U Gha Ye Miẹn Emwi Ruẹ Vbe Imamwaemwi Ni Rre Baibol Ne U Ka Wa Ruẹ Ra?

1. De vbene imamwaemwi ni rre Baibol ya fi ẹdagbọn ruẹ werriẹ hẹ, vbe ẹghẹ okaro ne u ya ruẹ vbekpa ẹre?

IMAMWAEMWI ni rre Baibol ne ima ka wa ruẹ wa fi ẹdagbọn ima werriẹ. Vbe igiemwi, ma ghi do rẹn wẹẹ, eni Osanobua ọre Jehova, ma na do sikẹ ọre sayọ. (Aiz 42:8) Vbe ima ghi do rẹn ẹmwata nọ rrọọ vbekpa emwa ni wulo nẹ, ma ma ghi gha roro ẹre wẹẹ, emwa ima ni wulo rri oya. (Asan 9:10) Ma ghi vbe do rẹn vbekpa eyan ne Osanobua yan rẹn nọ na we irẹn gha ya uhunmwu otagbọn na khian e Paradais, ma ma ghi gha si osi ye ẹmwẹ vbene ẹdagbọn ima khian gha ye hẹ vbe odaro. Ma keghi do gha mwẹ ilẹkẹtin wẹẹ, te ima khian gha rrọọ vbe etẹbitẹ, ẹ i re vbe ovbi ẹghẹ kherhe vbe na ghee ukpo 70 ra 80 ne emwa tọ sẹ vbe ẹdẹnẹrẹ.​—Psm 37:29; 90:10.

2. De vbene ebe 2 Pita 1:​12, 13 ya rhie ẹre ma wẹẹ, Ivbi Otu e Kristi ni deziẹn gha ye sẹtin miẹn ere vbe imamwaemwi ne ima ka wa ruẹ?

² Te ọ khẹke ne ima gha ya aro nọ maan ghee avbe imamwaemwi ne ima ka wa ruẹ vbe Baibol. Ivbi Otu e Kristi ni “deziẹn ye uwu ẹmwata” ẹre Pita gbẹn elẹta nogieva gie. (Tie 2 Pita 1:​12, 13.) Vbe ẹghẹ na kha na, emwa dan ghaa rre uwu iko, ni ghaa hoo ne iran ya imamwaemwi ohoghe mu etẹn rẹrẹ. (2 Pit 2:​1-3) Te Pita ghaa hoo nọ ru iyobọ ne etẹn na, ne iran mieke na sẹtin lẹẹ ne imamwaemwi ohoghe na. De vbene Pita ya ru ọna hẹ, ọ keghi ye iran ẹre rre imamwaemwi eso ne iran ka ruẹ. Avbe imamwaemwi na ẹre ọ khian ru iyobọ ne iran ya rhikhan mu e Jehova ya sẹ ufomwẹ.

3. Vbọzẹ nọ na khẹke ne Ivbi Otu e Kristi ye gha muẹn roro imamwaemwi ni rre Baibol ne ima ka wa ruẹ? Ru igiemwi yọ.

³ Zẹvbe ne ima ya deziẹn vbe odẹ ẹmwata, ma sẹtin miẹn emwi ọgbọn ruẹ vbe imamwaemwi ne ima ka ruẹ vbe Baibol. Vbe igiemwi: Ọmwa nọ gua wa le evbare kẹ kevbe ọmwa nọ ma he wa guẹ vberriọ sẹtin ya emwi ọkpa le evbare. Sokpan, rhunmwuda nọ na kpẹẹ nẹ, ne ọmwa nọ gua wa le evbare nii ke loo avbe emwi na, ọ gha sẹtin loo ẹre ya le evbare ughughan nọ rhiẹnrhiẹn. Erriọ ẹre ọ vbe ye, emwi ne emwa nii kpẹẹ nẹ vbe otu e Jehova gha miẹn ruẹ vbe imamwaemwi na ka wa ruẹ vbe Baibol sẹtin lughaẹn ne ọghe emwa ni da suẹn gha ga e Jehova. A sẹtin miẹn wẹẹ, afiwerriẹ eso rhiegbe ma nẹ vbe ẹdagbọn ima, kevbe wẹẹ, iwinna ne ima ru vbe ugamwẹ e Jehova vbe fi werriẹ nẹ ke obọ ne ima ya dinmwiamẹ. Rhunmwuda ọni, ma gha muẹn roro vbene imamwaemwi ni rre Baibol ya dekaẹn vbene emwi ghi ye hẹ nian, ma ghi do miẹn emwi ọgbọn ruẹ vbọ. Gi ima guan kaẹn emwi ne Ivbi Otu e Kristi ni deziẹn gha miẹn ruẹ vbe imamwaemwi eha ni rre Baibol ne ima ka wa ruẹ.

