Bigfala Tingting Blong Mi i Blong Stap Tru Long God

ALEXEI DAVIDJUK I TALEM STORI YA

Stret vilej blong mi, hemia Laskiv, Yukren, hem i stap sam kilometa nomo longwe long mak we kantri blong Yukren i finis mo Polan i stat. Mi bin gat wan fren we i olfala moa long mi, nem blong hem Stepan. Hem i stap wok haed, i stap karem ol buk we oli tokbaot Baebol oli aot long Polan, oli kam long Yukren. Wan naet long yia 1947, hem i stap mekem wok ya, nao wan gad i luk hem taem hem i krosem mak blong graon blong Polan blong go long Yukren. Gad ya i ronem hem, mo i sutum hem i ded long masket. Twelef yia biaen, ded blong Stepan i gat bigfala paoa long laef blong mi. Bambae mi eksplenem samting ya biaen.

MI MI bon long Laskiv long 1932. Long taem ya, i gat ten famle long vilej blong mifala we oli Baebol Studen (hemia nem blong ol Witnes blong Jeova long taem bifo). Papa mama blong mi, tufala i joen wetem olgeta tu. Tufala i givim wan gudfala eksampol olsem wanem blong stap tru long Jeova, gogo tufala i ded afta long yia 1970. Long ful laef blong mi, bigfala tingting blong mi tu i blong stap tru long God.—Ol Sam 18:25.

Long 1939, Seken Bigfala Faet Blong Wol i stat. Ples we mifala i stap long hem long is Polan i kam haf blong Soviet Yunion. Ol Soviet oli rulum ples ya go kasem Jun 1941. Long yia ya, ami blong Jemani i maj i kam insaed long kantri ya.

Long Seken Bigfala Faet ya, mi mi kasem hadtaem long skul. Oli lanem ol pikinini long ol singsing blong leftemap kantri, mo olsem wanem blong faet. Oli lanem mifala blong sakem han bom tu. Be mi mi no wantem singsing wetem olgeta mo lanem blong faet. From we mi mi stanap strong long bilif blong mi long Baebol taem mi mi pikinini nomo, samting ya i givhan long mi blong stap tru long God long olgeta yia biaen.

Plante man oli intres long trutok blong Baebol long ples blong mifala. Taswe, tu paenia (hemia ol Witnes blong Jeova we oli prij fultaem) oli kam stap long ples ya blong givhan long olgeta. Wan long tufala paenia ya, Ilja Fedorovitsch, i stadi Baebol wetem mi, mo i tijim mi blong prij. Taem ami blong Jemani i tekova, oli sanem Ilja i go long wan rabis kalabus blong ol Nasi. Long ples ya, hem i ded.

Traehad Blong Papa Blong No Joen Long Faet

Long 1941, gavman blong Soviet i traem fosem Papa blong saenem wan pepa blong promes se bambae hem i givim mane blong halpem faet. Hem i talem long olgeta se hem i no save joen nating long eniwan long tufala saed blong faet ya, from we hem i wan man blong trufala God. Ale, oli makem Papa se hem i wan enemi blong olgeta, mo oli givim panis long hem se hem i mas go stap fo yia long kalabus. Be hem i stap fo dei nomo. ?From wanem? From we long Sande afta we hem i go kalabus, ami blong Jemani i kam insaed long ples blong mifala.

Taem ol gad blong presin oli harem se ami blong Jemani i stap klosap, oli openem doa blong presin mo oli ronwe. Taem ol presina oli kamaot, ol soldia blong Soviet oli sutum bighaf blong olgeta i ded. Papa i no bin hareap blong ronwe, be biaen nomo, hem i jes go haed long haos blong sam fren blong mifala. Nao hem i sanem wan mesej i go long Mama blong karem ol pepa blong hem i kam, blong pruvum se hem i stap kalabus from we hem i no wantem joenem ol Soviet long faet. Taem Papa i soem ol pepa ya long gavman blong Jemani, oli no kilim hem i ded.

