Ol Refrens Blong Kristin Wok Mo Laef—Buk Blong Miting
6-12 FEBRUARI
OL GUDGUDFALA SAMTING LONG BAEBOL | AESEA 47-51
“Taem Yumi Obei Long Jehova Yumi Kasem Blesing”
(Aesea 48:17) Olgeta. !Yumi ol laen blong Isrel, mo Hae God i God blong yumi! Hem i tabu we i tabu, fasin blong hem i stret olgeta, mo hem i stap sevem yumi, i stap mekem yumi fri. Hem i talem se, ‘Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem.
ip-2 pej 131 haf 18
Jehova i Tijim Yumi Blong Mekem i Gud Long Yumi-“Obei Long Ol Tok Blong Mi”
18 Jehova i givim tabu spirit long Aesea blong hem i talemaot se: “Hae God i Masta blong yumi, mo hem i mekem we paoa blong Spirit blong hem i kam fulap long mi, mo i sanem mi mi go. Bakegen, profet i talem long ol man blong hem se, “Olgeta. !Yumi ol laen blong Isrel, mo Hae God i God blong yumi! Hem i tabu we i tabu, fasin blong hem i stret olgeta, mo hem i stap sevem yumi, i stap mekem yumi fri. Hem i talem se, ‘Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem. (Aesea 48:16b, 17) Tok ya i soemaot se Jehova i kea long ol man Isrel, mo i leftemap tingting blong olgeta se hem bambae i tekemaot olgeta long Babilon. Hem nao bambae i sevem olgeta. (Aesea 54:5) Jehova i wantem tumas se ol man Isrel oli fren gud bakegen wetem hem mo oli obei long ol tok blong hem. Tru wosip i stanap long fasin ya blong obei long ol tijing blong Jehova. Ol man Isrel oli no save wokbaot long stret rod sipos Jehova i no tijim olgeta ‘long stret rod blong folem.’
(Aesea 48:18) Sipos yufala i bin obei long ol tok blong mi, ol gudgudfala samting we mi mi save mekem long yufala, bambae oli save kam long yufala, olsem wan gudfala reva we i stap ron. Bambae mi save mekem we yufala i win oltaem nomo, olsem solwota we i stap brok long sanbij mo rif, we neva i save spel.
ip-2 pej 131 haf 19
Jehova i Tijim Yumi Blong Mekem i Gud Long Yumi
19 Jehova i wantem tumas we ol man blong hem oli no kasem trabol mo oli harem gud long laef. Hem i se: “Sipos yufala i bin obei long ol tok blong mi, ol gudgudfala samting we mi mi save mekem long yufala, bambae oli save kam long yufala, olsem wan gudfala reva we i stap ron. Bambae mi save mekem we yufala i win oltaem nomo, olsem solwota we i stap brok long sanbij mo rif, we neva i save spel.” (Aesea 48:18) !Jehova we i wokem olgeta samting, i wantem tumas we ol man blong hem oli obei long hem! (Dutronome 5:29; Ol Sam 81:13) Sipos ol man Isrel oli obei, bambae oli no save go long kalabus. Bambae oli gat pis oltaem olsem reva we i stap ron. (Ol Sam 119:165) Mo bambae oli soemaot ol stret fasin oltaem olsem ol wef blong solwota. (Amos 5:24) Jehova i kea bigwan long ol man Isrel, taswe hem i wantem se oli obei long hem, blong hem i save soem stret rod long olgeta blong oli folem. !Sipos oli lesin, bambae oli harem gud tumas!
(Aesea 48:19) Mi save mekem ol pikinini we bambae oli stap kamaot biaen long yufala, bambae oli plante we plante, olsem sanbij daon long solwota, mo bambae mi save mekem we neva narafala man i save spolem olgeta.
ip-2 pej 132 haf 20-21
Jehova i Tijim Yumi Blong Mekem i Gud Long Yumi
20 ?Sipos ol man Isrel oli tanem tingting blong olgeta, bambae oli kasem wanem blesing? Jehova i talem se: “Mi save mekem ol pikinini we bambae oli stap kamaot biaen long yufala, bambae oli plante we plante, olsem sanbij daon long solwota, mo bambae mi save mekem we neva narafala man i save spolem olgeta.” (Aesea 48:19) Jehova i mekem oli tingbaot bakegen promes we hem i mekem wetem Ebraham se olgeta we bambae oli kamaot biaen long hem oli plante we plante olsem, “ol sta long skae, mo olsem sanbij daon long solwota.” (Jenesis 22:17; 32:12) Be olgeta ya we oli kamaot biaen long Ebraham oli no bin obei, nao oli no gat raet blong kasem promes ya . Ol samting we oli mekem i nogud tumas, taswe folem loa blong Jehova, i stret nomo we olgeta evriwan oli ded. (Dutronome 28:45) Be Jehova i no wantem se olgeta man blong hem oli lus, mo hem i no wantem lego olgeta fulwan.