E JEHOVA ỌRE AYI NỌ YI EMWI HIA

4. Vbọ ye ima hẹ ne ima na rẹn wẹẹ, e Jehova ọre Ayi nọ yi emwi hia?

⁴ “Osanobua ẹre ọ yi emwi hia.” (Hib 3:4) Ma rẹnrẹn wẹẹ, Osa ne olẹtin kevbe nọ mwẹ ẹwaẹn sẹ vbe agbọn vbe ẹrinmwi, ẹre ọ yi uhunmwu otagbọn na kevbe emwi hia ni rrọọ. Irẹn ẹre ọ yi ima, rhunmwuda ọni, ọ rẹn ima sẹ otọ ibiẹ. Vbe deba ọni, ọ mwẹ ẹmwẹ ima vbe orhiọn. Ọ vbe rẹn emwi nọ gha ya agbọn maan ima. Ne ima na rẹn wẹẹ, e Jehova ọre Ayi nọ yi emwi hia wa fi ẹdagbọn ima werriẹ, ọ vbe ya ima mwẹ isọkẹn vbe ẹdagbọn ima.

5. De emwi nọ khian ru iyobọ ne ima ya gha mu egbe rrie otọ? (Aizaia 45:​9-12)

⁵ Ne ima na rẹn wẹẹ, e Jehova ọre Ayi nọ yi emwi hia vbe ma ima re wẹẹ, te ọ khẹke ne ima gha mu egbe rrie otọ. Vbe Job ghaa hoo nọ rhie ẹre ma wẹẹ, irẹn i mwẹ abakuru rhọkpa, kevbe vbe ọ ghaa ta ẹmwẹ eso nọ ma gba vbekpa e Jehova, e Jehova keghi ye ẹre rre wẹẹ, irẹn ọre Osa ne Udazi nọ yi emwi hia. (Job 38:​1-4) Ọna keghi ru iyobọ ne Job ya rẹn wẹẹ, e Jehova i ru emwi nọ ma gba. Akhasẹ ighẹ Aizaia wa so igiẹ ye ọna vbe ọ khare wẹẹ: “Obuẹ vbe nọ ọmakhe wẹẹ: ‘De emwi ne u ru yi?’”​—Tie Aizaia 45:​9-12.

6. De ẹghẹ ne ima gha ya sẹtin muẹn roro ẹwaẹn kevbe ẹtin ne Jehova mwẹ nọ ya yi emwi hia? (Vbe ya ghee avbe efoto.)

⁶ Adeghẹ Ovbi Otu e Kristi nọ kpẹẹ nẹ vbe otu e Jehova ma begbe, ọ sẹtin do gha ya ẹmwẹ obọ ọre ru emwi, nọ gha te ya gha lele adia ni rre uwu Ẹmwẹ ọghe Jehova. (Job 37:​23, 24) Sokpan, adeghẹ, ọ na gele gha muẹn roro vbene Jehova mwẹ ẹwaẹn hẹ kevbe ẹtin nọ mwẹ nọ ya yi emwi hia ghi vbo? (Aiz 40:22; 55:​8, 9) Ọna gha ru iyobọ nẹẹn ya gha mu egbe rrie otọ, ọ ghi vbe rẹn wẹẹ, e Jehova mwẹ ẹwaẹn sẹ irẹn.