Ol ami blong Jemani oli wantem save nem blong ol man we oli bin givhan long ol Soviet. Oli traem fosem Papa blong talemaot, be hem i no wantem. Hem i eksplenem se hem i no joen nating long eni saed blong faet ya. Sipos hem i bin talemaot sam man mo woman, bambae oli sutum olgeta i ded. Yes, from we Papa i no joen nating long faet, hem i sevem laef blong plante man, mo oli talem tangkiu long hem from.

Wok Haed

Long Ogis 1944, ol soldia blong Soviet oli kambak long Yukren, mo long Mei 1945, Seken Bigfala Faet i finis long Yurop. Biaen, oli blokem mifala wetem Aean Kurtin, blong mifala i no save joen wetem ol man blong narafala kantri. I hadwok blong toktok wetem wan Witnes blong Jeova long nekis kantri ya Polan. Sam Witnes we oli no fraet, oli gokros long Polan long fasin haed blong karem Wajtaoa i kam. Fenis we i seraotem tufala kantri ya, hem i 8 kilometa nomo long haos blong mifala long Laskiv, taswe mi bin harem plante stori blong trabol we olgeta ya oli kasem.

I gat wan Witnes, nem blong hem Silvester, we i go long Polan tu taem mo i kambak sef. Be long namba tri trep, wan gad wetem ol dog blong hem i luk hem. Gad i singaot hem blong stop, be Silvester i ron spid nomo i go. Blong mekem se ol dog oli no kasem hem, hem i mas jiam long wan lugun, i no gat narafala rod. Hem i stap fulnaet long wota ya we i kam antap kasem nek blong hem, insaed long ol longfala gras long wota ya. Taem ol gad oli no moa lukaot hem, hem i kambak long haos, we hem i no moa gat paoa.

Olsem yumi tokbaot fastaem finis, oli kilim i ded Stepan, wan famle blong Silvester, taem hem i stap traem blong krosem mak blong graon blong Polan mo Yukren. Nating se i olsem, mifala i mas gohed blong traehad blong toktok wetem ol man blong Jeova. From ol traehad blong olgeta we oli no fraet blong go kam, mifala i kasem kakae long saed blong spirit mo advaes blong lidim mifala.

Wan naet, long nekis yia ya 1948, mi mi tekem baptaes long wan smol wota klosap long haos blong mifala. Evriwan we oli tekem baptaes oli hivap long haos blong mifala. Be mi mi no luksave olgeta ya from we ples i tudak mo mifala i stap mekem samting ya long fasin haed. Mifala we i tekem baptaes i no toktok tugeta. Mi no save hu nao i givim tok blong baptaes, mo hu i askem ol kwestin blong baptaes long mi taem mifala i stap stanap long saed blong wota, mo hu i draonem mi long wota. Plante yia biaen mi stap storian wetem wan fren, ale mitufala i faenemaot se mitufala tugeta i bin tekem baptaes long naet ya.

Long 1949, Brooklyn i sanem toktok i kam long ol Witnes long Yukren se oli mas traem askem long gavman blong Moscow blong givim raet long olgeta blong prij long Soviet Yunion. Ale, oli sanem wan leta i go long minista blong interia blong givim long Komiti blong Suprem Soviet long U.S.S.R. Nao oli askem long Mykola Pyatokha mo Ilya Babijchuk blong go long Moscow blong harem ansa blong gavman. Tufala i agri, ale long hot taem blong yia ya, tufala i aot i go long Moscow.

Man blong gavman we i toktok wetem tufala ya, hem i lesin long tok blong Baebol we tufala i talem blong eksplenem from wanem yumi stap prij. Tufala i eksplenem se wok ya i mekem profet tok blong Jisas i kamtru se, “bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man.” (Matiu 24:14) Be, man blong gavman ya i talem se neva bambae gavman i givim raet long mifala.

Tufala Witnes ya oli kambak, nao tufala i go long Kiev, we hem i bigfala taon blong Yukren, blong traem kasem raet blong prij long Yukren. Bakegen, gavman i no givim raet. Hem i talem se bambae hem i no moa mekem trabol long ol Witnes blong Jeova sipos oli sapotem gavman. Hemia i min se oli mas joen long ami mo vot. Bakegen, tufala Witnes ya i eksplenem se yumi folem Jisas Kraes, taswe yumi no save joen long politik mo ol bisnes blong wol ya.—Jon 17:14-16.