21 Ol man we oli stap wosipim Jehova tede tu, oli mas tingbaot ol impoten lesen we oli stap long stori ya. Jehova i stamba blong laef mo hem i save gud evri samting i bitim yumi. Hem i save samting we yumi mas mekem long laef blong yumi. (Ol Sam 36:9) Ol advaes we hem i givim long yumi i no blong spolem yumi, be i blong mekem i gud long yumi. Ol tru Kristin oli wantem se Jehova i lidim olgeta, taem oli traehad blong folem ol samting we hem i talem. (Maeka 4:2) Ol advaes blong Jehova oli givhan long yumi blong holemstrong long trutok mo blong lukaotgud long fasin fren blong yumi wetem hem, mo oli blokem yumi long ol nogud samting we Setan i mekem blong spolem yumi. Taem yumi glad blong folem ol stamba trutok we oli stap long ol loa blong Jehova, bambae yumi luksave se Jehova i stap tijim yumi blong mekem i gud long yumi. Mo tu bambae yumi luksave se “ol loa blong hem oli no had tumas blong folem.” Mo bambae yumi no lus blong olwe.—1 Jon 2:17; 5:3.
Traem Faenem Ol Gudfala Samting Ya
(Aesea 50:1, New World Translation) Mo Hae God i talem se, ‘?Wehem pepa ya blong divos blong mama blong yufala we mi sanemaot hem? ?Yufala i ting se mi mi salemaot yufala blong yufala i go wok slef longwe, olsem we man i salemaot ol pikinini blong hem blong oli kam slef blong narafala man? !Nogat! !I no olsem! Mi sanem yufala i go wok slef longwe from ol sin blong yufala, mo mi sanemaot mama blong yufala i gowe long mi, from ol fasin nogud blong yufala.
it-1 pej 643 haf 4-5
Divos
Narafala Mining Blong Divos. Samtaem Baebol i yusum mared olsem pija blong wan narafala samting. (Aes 54:1, 5, 6; 62:1-6) I gat sam narafala vas tu we i tokbaot divos, o fasin blong sanemaot woman, se i pija blong wan narafala samting.—Jer 3:8.
Ol man Babilon oli spolem kingdom blong Juda mo Jerusalem long yia 607 bifo Kraes, nao oli tekem ol man Jiu oli go kalabus long Babilon. Long ol yia bifo, Jehova i talemaot wan profet tok long ol man Jiu ya we bambae oli go kalabus. Hem i se: “?Wehem pepa ya blong divos blong mama blong yufala we mi sanemaot hem?” (Aes 50:1, NW ) Jehova i sanemaot “mama” blong olgeta, hemia neson blong Isrel, from we olgeta oli no obei long Loa blong hem. Jehova i no brekem kontrak we hem i mekem wetem olgeta, be olgeta nomo oli jus blong lego Jehova. Be ol man Isrel we oli laef, oli tanem tingting blong olgeta mo oli prea blong Jehova i tekembak olgeta bakegen. Jehova i wantem we ol man oli leftemap nem blong hem, taswe hem i mekem ol man Isrel oli gobak long ples blong olgeta olsem we hem i bin promes se bambae oli go fri long en blong 70 yia we oli stap long kalabus. Long yia 537 bifo Kraes, oli aot long Babilon.—Sam 137:1-9
13-19 FEBRUARI
Traem Faenem Ol Gudfala Samting Ya
(Aesea 54:1) “!Ol man Jerusalem! Kam kasem naoia, yufala i olsem woman we neva i bonem pikinini, be naoia yufala i save singsing, yufala i save glad, we yufala i stap singsingaot bigwan from. I stat naoia, ol pikinini blong yufala bambae oli kam plante moa, i winim ol pikinini blong woman we man blong hem i no lego hem.”
w06 15/3 pej 11 haf 2
Wan “Parabol” We i Impoten Long Yumi
?‘Fri woman’ ya Sera mo boe blong hem Aesak, tufala i pija blong hu? Pol i talem se Sera, ‘woman ya we i no save gat pikinini,’ hem i pija blong woman blong God, hemia ogenaesesen blong hem we i stap long heven. Woman ya i no gat pikinini from we bifo we Jisas i kam long wol i no gat ol “pikinini” no ol tabu Kristin yet long wol. (Galesia 4:27; Aesea 54:1-6) Be long lafet blong Pentekos long yia 33 Kristin taem, tabu spirit i makemaot sam man mo woman blong oli bon bakegen mo kam olsem ol pikinini blong woman ya. God i adoptem ol pikinini ya blong oli kam ol pikinini blong hem mo oli joen wetem Jisas Kraes blong rul aninit long niufala kontrak. (Rom 8:15-17) From samting ya, aposol Pol we i wan long ol pikinini ya, i save talem se: “Jerusalem blong heven, hem i fri mo hem i mama blong yumi.”—Galesia 4:26.