7. De emwi ne Rahela ru nọ ru iyobọ nẹẹn ya miẹn ọnrẹn yi afiwerriẹ nọ rhiegbe ma vbe otu e Jehova?

⁷ E Rahela, nọ rre Slovenia, keghi do bẹghe ẹre wẹẹ, ne irẹn na gha mu ẹmwẹ Ayi ọghe irẹn roro, wa ru iyobọ ne irẹn ya sẹtin miẹn ọnrẹn yi afiwerriẹ eso ni rhiegbe ma vbe otu e Jehova. Ọ khare wẹẹ: “Ugbẹnso, ọ ma gha khuẹrhẹ mẹ ne I sẹtin lele adia nọ ke obọ etẹn ni mu asanikaro rre. Vbe igiemwi, uhiẹn vbe I ghee Ayahọmwaehọ Nọ Ke Obọ Ẹbu Nọ Su Rre Vbe 2023 #8, te ọ ye kpa mwẹ odin vbe I bẹghe ọtẹn nọ bọ ẹtu vbe ọ ya ọta guan. Ẹre I na ghi na erhunmwu gie Jehova nọ ru iyobọ mẹ ne I sẹtin miẹn afiwerriẹ na yi.” E Rahela keghi do bẹghe ẹre wẹẹ, zẹvbe Ayi nọ yi agbọn yi ẹrinmwi, e Jehova gha sẹtin dia otu ọghẹe vbe odẹ nọ khẹke. Adeghẹ ọ na gha lọghọ ruẹ ne u sẹtin miẹn ọnrẹn yi afiwerriẹ nọ rhiegbe ma vbe odẹ ne ima ya rẹn otọ emwi eso, hia ne u mu egbe rrie otọ, u ghi muẹn roro vbene Ayi ọghomwa mwẹ ẹwaẹn kevbe ẹtin hẹ.​—Rom 11:​33-36.

EVBỌZẸE NE OSANOBUA NA KUE YỌ NE EMWA GHA SẸ USẸ

8. De ere ne ima lae miẹn rhunmwuda ne ima na rẹn evbọzẹe ne Jehova na kue yọ ne emwa gha sẹ usẹ?

⁸ Vbọzẹ ne Osanobua na kue yọ ne emwa gha sẹ usẹ? Emwa eso ni ma rẹn ewanniẹn ọghe ọta na keghi mu ohu Osanobua, iran ma kue yayi wẹẹ, Osanobua zẹdẹ rrọọ! (Itan 19:3) Sokpan, uwẹ ruẹ ọre nẹ wẹẹ, orukhọ kevbe amagba ne ima re vbe ukhu ẹre ọ si ẹre ne emwa na sẹ usẹ, ẹ i re Jehova. U vbe ruẹ ọre nẹ wẹẹ, ne Jehova na zin egbe, ẹre ọ kie ẹkpotọ yọ ne ẹbu emwa ni bun ya fi werriẹ, iran na vbe do rẹn vbene Jehova khian ya wabọ usẹ fo fẹfẹfẹ. (2 Pit 3:​9, 15) Te ọna wa mu ruẹ orhiọn sẹ otọ, ọ na vbe ya ruẹ sikẹ e Jehova sayọ.

9. De ẹghẹ eso ne ima gha ya sẹtin muẹn roro evbọzẹe ne Jehova na kue yọ ne emwa gha sẹ usẹ?

⁹ Ma rẹnrẹn wẹẹ, te ọ khẹke ne ima zin egbe vbene Jehova te wabọ usẹ hin agbọn na rre. Ọrheyerriọ, adeghẹ ima ra emwa ne ima hoẹmwẹ ọnrẹn na gha rre uwu ọlọghọmwa, a na ya obọ dan mu ima, ra emwi eso na wii ima, ma sẹtin do gha roro ẹre evbọzẹe ne Jehova ma na he ye zẹ emwi ru. (Hab 1:​2, 3) Egbe ẹghẹ vbenian, ẹre ọ khẹke ne ima ya muẹn roro evbọzẹe ne Jehova na kue yọ ne emwa esi gha sẹ usẹ.a (Psm 34:19) Ma sẹtin vbe muẹn roro emwamwa ne Jehova ru nọ khian ya rhie usẹ hin agbọn na rre vbe etẹbitẹ.

10. Vbọ fu Anne ẹko rre vbe iyẹe wu?

¹⁰ Ma gha rẹn ẹmwata nọ rrọọ vbekpa evbọzẹe ne ima na sẹ usẹ, ọ gha ru iyobọ ne ima ya sẹtin zin egbe ọlọghọmwa. Anne nọ rre Mayotte nọ re otọ ne amẹ lẹga vbe Indian Ocean khare wẹẹ: “Vbe iye mwẹ wu vbe ukpo eso nọ gberra, te ọ wa da mwẹ sẹ ugboloko. Vbọrhirhighayehẹ, ẹghẹ hia ẹre I ya gha ye egbe mwẹ ẹre rre wẹẹ, ẹ i re Jehova ẹre ọ si ẹre ne ima na sẹ usẹ. Te ọ wa hoo nọ wabọ usẹ hin agbọn na rre, ọ ghi vbe huẹn emwa ima ni wulo kpaegbe. Te ena hia wa fu mwẹ ẹko rre vbe I gha muẹn roro.”

