Loo Ebe Na Tie Ẹre Sọyẹnmwẹ Arrọọ Vbe Etẹbitẹ! Ya Ru Iyobọ Ne Emwa Ya Mu Ẹtin Yan E Jehova Kevbe Jesu

Emwa ne ima gu ruẹ emwi ke sẹtin gha ru emwi nọ yẹẹ e Jehova, ọ khẹke ne iran gha mwẹ amuẹtinyan nọ wegbe. (Hib 11:6) Ma gha sẹtin loo ebe na tie ẹre Sọyẹnmwẹ Arrọọ Vbe Etẹbitẹ! ya ru iyobọ ne iran. Avbe efoto ne mosee, avbe vidio ni gua ọmwa kpa, avbe ọta nọ khẹke ne ima nọ kevbe ako e Baibol ni ru ekpataki wa rre ebe na. Odẹ ne khuẹrhẹ ẹre a vbe ya gbẹn ọnrẹn. Ma gha ru iyobọ ne emwa ne ima maa ẹre emwi ya sikẹ e Jehova, ma na vbe ru iyobọ ne iran ya gha yin vbe nọ khẹke Ivbiotu e Kristi, iran ghi do gha mwẹ amuẹtinyan nọ wegbe.​—1 Kọr 3:12-15.

Emwa eso keghi roro ẹre wẹẹ iran i khian sẹtin gha re ọsie Osanobua rhunmwuda ne iran i na bẹghe ẹre. Rhunmwuda ọni, ọ khẹke ne ima ru iyobọ ne iran ya rẹn e Jehova sayọ kevbe ne iran mu ẹtin yan rẹn.

GHEE VIDIO NỌ MWẸ UHUNMWUTA NỌ KHARE WẸẸ, LOO EBE NA TIE ẸRE “SỌYẸNMWẸ ARRỌỌ VBE ETẸBITẸ!” YA RU IYOBỌ NE EMWA YA MU ẸTIN YAN E JEHOVA, IYEKE ỌNI, A GHI ZẸ EWANNIẸN YE AVBE INỌTA NA:

• Vbe ima ya rẹn hẹ wẹẹ, ọtẹn ima nokhuo gele mu egbe yotọ khẹ iruẹmwi na?

• Vbe iran ziro yan emwi nọ rre ebe Aizaia 41:10, 13, de vbene ọtẹn na ya ya ẹwaẹn nọ ọmwa nọ maa ẹre emwi ọta eso, nọ mieke na rẹn emwi nọ rre ọre ekhọe?

• De vbene ọ ghaa ye ọmwa na maa ẹre emwi hẹ vbe ekhọe, vbe iran ghi ghee vidio kevbe vbe iran ghi tie avbe ako ọghe Baibol nii nẹ?

Emwa nibun ma rẹn emwi na ya izọese adẹwerriegbe ọghe Jesu kha, eso i vbe ghee ẹre zẹvbe emwi ne Osanobua ya ru iran ẹse. (Gal 2:20) Rhunmwuda ọni, ọ khẹke ne ima ru iyobọ ne iran ya mu ẹtin yan izọese adẹwerriegbe ọghe Jesu.

GHEE VIDIO NỌ MWẸ UHUNMWUTA NỌ KHARE WẸẸ, LOO EBE NA TIE ẸRE “SỌYẸNMWẸ ARRỌỌ VBE ETẸBITẸ!” YA RU IYOBỌ NE EMWA YA MU ẸTIN YAN JESU, IYEKE ỌNI, A GHI ZẸ EWANNIẸN YE AVBE INỌTA NA:

• Vbe ima ya rẹn hẹ wẹẹ, ọtẹn ima nokpia gele mu egbe yotọ khẹ iruẹmwi na?

• De vbene ọ ya loo emwi nọ rre abọ na tie ẹre “Ruẹ Sayọ” ya ru iyobọ ne ọmwa nọ maa ẹre emwi?

• Vbọzẹ nọ na khẹke ne ima gha na erhunmwu ne ọmwa ne ima maa ẹre emwi?