20-26 FEBRUARI
OL GUDGUDFALA SAMTING LONG BAEBOL | AESEA 58-62
“Talemaot Yia We God Bambae i Sevem Ol Man Blong Hem”
(Aesea 61:1, 2) Hae God we i Masta blong yumi, hem i jusumaot mi, mo paoa blong Spirit blong hem i kam fulap long mi, blong mi kam talemaot gud nius long ol puaman. Hem i sanem mi, blong mi kam mekem ol man we tingting blong olgeta i foldaon olgeta, oli harem gud bakegen, mo blong mi talemaot long olgeta we oli stap wok slef long narafala kantri, se oli save gohom, mo blong mi tekemaot olgeta we oli stap long kalabus, blong oli save gofri. 2 Hem i sanem mi, blong mi talemaot se taem i kam finis, we hem bambae i flatemdaon ol enemi blong ol man blong hem, i sevem olgeta. Hem i sanem mi, blong mi leftemap tingting blong olgeta we oli harem nogud, oli stap krae,
ip-2 pej 322 haf 4
Stret Fasin i Kamaot Long Saeon-‘Yia We God Bambae i Sevem Ol Man Blong Hem’
4 Aesea i talem se: “Hae God we i Masta blong yumi, hem i jusumaot mi, mo paoa blong Spirit blong hem i kam fulap long mi, blong mi kam talemaot gud nius long ol puaman. Hem i sanem mi, blong mi kam mekem ol man we tingting blong olgeta i foldaon olgeta, oli harem gud bakegen, mo blong mi talemaot long olgeta we oli stap wok slef long narafala kantri, se oli save gohom, mo blong mi tekemaot olgeta we oli stap long kalabus, blong oli save gofri.” (Aesea 61:1) ?Hu nao we God i jusumaot hem blong i talemaot gud nius? I luk olsem se fas man blong talemaot gud nius we vas ya i tokbaot hem i Aesea. Jehova i jusumaot hem blong i talemaot gud nius long ol man Jiu we oli stap kalabus long Babilon. Be Jisas i talemaot se bigfala mining blong profet tok ya i kamtru long hem. (Luk 4:16-21) Yes, Jehova i sanem Jisas i kam blong i talemaot gud nius long ol puaman, mo tabu spirit i makemaot hem, taem hem i baptaes.—Matiu 3:16, 17.
(Aesea 61:3, 4) Mi mekem olgeta long Saeon we oli stap harem nogud olsem, oli harem gud bakegen, oli glad, mo blong mi mekem we oli no moa krae, oli stap sing blong presem hem. Olgeta bambae oli olsem ol tri we hem nomo i planem olgeta. Bambae olgeta evriwan oli save folem ol fasin we i stret nomo, mo ol man bambae oli save presem hem, from ol samting we hem i mekem. 4 Bambae olgeta oli stanemap ol taon ya bakegen, we oli brokdaon longtaem finis, mo bambae oli wokemgud ol haos we ol man oli spolem bifo olgeta.
ip-2 pej 326-327 haf 13-15
Stret Fasin i Kamaot Long Saeon
13 Stat long lafet blong Pentekos long yia 33, God i planem sam narafala ‘bigfala tri blong stret fasin,’ we oli ol tabu Kristin mo oli kam niufala neson blong hem, hemia “Isrel blong God.” (Galesia 6:16) Taem ol yia oli pas, namba blong ol “tri” ya i kam antap kasem 144,000 mo oli stap karem ol gudfala frut, we hem i ol stret fasin we oli leftemap nem blong Jehova God. (Revelesen 14:3) Stat long yia 1919, Jehova i givhan long las grup blong ol tabu Kristin ya blong oli wok strong bakegen, olsem ol “tri” we oli gru gud mo oli stap karem frut. Jehova i stap givim ol gudfala save long olgeta, we i olsem wota, blong mekem se oli gohed blong soemaot stret fasin blong hem, olsem ol tri we oli gru gud mo karem plante frut.—Aesea 27:6.
14 Aesea i gohed blong tokbaot wok we ol tri ya bambae oli mekem, hem i se: “Bambae olgeta oli stanemap ol taon ya bakegen, we oli brokdaon longtaem finis, mo bambae oli wokemgud ol haos we ol man oli spolem bifo olgeta.” (Aesea 61:4) Taem King Sirus blong Pesia i spolem Babilon, hem i letem ol man Jiu oli gobak bakegen blong bildim taon blong Jerusalem mo haos tempol, we oli nogud i stap blong plante yia. Wok ya blong stanemap tru wosip bakegen, i samting we i hapen tu long taem blong ol Kristin afta long yia 33 Kristin taem mo yia 1919.
