Wan Nambawan Fiuja

Setan wetem ol rabis enjel blong hem, oli gat smoltaem nomo i stap, blong oli giaman long ol man. Jehova i sakemaot olgeta finis, oli aot long heven. (Revelesen 12:9) I no longtaem, bambae God i agensem Setan mo ol rabis enjel blong hem bakegen. God i givim wan vison long aposol Jon, nao hem i talem se: “Nao mi luk wan enjel we i aot long heven i kamdaon. Long han blong hem, hem i stap holem ki blong lokem bigfala hol ya we i godaon we i godaon olgeta, mo i stap holem wan bigfala jen. Nao hem i holem bigfala algita ya, we hemia snek ya blong bifo, we nem blong hem “Setan,” no “Man we i stap agensem man.” Nao hem i fasem hem long jen ya blong i stap wan taosen yia, mo i sakem hem i go long bigfala hol ya, mo i lokem doa blong hol. Mo hem i putum mak long doa ya blong bambae man i no openem, blong bambae algita ya i no moa giaman long ol man, blong pulum olgeta oli go krangke, gogo wan taosen yia i pas.” (Revelesen 20:1-3) Biaen, Setan wetem ol rabis enjel blong hem bambae oli lus blong olwe.—Revelesen 20:10.

Ol rabis man long wol tu bambae oli lus.—Ol Sam 37:9, 10; Luk 13:5.

!Ol Dedman Bambae Oli Laef Bakegen!

Taem Setan wetem ol rabis enjel oli no moa stap, Jehova bambae i givim fulap blesing long ol man. Yu traem tingbaot ol dedman, we oli no save wan samting nating. Jisas i talem se ded i olsem we man i slip —slip we i no gat drim. (Jon 11:11-14) Hem i talem olsem from we hem i save se long fiuja ol man we oli stap slip long beregraon, we oli ded bambae oli wekap, oli laef bakegen. Hem i talem se: “I gat taem i stap kam we ol dedman bambae . . . oli aot long beregraon blong olgeta.”—Jon 5:28, 29; skelem Ol Wok 24:15.

Bambae oli laef bakegen long wol ya nomo. Bambae i no moa gat ol ded mesej. !Bambae i gat ol gudfala mesej we oli talemaot nem blong olgeta we oli laef bakegen long ded! !Yu traem tingbaot bigfala glad we bambae yu kasem, taem olgeta we yu lavem olgeta tumas oli kamaot long beregraon, mo yu save welkamem olgeta!