E Baibol Gha Sẹtin Ru Iyobọ Nuẹn Vbe U Ghaa Khuọnmwi Emianmwẹ Nọ Wegbe Ra?

Ewanniẹn ne Baibol rhie ye inọta na

Ẹẹn. Osanobua i rhie aro gberra eguọmwadia re ni khuọnmwi. E Baibol gi ima rẹn wẹẹ, ọ gha ru iyobọ ne iran vbe ẹghẹ ne egbe ma ya rran iran. (Psalm 41:3) Deghẹ ọ mwẹ emianmwẹ ne u khuọnmwi nọ ma fo vbe otọ, emwi eha na khian guan kaẹn na, gha wa ru iyobọ nuẹn:

1. Na erhunmwu ne Osanobua ru iyobọ nuẹn ya sẹtin zin egbe. U gha ru vberriọ, u gha miẹn “ọfunmwegbe Osanobua, nọ gberra ne ọmwa ne agbọn gha sẹtin rẹn otọ ẹre.” Ọna gha ya orhiọn ruẹ sotọ, ẹghẹ nii, u i ghi si osi gbe, u ghi vbe sẹtin zin egbe.​—Filipai 4:​6, 7.

2. Hia ne u gha ghọghọ. E Baibol khare wẹẹ: “Aro ọmwa ghaa maan vbe uhunmwu vbe ẹghẹ hia, egberranmwẹ ẹre ọ rhie gie ọmwa; emianmwẹ uwu ne huẹẹ nọ, ne egbe wa gha kan ọmwa vbe ẹghẹ hia.” (Itan 17:22) Hia ne u gha gbọdẹn, ne u vbe gha muẹnmuẹn ogiẹ vbe ẹghẹ hia. Ọna gha ru iyobọ nuẹn deghẹ ọ mwẹ ẹghẹ eso ne iro ya han ruẹ; ọ wa vbe mwẹ iyobọ nọkhua nọ ye ne egbe.

3. Gha mwẹ ọnrẹn vbe orhiọn wẹẹ emwi hia gha dunna vbe odaro. Ọna gha ru iyobọ nuẹn ya gha sọyẹnmwẹ agharhemiẹn wẹẹ, emianmwẹ ne u khuọnmwi ma fo vbe otọ. (Rom 12:12) E Baibol khare wẹẹ ẹghẹ dee, nai khian ghi ya miẹn ọmwa “nọ gha kha wẹẹ irẹn khuọnmwi.” (Aizaia 33:24) Ẹghẹ nii, Osanobua gha wabọ re rua, avbe emianmwẹ ni wegbe ne emwa nagbọn ma sẹtin gbe. Vbe igiemwi, e Baibol khare wẹẹ ẹghẹ dee, nai khian ghi ya gha khian ọmaẹn. Ọ khare wẹẹ egbe avbe ọmaẹn “ghi do dọlegbe gha ru ọvbokhan ọvbokhan, ọ ghi situa.”​—Job 33:25.

Emwi nọ khẹke ne u yẹrẹro: Agharhemiẹn wẹẹ ima ne Avbe Osẹe Jehova yayi wẹẹ Osanobua ru iyobọ ne ima, te ima wa ye bu avbe ọbo ebo ne iran gbaroghe ima vbe ima ghaa khuọnmwi. (Mak 2:17) Vbọrhirhighayehẹ, ma i tama emwa odẹ ne iran gha ya gbaroghe egbe iran; dọmwadẹ ọghẹe, ẹre ọ zẹ ne egbe ẹre.