11. Ma gha rẹn evbọzẹe ne Jehova na kue yọ ne emwa gha sẹ usẹ, vbọ khian ya ru iyobọ ne ima ya rhiegba ye iwinna ikporhu hẹ?

¹¹ Ma gha rẹn ẹmwata nọ rrọọ vbekpa evbọzẹe ne ima na sẹ usẹ, ọ gha ru iyobọ ne ima ya rhiegba ye iwinna ikporhu. E Pita ghi rhan otọ ọre nẹ wẹẹ, ẹkpotọ gha kie ne emwa ni bun ya miẹn fan rhunmwuda izinegbe ọghe Jehova, ọ na kha wẹẹ: “Wa muẹn roro, aro emwa nọ khẹke ne uwa gha khin, wa ghi hia ne uwa gha mwẹ uyinmwẹ nọhuanrẹn, wa ghi vbe gha yin vbe odẹ nọ gha rhie ẹre ma wẹẹ, emwa ni rhiegbe ye ugamwẹ Osanobua ẹre uwa khin.” (2 Pit 3:11) Ọkpa vbe usun odẹ ne ima gha ya rhie ẹre ma wẹẹ, “emwa ni rhiegbe ye ugamwẹ Osanobua” ẹre ima khin ọre ne ima rhiegba ye iwinna ikporhu. Vbe na ghee Erha ima nọ rre ẹrinmwi, ma hoẹmwẹ emwa. Ma vbe hoo ne iran gha rre agbọn ọgbọn nọ dee. Te Jehova zin egbe rhunmwuda, ọ hoo ne emwa ni rre ẹdogbo ruẹ do ga irẹn. U miẹn uyi nọkhua ne Jehova mu yọ ruẹ egbe ne u na deba ẹre winna, kevbe ne ẹkpotọ na kie nuẹn ya ru iyobọ ne emwa ni bun ya sẹtin do rẹn vbekpa e Jehova vbene agbọn na te sẹ ufomwẹ!​—1 Kọr 3:9.

“ẸDẸ OKIEKIE” ẸRE IMA YE

12. De vbene ọ he ya ru iyobọ ne ima hẹ, ne ima na rẹn wẹẹ, “ẹdẹ okiekie” ẹre ima ye na?

¹² E Baibol wa gi ima rẹn vbene emwa khian ya gha yin hẹ vbe “ẹdẹ okiekie.” (2 Tim 3:​1-5) Ma gha bẹghe odẹ ne emwa ghi ya yin vbe ẹdẹnẹrẹ, ma gha wa kue yọ wẹẹ, ẹmwata ẹre Baibol tae. Zẹvbe ne uyinmwẹ emwa ya rhia yọ rhia yọ, ọ keghi ru iyobọ ne ima ya rẹn wẹẹ, ẹmwata ne uhunmwu ẹmwẹ ẹre Baibol tae.​—2 Tim 3:​13-15.

