Niufala Program Blong Ol Miting Blong Kongregesen
1, 2. ?Stat long Jenuware 2009, bambae i gat wanem jenis long ol miting?
1 Long wik blong Eprel 21-27, 2008, olgeta brata sista long fulwol oli harem wan nambawan nius. “Stat long Jenuware 1, 2009, bambae yumi mekem Buk Stadi Blong Kongregesen long semtaem we yumi mekem Tiokratik Skul mo Miting Blong Kingdom Wok. Mo bambae nem blong Buk Stadi Blong Kongregesen i jenis tu, i kam Baebol Stadi Blong Kongregesen.”
2 Program Blong Niufala Miting Ya: Stat long faswan singsing mo prea kasem laswan singsing mo prea, bambae miting ya i tekem 1 aoa 45 minit. Miting bambae i stat wetem singsing mo prea (5 minit), biaen bambae i gat Baebol Stadi Blong Kongregesen (25 minit). Afta we Baebol Stadi Blong Kongregesen i finis, bambae miting i gohed wetem Tiokratik Skul (30 minit). Mo biaen bambae i gat wan singsing (5 minit) we i statem Miting Blong Kingdom Wok (35 minit). Ale miting bambae i finis wetem singsing mo prea (5 minit). Blong givhan long yu blong rere from miting ya, program blong Baebol Stadi Blong Kongregesen, Tiokratik Skul, mo Miting Blong Kingdom Wok, bambae i stap evri manis long Kingdom Wok Blong Yumi.
3. ?Bambae brata i lidim Baebol Stadi Blong Kongregesen olsem wanem?
3 Baebol Stadi Blong Kongregesen: Miting ya bambae i folem fasin blong mekem Wajtaoa Stadi. Brata we i lidim miting ya i no nidim blong statem stadi wetem wan tingtingbak long laswan stadi. Be hem i mas talem sot toktok nomo blong statem miting ya. Long rod ya, bambae i gat naf taem blong evriwan we i stap long miting blong givim ol sotfala ansa. Evri wik bambae wan defren elda i lidim miting ya mo presiden elda bambae i mekem program blong samting ya.
4. ?Miting Blong Kingdom Wok bambae i jenis olsem wanem?
4 Miting Blong Kingdom Wok: Miting Blong Kingdom Wok bambae i stap sem mak, be ol haf long hem bambae oli sot moa. Plante taem ol lokol mesej bambae oli tekem faef minit nomo. Taem ya bambae i naf blong talemaot ol impoten mesej mo ridim sam leta we oli kam long branj ofis. I no gat nid blong talem ol mesej olsem taem blong ol miting blong wok blong prij, klinim Haos Kingdom, ripot blong ol kaon, mo ol leta we kongregesen i stap kasem evri manis long branj ofis. Ol samting ya bambae oli stap long notisbod blong kongregesen, blong ol brata sista oli save ridim. Ol brata we oli gat ol haf blong mekem long miting oli mas reregud, folemgud ol save we i stap long Kingdom Wok Blong Yumi, mo oli no mas bitim taem blong haf we oli mekem.
5. ?Long wik blong visit blong seket elda, wanem program we kongregesen i folem long saed blong ol miting?
5 Visit Blong Seket Elda: Program blong wik blong seket elda bambae i no jenis. Long Tusde, bambae i gat Tiokratik Skul mo Miting Blong Kingdom Wok, mo biaen bambae i gat wan singsing. Afta long singsing, seket elda bambae i mekem wan tok blong 30 minit. Olsem we yumi stap mekem naoia long wik blong visit blong seket elda, bambae i gat Baebol Stadi Blong Kongregesen long wan narafala naet long wik, mo biaen bambae i gat wan singsing mo wan tok we seket elda i mekem. Ale miting i finis wetem wan singsing mo prea.
6. ?Wanem wok blong wan elda we i lukaot long wan grup?
6 Ol Miting Blong Wok Blong Prij: Ol elda we oli lukaot long wan grup bambae oli gat wok ya blong lukaot long ol miting blong wok blong prij mo ol wanwan pablisa we oli stap long grup blong olgeta. Taem i mas gat wan man blong givhan blong mekem wok ya, bambae ol elda blong kongregesen oli jusum wan, blong i mekem wok ya olsem “man blong givhan long grup.”
7. ?Long niufala program blong ol miting, bambae yumi save haremgud long wanem samting?
7 Folem ol save ya we yumi jes tokbaot, niufala program blong ol miting bambae i givim janis long yumi blong haremgud long save we i tijim yumi, i leftemap tingting blong yumi, mo we i halpem yumi blong frengud moa wetem Jeova. Mo long rod ya, bambae yumi kasem trening we i halpem yumi blong karem moa frut long wok blong prij mo blong kam ol man blong prij mo tij we oli gat gudhan.—Efes. 4:13, 14; 2 Tim. 3:17.
8. ?Olsem wanem fasin blong rere gud from ol miting bambae i givhan long yumi wanwan mo long ol narafala tu?
8 Stadi we yumi mekem blong rerem ol miting ya bambae i givhan long yumi blong luksave klia ol bigfala poen we oli kamaot long evri miting. Bambae yumi evriwan i save givim ol ansa, ale bilif blong yumi bambae i givgivhan long yumi, blong mekem yumi strong. (Rom. 1:11, 12; Hib. 10:24) Mak blong yumi hemia se ‘ol man oli save luk we yumi stap gohed gud’ taem yumi “stap tijim ol man long trutok blong God long fasin we i stret gud.”—1 Tim. 4:15; 2 Tim. 2:15.
9. ?Yu yu gat strong tingting blong mekem wanem, mo from wanem?
9 Yumi glad tumas long bigfala jenis ya long ol miting blong yumi. I gud yumi evriwan yumi gohed blong folemgud ol advaes we “slef ya we i stret mo waes” i givim blong lidim yumi, mo yumi gohed blong stap klosap long Nambawan Man blong Lukaot long Sipsip, long taem ya we hem i stap rerem yumi from bigfala “trabol” we naoia i klosap nomo.—Mat. 24:21, 45, NW; Hib. 13:20, 21; Rev. 7:14.