Ol Proveb 3:5, 6—“No Mas Lei Long Prapa Save Blong Yu”

“Yu mas trastem Jehova long fulhat blong yu, mo yu no mas dipen long prapa save blong yu. Long olgeta samting we yu mekem, yu mas tingbaot hem, nao hem bambae i mekem ol rod blong yu oli stret.”—Ol Proveb 3:5, 6, Niu Wol Translesen.

“Yu mas trastem MASTA long fulhat blong yu mo yu no mas lei long prapa save blong yu. Long olgeta samting we yu mekem, yu mas lukluk i go long hem mo hem bambae i mekem ol rod blong yu i stret.”—Ol Proveb 3:5, 6, New International Version.

Mining Blong Ol Proveb 3:5, 6

Yumi mas lukluk i go long Jehovaa God blong i lidim yumi, be yumi no mas mekem ol impoten desisen yumi wan nomo.

“Trastem Jehova long fulhat blong yu.” Yumi soemaot se yumi trastem God taem yumi mekem samting folem tingting blong hem. Yumi mas trastem God fulwan wetem fulhat blong yumi. Long Baebol, tok ya hat i minim samting we i stap insaed long yumi, olsem ol filing, samting we i pulum yumi, tingting blong yumi, mo fasin blong yumi. Taswe, blong trastem God wetem olgeta hat blong yumi, i no wan filing nomo. Be i wan samting we yumi mekem from we yumi sua fulwan se Krieta i save samting we i gud long yumi.—Rom 12:1.

“No mas dipen long prapa save blong yu.” Yumi mas trastem God from we yumi no save dipen long prapa save blong yumi we i no stretgud. Sipos yumi dipen long yumi wan o yumi letem ol filing blong yumi i pulum yumi blong mekem wan desisen, yumi save mekem ol desisen we maet yumi ting se i gud be biaen yumi kasem trabol from. (Ol Proveb 14:12; Jeremaea 17:9) Waes blong God i hae moa long waes blong yumi. (Aesea 55:8, 9) Taem yumi letem tingting blong God i lidim yumi, bambae yumi save gat wan gudfala laef.—Ol Sam 1:1-3; Ol Proveb 2:6-9; 16:20.

“Long olgeta samting we yu mekem, yu mas tingbaot hem.” Yumi mas faenemaot tingting we God i gat long ol impoten samting we yumi wantem mekem long laef, mo long ol impoten desisen blong yumi. Yumi mekem olsem taem yumi prea blong hem i lidim yumi mo yumi folem samting we hem i talem long Tok blong hem, Baebol.—Ol Sam 25:4; 2 Timoti 3:16, 17.

“Hem bambae i mekem ol rod blong yu oli stret.” God i mekem rod blong yumi i stret taem i halpem yumi blong laef folem ol stret rul blong hem. (Ol Proveb 11:5) Nao yumi blokem ol problem we i save kamaot mo yumi gat wan hapi laef.—Ol Sam 19:7, 8; Aesea 48:17, 18.

Ol Vas Raonabaot Long Ol Proveb 3:5, 6

Insaed long buk blong Ol Proveb, yumi save faenem sam rul we i givhan long man blong gat wan laef we i hapi mo we God i glad long hem. Ol faswan naen japta we i stap, oli raetem olsem we wan papa i stap givim advaes long boe blong hem. Japta 3 i tokbaot ol gudfala samting we man i kasem taem i tinghae mo i folem waes blong Krieta.—Ol Proveb 3:13-26.