I no longtaem biaen, oli holem Brata Pyatokha mo Brata Babijchuk, oli faenem poen long tufala, mo oli givim panis long tufala blong stap 25 yia long kalabus. Long yia 1950, oli putum plante Witnes, wetem papa blong mi tu, long kalabus. Oli givim panis blong 25 yia long papa blong mi, mo oli sanem hem i go long Khabarovsk long is saed olgeta blong Soviet Yunion, hemia 7,000 kilometa longwe long mifala.

Kalabus Long Saebiria

Long Eprel 1951, Soviet gavman i girap agensem ol Witnes long ol ripablik long wes, we naoia oli kolem Latvia, Estonia, Lituania, Moldova, Belarus, mo Yukren. Long semfala manis ya, 7,000 blong mifala i go kalabus long Saebiria. Oli tekem mi mo Mama tu. Wan naet ol soldia oli kam long haos, oli karem mitufala i go long ples blong tren. Nao oli lokem mifala insaed long ol bigbigfala bokis we tren i stap pulum blong karem ol buluk. Mifala i samwe long 50 long wan bokis. Moa long tu wik biaen, mifala i kasem wan ples we nem blong hem Zalari, klosap long Lek Baikal long distrik blong Irkutsk.

Mifala i stap stanap long sno, win i kolkol tumas, mo ol soldia wetem masket oli raonem mifala. Mi stap tingbaot wanem samting bambae i hapen long mifala. ?Olsem wanem bambae mi stap tru long Jeova long ples ya? Mifala i stat singsing long ol sing blong Kingdom blong mekem se mifala i no harem i kolkol tumas. Nao sam maneja blong ol bisnes blong gavman long ples ya oli kam. Sam long olgeta oli stap lukaot ol man blong mekem strong wok, mo samfala oli wantem ol woman blong lukaot long ol anamol. Oli karem mi mo Mama i go long ples we oli stap bildim wan Hydroelectric Power stesena blong Tagninskaya.

Taem mitufala i kasem ples ya, mitufala i luk ol smosmol rum we oli wokem long wud, blong ol presina oli slip long olgeta. Oli givim wok long mi blong draevem trakta mo wokem ol lektrik samting. Mama i wok long plantesin. Oli no kolem mifala ol presina, be oli stap talem se mifala ol man we gavman i sakemaot long kantri blong olgeta. Taswe, mifala i fri blong go longwe lelebet long hydro stesen, be i tabu blong go kasem smol vilej we i stap 50 kilometa longwe. Ol haeman oli fosem mifala blong saenem wan pepa se bambae mifala i stap long ples ya olwe. Long tingting blong mi, hemia i longtaem tumas, from we mi mi gat 19 yia nomo. Taswe, mi mi no saenem pepa ya. Nating se i olsem, mifala i stap 15 yia long ples ya.

Naoia, Polan i no moa stap 8 kilometa nomo long mifala, be hem i 6,000 kilometa longwe. Mifala ol Witnes i mekem bes blong mifala blong hivap long ol kongregesen mo putumap ol brata blong lukaot long mifala. Fastaem, mifala i no gat ol buk we oli eksplenem Baebol, sam nomo we ol wanwan Witnes blong Yukren oli bin karem i kam wetem olgeta. Mifala i raetem ol kopi blong olgeta, mo pasem i goraon long mifala evriwan.

I no longtaem, mifala i stat mekem ol miting. Plante blong mifala i stap serem ol smosmol rum ya, taswe klosap evri naet, mifala i joen wanples. I gat samwe 50 brata mo sista long kongregesen blong mifala. Mi mi gat wok blong lidim Tiokratik Skul. I no gat plante brata long kongregesen, taswe ol sista tu oli givim tok. Ol kongregesen blong ol Witnes long ol narafala ples tu oli mekem samting ya long 1958. Olgeta evriwan oli tinghevi long ol tok blong olgeta, oli tingbaot Tiokratik Skul olsem wan rod blong presem Jeova, mo blong leftemap tingting blong ol narafala long kongregesen.

