Talemaot Kingdom
1 Long Hibrus 10:23, yumi kasem advaes ya se: “I gud yumi holemtaet fasin ya we yumi talemaot finis se i fasin blong yumi, we yumi putum tingting blong yumi i stap strong long God . . . se hem bambae i save mekem ol promes blong hem oli kamtru.” Mo tingting blong yumi i stap strong long Kingdom blong God. Jisas i givim wan spesel oda se yumi mas talemaot gud nyus blong Kingdom long olgeta nesen. (Mak 13:10) Yumi mas tingbaot samting ya taem yumi stap prij.
2 Taem yumi mitim ol man, yumi traehad blong storeyan long samting we oli intres long hem no oli wari long hem. Kolosap oltaem, yumi tokbaot ol samting we oli savegud long hem, olsem fasin blong kilim man we i stap long ples blong yumi, ol problem blong ol yangfala, ol wari long saed blong wok mo mane, no wan bigfala trabol we i jes kamaot long wol. Bighaf blong ol man oli stap tingting nomo long ol ‘wari blong laef.’ Taswe taem yumi soem se yumi wari tu mo yumi kasem save long filing blong olgeta, plante taem oli glad blong talemaot tingting blong olgeta. (Luk 21:34) Maet samting ya i openem rod, blong yumi talemaot hop blong yumi.
3 Be, sipos yumi no lukaotgud, yumi save storeyan long ol trabol gogo yumi neva tokbaot mesej we yumi wantem talemaot long ol man—mesej blong Kingdom. I tru se yumi mas toktok smol long ol nogud samting we oli mekem tingting blong ol man i trabol, be bigfala samting se yumi wantem pulum ol man blong tingbaot Kingdom, we bambae i winim olgeta problem blong yumi. Yumi gat wan nambawan hop we ol man oli nidim tumas. Taswe, nating se yumi tokbaot sam trabol fastaem we oli makem ‘taem ya we laef i strong tumas,’ kwiktaem nomo yumi mas go long impoten mesej we yumi wantem givimaot, hemia “gud nyus ya we i blong oltaem nomo.” Long rod ya, yumi stap finisim olgeta wok ya we God i givim long yumi blong mekem.—2 Tim. 3:1; 4:5; Rev. 14:6.