Hem i Lego Stronghed Fasin
MAN BLONG WEKAP! LONG FRANIS I RAETEM STORI YA
SAM samting we oli kamaot i no longtaem long Franis oli soemaot klia se long plante pua ples long ol taon, fulap man oli sakemaot loa mo stret fasin. Franis niuspepa ya L’Express i talem se, “long ol taon, fasin blong kilim man i faef taem antap long hemia blong sikis yia bifo.” Mo ol yangfala we oli stap kilim man oli kam plante tumas.
Ol stronghed ya oli stap agensem ol man blong gavman tu, antap long fasin blong olgeta blong spolem ol samting, salem drag, trikim man blong stilim mane, bonem ol haos long faea, mo stilim ol samting. Oli faetem polis, ol man blong kilim faea, ol man blong draevem bas mo taksi, mo sam narafala bakegen.
?From wanem oli raf olsemia? Tu man blong stadi long fasin joen blong ol man oli talem se: “Wan samting se, from we ol famle oli stap seraot, ol yangfala oli wantem soemaot se oli agensem olgeta haeman we oli bos long olgeta.” Tufala i talem se “[ol yangfala] oli harem se ol bigman oli no wantem save long olgeta” mo oli “no gat hop blong wan gudfala fiuja.”
Ol Witnes blong Jeova oli stap talemaot tok blong Baebol we i givim hop, long ol ples we i fulap long ol stronghed ya. I no longtaem i pas, wan man i toktok long televisin long Franis i se: “Ol Witnes blong Jeova oli stap go olbaot long taon mo long ol ples we ol puaman oli stap long hem, ol ples ya we i luk olsem se gavman, polis mo ol man blong givhan, oli lego olgeta finis. Long ol ples olsemia, ol Witnes oli storian wetem ol man mo oli lesin.” Wok blong olgeta i gat gudfala frut. Leta we wan yangfala i raetem i kam long Wekap! i soemaot samting ya.
“Mi mi wantem talem tangkiu long yufala wetem fulhat blong mi from ol buk we yufala i wokem. Yufala i givhan gud long laef blong mi. Mo tu, naoia mi fren moa wetem papa mama blong mi. Mi mi gat 16 yia nomo mo mi wan Muslim.
“Yufala i bin givhan long mi blong lego stronghed fasin. Naoia, mi folem skul blong mi moa, be mi stap ridim Baebol tu. Yufala nao i mekem se mi mi stap gohed yet long edukesen blong mi. Ol Wajtaoa mo Wekap! blong yufala oli bin givhan long sam narafala long ples blong mi tu blong oli livim stronghed fasin. Mi mi stap givim ol buk ya long olgeta evri manis. Mi mi talem tangkiu, mo mi harem se mi no save pembak yufala from samting ya we yufala i mekem.”