13. Zẹvbe nọ rre ebe Luk 12:​15-21, de ọta eso ne ima gha sẹtin nọ egbe ima re?

¹³ Ne ima na rẹn wẹẹ, ẹdẹ okiekie ẹre ima ye na, keghi ru iyobọ ne ima ya rhie aro tua emwi ni gele ru ekpataki sẹ. Erre ne Jesu zẹ vbe ebe Luk 12:​15-21 ya ima rẹn vbene ọ hin usi sẹ hẹ na mu emwi ni ru ekpataki sẹ karo. (Tie ẹre.) Vbọzẹ ne Jesu na tie okpia nii nọ fe “akpa vbe abobo”? Ẹ i re rhunmwuda ne okpia nii na fe, sokpan rhunmwuda nọ ma na mu emwi ni ru ekpataki sẹ karo ẹre ọ si ẹre na na tie ẹre akpa vbe abobo. Te okpia na wa “si ẹfe koko ne egbe ẹre, sokpan, [ọ] ma fe vbe odaro Osanobua.” Emwi ukọnmwẹ ẹre okpia na wa ru nọ ma na loo ẹghẹ ọre ẹse. Rhunmwuda, Osanobua keghi tama okpia na wẹẹ: “Vbe asọn na, a gha miẹn ruẹ uhunmwu.” Zẹvbe ne ufomwẹ agbọn na ya sikẹ otọ, ma sẹtin nọ egbe ima wẹẹ: ‘Emwi ne I hoo ne I ya ẹdagbọn mwẹ ru rhie ẹre ma wẹẹ, I loo ẹghẹ mwẹ ẹse ra? De emwi ne I hoo ne ivbi mwẹ ya ẹdagbọn iran ru? I loo ẹrhiọn mwẹ, ẹghẹ mwẹ kevbe emwi ne I mwẹ ya si ẹfe koko ne egbe mwẹ ra, ra te I yae si ẹfe koko ye ẹrinmwi?’

14. Zẹvbe ne ima bẹghe ẹre vbe igiemwi ọghe Miki, vbọzẹ nọ na khẹke ne ima gha muẹn roro, emwi ni rhie ẹre ma wẹẹ, ẹdẹ okiekie ẹre ima ye na?

¹⁴ Ma ghaa muẹn roro, emwi ni rhie ẹre ma wẹẹ, ẹdẹ okiekie ẹre ima ye na, ọ gha ru iyobọ ne ima ya rẹn emwi nọ khẹke ne ima ya ẹdagbọn ima ru. Ọna ọre emwi nọ sunu daa ọtẹn nokhuo ọkpa na tie ẹre Miki. Ọ khare wẹẹ: “Vbe I ladian vbe owebe ne ukpogieva, I na gha hoo ne I gha ru iwinna nọ gha ya mwẹ ruẹ vbekpa avbe aranmwẹ. I vbe gha hoo ne I ru iwinna arọndẹ kevbe ne I vbe ya ga vbe eke na na gualọ iyobọ etẹn. Etẹn ni wẹro keghi tama mwẹ ne I muẹn roro deghẹ I gha sẹtin gha ru iwinna nii, ne I vbe sẹtin ru emwi ne I hoo ne I ru vbe ugamwẹ e Jehova. Iran keghi ye mwẹ ẹre rre wẹẹ, ẹ i rree gbe agbọn na sẹ ufomwẹ. Sokpan, vbe agbọn ọgbọn ẹkpotọ gha kiẹ mẹ ya ruẹ vbekpa aranmwẹ ni bun vbe etẹbitẹ. I keghi ya ruẹ iwinna obọ vbe owebe ọkpa, sokpan ẹghẹ ne I gbe vbe owebe na ma sẹ vbe ẹghẹ ne I gha te loo vbe I ghaa ruẹ vbekpa avbe aranmwẹ. Ọna keghi kie ẹkpotọ mẹ ya gha ru iwinna ne I ya gha gaga egbe zẹvbe ne I ya gha ru iwinna arọndẹ, ọ ghi vbe sẹ ẹghẹ, I na kpa gha rrie Ecuador, ya ga vbe eke na na gualọ iyobọ etẹn.” Iwinna ọgbaroghe ọghe otako ẹre Miki vbe ọdafọn ọnrẹn ghi ru nian vbe ẹvbo nii.

