Ol Bigfala Etkwek ?Profet Tok Blong Baebol i Talem Wanem?
Evri yia, i gat plante taosen etkwek long wol. Bighaf oli smol nomo, be ol bigfala etkwek oli spolem gud ol samting, oli mekem plante man i safa, mo plante man oli ded tu. Samtaem ol tsunami oli kamaot from, we oli spolem ol ples klosap long solwota, mo kilim plante man i ded. ?Olsem wanem? ?Baebol i talemaot finis ol etkwek ya?
Long atikol ya
?Profet tok blong Baebol long ol etkwek i soemaot wanem long yumi?
Ol rong tingting long saed blong profet tok blong Baebol mo ol etkwek
?Profet tok blong Baebol i talemaot ol etkwek?
Jisas i tokbaot ol etkwek long wan profet tok we i stap long tri buk blong Baebol:
“Bambae ol nesen oli faet agensem ol narafala nesen, mo ol kingdom oli faet agensem ol narafala kingdom. Mo olbaot long wol bambae kakae i sot mo graon i seksek.”—Matiu 24:7.
“Bambae ol nesen oli faet agensem ol narafala nesen, mo ol kingdom oli faet agensem ol narafala kingdom. Mo olbaot long wol bambae graon i seksek. Mo tu, kakae bambae i sot.”—Mak 13:8.
“Bambae graon i seksek bigwan. Mo olbaot long wol bambae kakae i sot mo i gat ol strong sik.”—Luk 21:11.
Jisas i talemaot se bambae “graon i seksek bigwan . . . olbaot long wol.” Long semtaem bambae i gat faet, kakae i sot, mo ol strong sik. Taem ol samting ya i hapen wantaem, hemia i makemaot taem ya we Baebol i kolem “lashaf blong sistem blong wol ya” o “ol las dei.” (Matiu 24:3; 2 Timoti 3:1) Folem ol impoten yia we Baebol i makem, “ol las dei” oli stat long 1914 mo oli stap gohed yet.
?Ol etkwek tede oli mekem profet tok blong Baebol i kamtru?
Yes. Profet tok blong Jisas, wetem ol tok we hem i talem long saed blong ol etkwek, i stret long ol samting we i stap hapen long taem blong yumi. Stat long 1914, i gat moa long 1,950 bigfala etkwek, mo bitim tu milian mana oli ded from. Tingbaot sam we oli hapen long handred yia we i pas.
2004—Solwota Blong India. Wan bigfala etkwek we oli makem paoa blong hem se 9.1, i mekem wan tsunami we i kasem 12 kantri mo samwe long 225,000 man i ded from.
2008—Jaena. Wan etkwek we paoa blong hem i 7.9, i distroem plante vilej mo taon, mo oli ting se 90,000 man i ded, samwe long 375,000 i kasem kil, mo plante milian oli lusum haos blong olgeta.
2010—Haiti. Wan etkwek we paoa blong hem i 7.0, mo i gohed blong seksek plante taem biaen, i kilim i ded bitim 300,000 man mo i spolem haos blong wan milian narafala man.
2011—Japan. Wan etkwek we paoa blong hem i 9.0 mo tsunami we i kamaot biaen, i kilim i ded samwe long 18,500 man mo plante taosen moa oli ronwe long haos blong olgeta. Etkwek ya i mekem se i gat damej long niuklia enjin long Fukushima, nao wan bigfala aksiden i hapen. Ten yia biaen, samwe long 40,000 man oli no kambak yet long haos blong olgeta klosap long Fukushima, from we i gat tumas posen gas long eria ya.
?Profet tok blong Baebol long ol etkwek i soemaot wanem long yumi?
Profet tok blong Baebol long ol etkwek i givim woning long yumi long samting we bambae i hapen i no longtaem. Jisas i talem se: “Taem yufala i luk ol samting ya oli stap kamtru, yufala i mas save se Kingdom blong God i klosap.”—Luk 21:31.
Baebol i eksplenem se Kingdom blong God i wan prapa gavman long heven, we Jisas Kraes i King blong hem. Jisas i tijim ol man blong hem blong prea from Kingdom ya.—Matiu 6:10.
Taem Kingdom blong God i rulum fulwol, God bambae i blokem ol disasta, hemia ol etkwek tu, blong oli no moa spolem ol man. (Aesea 32:18) Antap long hemia, bambae hem i fiksimap ol trabol we ol etkwek tede oli mekem long bodi mo filing blong ol man. (Aesea 65:17; Revelesen 21:3, 4) Blong save moa, ridim atikol ya “?Kingdom Blong God Bambae i Mekem Wanem?”
a Ol namba ya oli kamaot long Global Significant Earthquake Database we United States National Geophysical Data Center i lukaotem.