15 Long yia 33, ol disaepol blong Jisas oli harem nogud tumas from we ol man oli arestem hem, oli putum hem long kot, mo oli kilim hem i ded. (Matiu 26:31) Be taem Jisas i kamtru long olgeta afta we hem i laef bakegen, oli no moa harem nogud. Nao taem oli kasem tabu spirit, oli wok strong blong talemaot gud nius long ‘Jerusalem, mo long olgeta ples long Judia mo Sameria, gogo oli kasem olgeta ples long wol.’ (Ol Wok 1:8) Long rod ya, oli stat blong stanemap tru wosip bakegen. Long sem fasin, stat long yia 1919 Jisas i mekem se ol tabu Kristin we oli laef yet oli bildim bakegen “ol haos we ol man oli spolem bifo olgeta.” Blong plante yia, ol lida blong Krisendom oli no tijim ol trutok blong Jehova long ol man, be oli tijim ol kastom blong man nomo mo ol bilif we oli no stanap long Baebol. Ol tabu Kristin oli sakemaot ol bilif blong ol giaman skul, blong mekem se tru wosip i save gohed gud bakegen. Mo oli stat blong mekem bigfala wok ya blong talemaot gud nius long olgeta ples long wol i bitim ol taem bifo.—Mak 13:10.
27 FEBRUARI–5 MAJ
OL GUDGUDFALA SAMTING LONG BAEBOL | AESEA 63-66
“Niufala Heven Mo Niufala Wol Bambae i Mekem Ol Man Oli Glad Tumas”
(Aesea 65:17) Bambae mi mi mekem niufala heven mo niufala wol bakegen. Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta.
ip-2 pej 383 haf 23
“Yufala i Glad Tumas Long Ol Niufala Samting Ya We Bambae Mi Mi Mekem”
23 Buk blong Revelesen i tokbaot wan vison we aposol Jon i luk, we i soemaot dei blong kros blong Jehova bambae i kamtru mo i finisim olgeta rabis fasin blong wol ya. Biaen, Setan bambae i go kalabus. (Revelesen 19:11–20:3) Afta we Jon i luk vison ya, hem i talem bakegen profet tok blong Aesea we i se: “Nao mi luk wan niufala heven mo wan niufala wol.” Ol vas we oli kam biaen oli tokbaot taem ya we Jehova God bambae i jenisim bigwan ol samting long wol ya oli kam gud moa. (Revelesen 21:1, 3-5) !I klia nomo se “wan niufala heven mo wan niufala wol” we profet Aesea i tokbaot, bambae i kamtru fulwan long niufala wol! Gavman long heven bambae i mekem se niufala grup blong ol man long wol oli harem gud blong wosipim Jehova mo blong harem gud long paradaes long wol ya. I gud tumas blong luk promes ya tu we bambae i kamtru long taem ya hemia se ‘ol samting ya blong bifo [ol sik, fasin safa, mo ol samting we i stap mekem ol man oli harem nogud] bambae oli lus olgeta.’ Long taem ya, ol samting we oli stap spolem ol man tede, bambae oli no moa gat. Bambae yumi tingbaot ol gudfala samting nomo we oli mekem yumi harem gud.
(Aesea 65:18, 19) Bambae yufala i glad tumas long ol niufala samting ya we bambae mi mi mekem, mo bambae yufala i harem gud, gogo i no save finis. Taem mi mi wokem niufala taon ya Jerusalem bakegen, bambae hem i ples blong glad, we oltaem ol man blong hem bambae oli hapi tumas. 19 Oltaem, bambae mi mi glad tumas from taon ya, wetem ol man blong hem. Long ples ya, bambae i no moa gat man i krae, mo i no moa gat man i singaot blong man i kam givhan long hem.
ip-2 pej 384 haf 25
“Yufala i Glad Tumas Long Ol Niufala Samting Ya We Bambae Mi Mi Mekem”
25 Tede tu, Jehova i mekem se Jerusalem “bambae hem i ples blong glad.” ?Bambae hem i mekem samting ya olsem wanem? Olsem we yumi luk finis, niufala heven i stanap finis long yia 1914, mo i no longtaem bambae olgeta 144,000 tabu Kristin bambae oli go joen wetem Jisas blong rul long gavman ya long heven. Profet tok i tokbaot olgeta olsem “Niufala Jerusalem.” (Revelesen 21:2) Hemia nao Niufala Jerusalem ya we God i stap tokbaot, taem hem i se: “Taem mi mi wokem niufala taon ya Jerusalem bakegen, bambae hem i ples blong glad.” God bambae i yusum Niufala Jerusalem blong blesem ol man we oli obei. Bambae yumi no moa save harem man i krae, from we Jehova bambae i mekem se yumi kasem ‘ol samting we yumi wantem tumas.’—Ol Sam 37:3, 4.