Ol Blesing Long Wok Blong Prij

Samfala we oli no Witnes, oli stap wetem mifala long ol smosmol rum ya. Taswe, mifala i no mestem wan dei blong tokbaot bilif blong mifala wetem olgeta, nating se i tabu blong mekem olsem. Long 1953, lida blong ol Soviet, Joseph Stalin, i ded, nao ol samting i kamgud moa. Oli letem mifala i toktok moa wetem ol narafala long saed blong bilif blong mifala long Baebol. Mifala i kasem wan leta long sam fren long Yukren, we i talem se i gat sam narafala Witnes long ples we mifala i stap long hem, ale mifala i faenem olgeta. Nao mifala i joenem ol kongregesen oli kam ol seket.

Long 1954, mi mared long Olga, we hem tu i aot long Yukren, i kam kalabus wetem mifala. Brata blong Olga nao, Stepan, we ol gad oli bin kilim hem i ded long 1947 long fenis we i seraotem Yukren mo Polan. Long ol yia we oli pas, Olga i givhan gud long mi long wok blong Jeova. Biaen, mitufala i gat wan smol gel, nem blong hem, Valentina.

Mi mo Olga i kasem plante blesing long Kristin wok blong prij long Saebiria. Wan long ol blesing ya hem i George, wan lida blong wan grup blong Baptis Jos. Mitufala i stap visitim hem oltaem mo mekem stadi wetem hem long eni Wajtaoa we mifala i kasem. I no longtaem, George i luksave se ol tok blong Baebol we ol man blong Jeova oli talemaot, hem i trutok. Mitufala i stat mekem stadi wetem sam Baptis fren blong hem tu. Mitufala i glad tumas taem George mo sam fren blong hem oli tekem baptaes blong kam ol brata blong yumi long saed blong bilif.

Long 1956, mi mekem wok blong elda we i goraon blong visitim ol kongregesen. Mi mas visitim wan kongregesen evri wik. Mi wok fuldei blong winim mane, nao long sapa mi ron long moto i go blong joen wetem wan kongregesen. Long nekis moning, mi girap eli mo ron i gobak blong go long wok. Oli putumap Mykhailo Serdinsky blong givhan long mi long wok ya, be sore tumas, long 1958 hem i ded long wan aksiden long trak. Hem i ded long Wenesde, be mifala i jes berem hem long Sande, from we mifala i wantem se plante Witnes oli gat janis blong kam joen wanples blong berem hem.

Wan bigfala grup i stap wokbaot i go long beregraon, mo sam polis oli folem mifala. Long sevis blong berem Mykhailo, sipos mi tokbaot hop blong laef bakegen we Baebol i givim, maet bambae ol polis oli holem mi. Be mi wantem tumas blong tokbaot Mykhailo mo nambawan hop blong hem long fiuja. Mi yusum Baebol long tok blong mi, be ol polis oli no holem mi. Ating oli harem se i blong nating nomo blong holem mi. Mo tu, oli savegud mi from we plante taem mi bin “visitim” olgeta long polis hedkwota blong oli askem kwestin long mi.

Wan Giaman Brata i Ripotem Mifala

Long 1959, ol polis oli holem 12 Witnes we oli stap prij oltaem. Oli singaot sam narafala, wetem mi tu, blong askem kwestin long mifala. Taem oli stap askem kwestin long mi, mi mi sek blong harem olgeta oli tokbaot ol samting long saed blong wok blong mifala we i blong mifala nomo. ?Olsem wanem oli save ol samting ya? I klia se i gat wan giaman brata long medel blong mifala, we i save plante samting, mo i stap wok blong gavman longtaem lelebet.

