Wan Buk We i Save Lidimgud Yu Mo Givim Wan Gudfala Fiuja Long Yu
JEHOVA GOD i no olsem ol rabis enjel. Jehova God i gat olgeta waes mo olgeta paoa. Hem i stamba blong fasin ya blong lavem man. (1 Jon 4:8) Oltaem nomo, advaes blong hem i gud. Hem i givim advaes ya long yu we yu no nid blong pem. Mo hem i tingbaot oltaem blong mekem i gud long yu. !Hemia i defren olgeta long ol man we oli talem se oli gat sam spesel kaen paoa blong mekem i gud long yu! God i talem se: “?From wanem yufala i stap lusum ol mane blong yufala long ol kakae ya we yufala i no save harem gud long hem? ?Weswe yufala i stap lusum ol mane blong yufala, we yufala i stap hadwok tumas from, be yufala i stap hanggri yet? !Yufala evriwan i kam lesin long mi, yufala i mekem olsem we mi mi talem! !Yufala evriwan we i tosta, yufala i kam! !I gat wota i stap! !Yufala we i no gat mane, yufala i kam! !Yufala i kam tekem kakae, yufala i kakae! !Yufala i kam dring waen mo melek, we i no blong pem, i fri nomo! Sipos yufala i mekem olsem, bambae yufala i harem gud, olsem we yufala i kakae ol kakae we i nambawan olgeta.”—Aesea 55:1, 2.
Baebol i kamaot long God ya we i mekem yumi mo i lavem yumi tumas. Taswe ol tok blong Baebol oli save givim wan gudfala fiuja long yumi. Ol tok blong hem oli save lukaot gud long yumi. Oli mekem we yumi no harem se yumi laef blong nating nomo. Mo oli soemaot ol rul we oli beswan blong yumi folem long laef blong yumi. I gud yu tekem taem blong ridim ol kwestin ya mo ol vas blong Baebol we oli givim ansa long ol kwestin ya.
[Bokis blong pija long pej 7]
● ?Olsem wanem blong faenem pis long tingting? Baebol i talem se: “!Hae God i God blong yumi! Hem i tabu we i tabu, fasin blong hem i stret olgeta, mo hem i stap sevem yumi, i stap mekem yumi fri. Hem i talem se, ‘Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem. Sipos yufala i bin obei long ol tok blong mi, ol gudgudfala samting we mi mi save mekem long yufala, bambae oli save kam long yufala, olsem wan gudfala reva we i stap ron. Bambae mi save mekem we yufala i win oltaem nomo, olsem solwota we i stap brok long sanbij mo rif, we neva i save spel.’”—Aesea 48:17, 18.
● ?Rabis man mo rabis fasin bambae i stap olwe? “Ol stret man we yu save trastem olgeta, bambae oli save stap gud long ples ya blong yumi. Be ol man nogud we oli stap mekem ol rabis fasin, bambae God i tekemaot olgeta oli gowe long ples ya. Hem bambae i rutumaot olgeta, olsem we man i stap rutumaot ol smosmol tri long garen.” (Ol Proveb 2:21, 22) Yes, God bambae i spolem ol rabis man wetem ol rabis enjel tu. Olgeta ya bambae oli lus we bambae yumi no moa save faenem olgeta, i olsem taem faea i kakae wan samting nao i lus olgeta.—Revelesen 20:10, 14.
● ?I tru se wan dei bambae i no moa gat man i sik mo i no moa gat man i harem nogud long bodi blong hem? “!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo [hemia ol trabol we oli stap kasem yumi tede] oli lus olgeta.”—Revelesen 21:3, 4.
Ol rabis enjel oli man blong giaman. Be neva God i giaman. Baebol i talem se God “i no save giaman.” (Taetas 1:2) Mo tu, trutok blong God i mekem man i fri mo i givim laef. Nekis haf bambae i soemaot samting ya.—Jon 8:32; 17:3.