15. De aro ne emwa eso ya ghee iyẹn nọ maan ne ima kporhu ẹre? Ru igiemwi yọ. (Vbe ya ghee avbe efoto.)

¹⁵ Ọ ma khẹke ne egbe wọọ ima deghẹ emwa ma na rhie ehọ ne ima ta yi vbe ima ghaa kporhu ma iran. Emwa sẹtin fi werriẹ. Gia guan kaẹn igiemwi ọghe Jems, ne irẹn vbe Jesu gba re ovbi iye. Aro ọre sẹ ọre vbene Jesu ya gha waan, ọ ke do khian Mezaia, ọ vbe bẹghe odẹ nọ dagbẹn ne Jesu ya gha ma emwa emwi. Ọrheyerriọ, e Jems ma khian ọrhuanegbe Jesu vbe ọwara ukpo ni bun. E Jesu rhiọ kpaegbe nẹ, ọ ke do khian ọrhuanegbe ẹre, ọ na wa vbe rhiegba ye ugamwẹ e Jehova!b (Jọn 7:5; Gal 2:9) Nọnaghiyerriọ, ghẹ gi egbe emwa ruẹ vbe uwu ẹgbẹe nẹi rhie ehọ nuẹn ta yi wọọ ruẹ, ye gha kporhu ma iran kevbe emwa ọvbehe ni ma he miẹn iyẹn nọ maan yi. Yerre wẹẹ, ẹdẹ okiekie ẹre ima ye na rhunmwuda ọni, te iwinna ikporhu wa de ọghe ẹgiẹgiẹ. Ẹmwẹ ne u tama iran nian sẹtin ru iyobọ ne iran vbe odaro, uhiẹn vbe orueghe nọkhua gha suẹn nẹ.c

GHA GBỌYẸMWẸ YE EMWI NE JEHOVA MA IMA RE

16. De ere ne u he miẹn vbe emwi ne Jehova ma ima re? (Vbe ya ghee ẹkpẹti nọ khare wẹẹ, “Loo Avbe Emwi Na Ya Ru Iyobọ Ne Emwa Ọvbehe.”)

¹⁶ Ebe eso kevbe avbe vidio eso ne otu ọghomwa kpemehe ẹre keghi re na ru emwamwa rẹn rhunmwuda emwa ni ma he ka rẹn imamwaemwi ọghe Baibol. Vbe igiemwi, ọta azagba na ya guan vbe uzọla uzọla, uhunmwuta eso kevbe vidio ni rre jw.org, kẹ kevbe ebe iyẹn na ya kporhu keghi re na ru emwamwa rẹn rhunmwuda emwa nẹi Osẹe Jehova. Ọrheyerriọ, ma wa vbe miẹn ere vbe avbe emwi na. Iran keghi ya ahoẹmwọmwa ne ima mwẹ ne Jehova wegbe yọ, iran vbe ya ima mu ẹtin yan emwi ni rre uwu e Baibol sayọ, iran vbe ya ima mwẹ alaghodaro vbe odẹ ne ima ya ma emwa e Baibol.​—Psm 19:7.

17. De ẹghẹ eso nọ khẹke ne ima ya muẹn roro avbe imamwaemwi ne ima ka wa ruẹ?

¹⁷ Zẹvbe Osẹe Jehova ne ima khin, te ẹko wa sẹ ima ọyẹnmwẹ ẹghẹ ke ẹghẹ na ya fi odẹ ne ima te ya rẹn otọ imamwaemwi eso ni rre Baibol werriẹ. Ọrheyerriọ, ma wa vbe kpọnmwẹ e Jehova ye avbe imamwaemwi ne ima ka ruẹ, nọ zẹe ighẹ ma miẹn odẹ ọghe ẹmwata yi. Ẹghẹ ke ẹghẹ nọ ya lae ima ekhọe ne ima ya ẹwaẹn obọ ima ru emwi, ne ima gha te ya lele adia nọ ke obọ otu e Jehova rre, te ọ khẹke ne ima mu egbe rrie otọ, ma ghi yerre wẹẹ, e Jehova ne Osa ne Udazi nọ yi emwi hia kevbe nọ ghi mwẹ ẹwaẹn sẹ vbe agbọn vbe ẹrinmwi ẹre ọ dia otu na. Adeghẹ ima ra emwa ne ima hoẹmwẹ ọnrẹn na gha rri oya ra na gha rre uwu ọlọghọmwa, te ọ khẹke ne ima zin egbe, ma ghi muẹn roro evbọzẹe ne Jehova na kue yọ ne ima gha sẹ usẹ. Rhunmwuda ọni, ma ghaa ru azẹ vbe nọ dekaẹn emwi nọ khẹke ne ima ya ẹghẹ ọghe ima kevbe ewi ewe ọghe ima ru, te ọ khẹke ne ima yerre wẹẹ, kherhe ẹre ọ ghi kẹ ne agbọn Esu na sẹ ufomwẹ. Erhunmwu ne ima na ọre ne emwi ne Jehova ma ima re ru iyobọ ne ima ya rhikhan muẹn ya sẹ ufomwẹ kevbe nọ ya ima gha mwẹ ẹwaẹn.