Polis i putum ol 12 Witnes ya oli stap long ol rum blong presin we wan i klosap long narawan. Ol Witnes ya oli agri se bambae oli no moa talem wan samting nating long polis. Sipos oli mekem olsemia, bambae giaman brata ya i mas kam long kot hem wan blong toktok agens long olgeta. Mi mi no pas long kot, be mi go blong luk wanem bambae i kamaot. Jaj i askem sam kwestin, be ol 12 Witnes oli no ansa nating. Nao wan Witnes we mi bin save hem plante yia finis, nem blong hem Konstantyn Polishchuk, i girap i tok agensem ol 12 Witnes ya. Kot i sakem sam Witnes long kalabus. Afsaed long kot, mi luk Polishchuk.

Mi askem long hem se: “?From wanem yu putum mifala long han blong ol polis?”

Hem i ansa se: “From we mi mi no moa bilif.”

Mi askem se: “?Yu no moa bilif long wanem?”

Hem i se: “Mi no moa save bilif long Baebol.”

Hem i save ripotem mi tu be hem i no bin talemaot nem blong mi long kot. Mi askem long hem from wanem hem i mekem olsem.

Hem i se: “Mi no wantem we yu yu go kalabus. Mi harem nogud yet from samting we i hapen long brata blong woman blong yu, Stepan. Mi nao mi sanem hem i gokros long Polan long naet ya we oli kilim hem i ded. Mi mi rili sore.”

Tok blong hem i mekem tingting blong mi i fasfas. Hem i no gat stret tingting nating. Hem i harem nogud from we Stepan i ded, be hem i no sore nating blong putum ol man blong Jeova long han blong ol polis. Mi no moa luk Polishchuk bakegen. Sam manis biaen, hem i ded. Blong luk wan brata we mi trastem hem plante yia finis, i girap i ripotem ol brata blong mi, samting ya i spolem filing blong mi longtaem. Be mi lanem wan bigfala samting: Polishchuk i no stap tru long Jeova mo ol brata, from we hem i no moa ridim mo bilif long Baebol.

Yumi neva mas fogetem samting ya: Blong stap tru long Jeova, yumi mas stadi Baebol oltaem. Baebol i talem se: “Yu mas lukaot gud blong mekem se ol samting we yu stap tingbaot oltaem, oli stret, from we laef blong yu i stap soemaot tingting blong yu.” Mo tu, aposol Pol i talem long ol Kristin blong lukaot. ?From wanem? “Blong bambae i no gat wan long yufala we tingting blong hem i kam fulap long ol fasin nogud, nao hem i no save bilif long God ya we i laef, i stap we i stap, nao man ya bambae i girap, i gowe long hem.”—Ol Proveb 4:23; Hibrus 3:12.

Gobak Long Yukren

Long 1966, oli letem mifala i aot long kalabus long Saebiria. Mi mo Olga i gobak long Yukren, long wan taon we nem blong hem Sokal, 80 kilometa longwe long L’viv. Mitufala i gat plante wok blong mekem long ples ya, from we i gat 34 Witnes nomo long Sokal wetem tufala taon blong Cervonograd mo Sosnivka we oli stap klosap. Naoia, i gat 11 kongregesen long ples ya.

Bilif blong Olga i stap strong gogo hem i ded long 1993. Tri yia biaen, mi mi mared long Lidiya, mo kam kasem naoia, hem i givhan bigwan long mi blong stanap strong. Mo tu, gel blong mi, Valentina, wetem famle blong hem, oli stap gohed strong long wok blong Jeova, mo olgeta tu oli bin leftemap tingting blong mi bigwan. Be samting we i givim moa glad long mi, hemia se mi mi stap tru long Jeova yet, God ya we hem i holem promes blong hem oltaem.—2 Samuel 22:26.

Alexei Davidjuk i stap tru long Jeova go kasem we hem i ded long Februari 18, 2000, taem mifala i stap mekemrere stori ya blong prentem.

[Futnot]

[Tok blong pija long pej 18]

Kongregesen blong mifala long 1952, we i joen wanples long ol smosmol rum blong slip long is Saebiria

[Tok blong pija long pej 21]

Tiokratik Skul blong mifala long 1953

[Tok blong pija long pej 21]

Sevis blong berem Mykhailo Serdinsky long 1958

[Tok blong pija long pej 22]

Mi wetem woman blong mi Lidiya