?Bambae Hu i Lesin Long Mesej Blong Yumi?

¹ Naoia, ol man oli gat fulap save bitim olgeta taem bifo. Plante long ol save ya i no impoten, mo i save lidim man i go krangke tu. From samting ya, plante man oli harem se oli stap draon long ol save ya. Taswe, i hadwok blong yumi pulum ol man blong lesin long mesej blong Kingdom blong God. Oli no luksave se Tok blong God i save givhan long olgeta sipos oli lesin long hem.​—Luk 11:28.

² Yumi glad tumas we, long plante ples blong wol, plante taosen man oli stap lesin long mesej ya, mo oli agri blong stadi Baebol long haos blong olgeta. Be, long sam narafala ples, i hadwok blong faenem ol man taem yumi gobak blong visitim olgeta bakegen, from we oli no stap long haos.

³ Yumi mas lukaot se tingting blong yumi i no foldaon. Pol i eksplenem se: “ ‘Olgeta we oli singaot long Jeova, oli talem nem blong hem, hem bambae i sevem olgeta.’ ?Be sipos oli no harem nyus blong God, bambae oli singaot long hem olsem wanem? Mo sipos man i no go talemaot nyus ya, bambae ol man oli save harem nyus ya olsem wanem? . . . Taswe Baebol i talem se: ‘!Samting ya i gud tumas, we oli talemaot gud nyus ya!’ ” (Rom 10:​13-​15) Sipos yumi wok strong blong sakem sid blong Kingdom, God bambae i mekem i gru long hat blong ol gudfala man.​—1 Kor. 3:⁠6.

⁴ Rod Blong Karem Frut i Blong Mekem Ol Visit Bakegen: Nating se yumi bin livim wan buk wetem wan man no no gat, yumi mas traehad blong mekem ol intres we hem i soem, i gru. Yumi no mas kwik blong ting se bambae i no gat frut i kamaot. Taem yumi sakem sid, yumi no save weples bambae hem i gru. (Ekles. 11:⁠6) Sipos yumi reregud blong tokbaot wan poen long Baebol taem yumi gobak, maet yumi save kasem hat blong man, nating se yumi no storeyan blong longtaem. Yumi save givim wan traket long hem no askem long hem blong karem ol nyufala Wajtaoa mo Wekap! Biaen, maet yumi save soem long hem olsem wanem yumi mekem Baebol stadi wetem ol man. Bambae yumi glad tumas taem yumi luk we Jeova i blesem fasin traehad blong yumi bigwan.​—Sam 126:​5, 6.

⁵ Wan pablisa i livim wan traket ­wetem wan woman we i soem sam intres. Blong tu manis, hem i no save faenem woman ya long haos blong hem. Taem hem i faenem woman ya bakegen, hem i no save storeyan longtaem from we woman ya i bisi tumas. Pablisa i givim semfala traket long hem bakegen. Hem i gohed blong traem faenem woman ya long haos. Tri manis biaen nomo, hem i faenem hem bakegen. Be woman ya i sik. Sista i kambak bakegen long nekis wik blong hem, mo tufala i storeyan smol long saed blong traket ya. Taem sista i kambak wan wik biaen, woman ya i soem bigfala intres long mesej blong Kingdom. Sam samting oli bin jenis long laef blong hem, nao hem i luksave se hem i nidim ol samting long saed blong speret. Sista i statem wan Baebol stadi wetem hem, mo evri wik biaen, woman ya i glad tumas blong stadi.

⁶ Taem yumi wantem wan samting blong gru, nating se hem i wan flaoa, kabej, no intres long mesej blong Kingdom, yumi mas lukaotgud long samting ya. Blong mekem olsem, yumi nidim taem, fasin traehad, fasin kea, mo strong tingting blong no lego. !Las yia, bitim 338,000 man oli tekem baptaes, from we sid blong Kingdom i gru long hat blong olgeta! Sipos yumi gohed blong prij, bambae yumi faenem plante moa man we oli glad blong lesin long mesej blong yumi.​—Skelem wetem Galesia 6:⁠9.