we i sefgud mo long wan wol we i gat pis. ?Yu ting se from wanem nao man i no save mekem samting ya i kamaot long wol? [Wet long ansa.] Sam lida blong politik oli stap traehad mo oli mekem sam gudfala samting, be traem luk waes advaes we Baebol i givim.” Ridim Ol Sam 146:3, 4. Nao askem se: “?I gat wan man we hem i naf blong givim ol samting we ol man oli nidim?” Ridim vas 5 mo 6. Buk blong Revelesen long Baebol i soem olsem wanem rul blong man bambae i finis, mo Kingdom blong God bambae i tekem ples blong hem. Soem ol pija long pej 52 mo 53 blong Revelesen buk, mo tokbaot ol gudfala samting we bambae oli kamaot from rul blong God. Talem praes blong buk mo askem man blong haos blong karem.
5 Sipos long fastaem we yu mitim man yu bin tokbaot rul blong God antap long wol ya, maet yu traem storeyan olsem taem yu gobak bakegen:
◼ “Taem mi storeyan wetem yu jes sam dei bifo nomo, yumi bin tokbaot se man i no naf blong putum trufala pis long wol. Maet yu rimemba we yumi bin lukluk tok blong Baebol we i soem from wanem man i no naf. [Ridim Ol Sam 146:3 bakegen.] ?Yu luksave from wanem God i talem se yumi no mas putum tingting blong yumi i stap strong long ol man? [Wet long ansa.] Maet yu agri se God nomo i naf blong winim ol problem blong olwe. Tok blong Revelesen 11:15 i soem from wanem yumi save bilif strong long samting ya. Sipos yumi wantem stap aninit long rul blong Kingdom blong God, ?yumi mas mekem wanem?” Talem se yu glad blong soem olsem wanem plante milyan man oli bin kasem save we i blong lidim olgeta long laef we i no save finis, tru long wan Baebol stadi. Sipos man blong haos i glad, soem Save buk mo statem wan stadi.
6 Sipos yu mitim wan man we i stap lukaot long stoa, maet yu storeyan smoltaem nomo, mo yusum “Revelesen” buk:
◼ “Tede mifala i stap mekem wan spesel wok long medel blong ol bisnesman long ples blong yumi. Yumi evriwan i wari long ol problem long saed blong mane we oli stap kam antap. ?Yu ting se i gat wan man we i save rod blong winim problem ya? [Wet long ansa.] God i save rod blong winim.” Openem Revelesen buk long pej 303. Ridim Aesea 65:21, 22 long haf 7 mo tokbaot. Talem nem blong japta 42, mo askem man blong karem buk.
7 Taem yu visitim bakegen bisnesman ya we yu bin livim “Revelesen” buk wetem hem, maet yu talem se:
◼ “Long laswan taem we mi visitim yu, mi bin talem se God nomo i save winim ol trabol long saed blong mane, blong olwe. Folem promes blong Hem, yumi save bilif se long fyuja, wol ya bambae i fulap long pis mo plante samting. Traem luk wanem samting we yumi save jusum.” Ridim Ol Sam 37:37, 38. Tokbaot bakegen pija long pej 302, mo ridim fastok blong haf 6. Askem man blong mekem Baebol stadi we hem i no pem, maet long stoa no long haos blong hem.
8 Yumi “stap joen wetem God blong mekem wok blong hem,” taswe yumi gat plante risen blong gat positif tingting taem yumi stap talemaot gud nyus. (1 Kor. 3:9) Sipos yumi holem wan tingting olsem, bambae yumi kasem fulap blesing long Jeova.