“Emwa Hia Ni Mu Egbe” Ne Iran Ya Ruẹ Vbekpa Osanobua Gha Danmwehọ Iyẹn Nọ Maan

1. De vbene emwa ughughan ya miẹn iyẹn nọ maan yi hẹ? (Iwinna 13:​47, 48; 16:​14, 15)

EMWA ni bun ni ghaa rrọọ vbe ẹghẹ ọghe avbe ukọ, keghi wa miẹn iyẹn nọ maan yi vbe ẹghẹ okaro ne iran ya họen, iran na wa gha hoo ne iran khian Ivbi Otu e Kristi vbobọvbobọ. (Tie Iwinna 13:​47, 48; 16:​14, 15.) Erriọ ẹre ọ vbe ye vbe ẹdẹnẹrẹ, emwa ni bun keghi wa ghọghọ vbe iran gha họn iyẹn nọ maan vbe ẹghẹ okaro. Uhiẹn, emwa nẹi ka rhie ehọ ne ima ta yi sẹtin do ya ekhọe hia miẹn iyẹn nọ maan yi vbe okiekie. Vbọ khẹke ne ima ru vbe ima gha miẹn emwa ni “mu egbe” ne iran ya ruẹ vbekpa Osanobua?

2. De vbene iwinna ikporhu ne ima ru ya khọ iwinna ne ọgbugbo ru hẹ?

² Gi ima zẹ iro yan igiemwi ọkpa. A gha sẹtin ya iwinna ikporhu ne ima ru ya gie iwinna ne ọgbugbo ru. Adeghẹ ọmọ erhan nọ rre ugbo ọghẹe na vboo, ọ sẹtin ka kọlọ ọni nẹ, sokpan, ọ ghi ye gha gbe amẹ khakha avbe ọmọ erhan ọvbehe ni ma he vboo ni vbe rre ugbo nii. Erriọ ẹre ọ vbe ye, ma gha miẹn ọmwa nọ mu egbe nọ ya miẹn iyẹn nọ maan yi, ma wa mu egbe ne ima ya ru iyobọ nẹẹn ya do khian ọrhuanegbe Kristi. Ọrheyerriọ, ma wa vbe hia ne ima gha ru iyobọ ne emwa ọvbehe ya rẹn vbene ọ ru ekpataki sẹ hẹ na gha ruẹ e Baibol, ọ gha khọnrẹn wẹẹ, iran ma mu egbe ne iran ya miẹn iyẹn nọ maan yi. (Jọn 4:​35, 36) Ẹwaẹn ẹre ọ khian ru iyobọ ne ima ya rẹn odẹ nọ maan sẹ ne ima gha ya ru iyobọ ne emwa ne ima kporhu ma. Nian, gi ima guan kaẹn emwi ne ima gha ru vbe ẹghẹ okaro ne ima ya kporhu ma emwa, ne ima mieke na sẹtin ru iyobọ ne emwa ni mu egbe ne iran ya miẹn iyẹn nọ maan yi. Ma gha vbe guan kaẹn vbene ima gha ya ru iyobọ ne iran ya gha mwẹ alaghodaro hẹ.

EMWA GHAA HOO NE IRAN RUẸ VBEKPA OSANOBUA

3. De emwi ne ima gha sẹtin ru vbe ima gha miẹn ọmwa nọ hoo nọ ruẹ vbekpa Osanobua? (1 Kọrint 9:26)

³ Ma gha miẹn emwa ni hoo ne iran ruẹ vbekpa Osanobua, ma wa hoo ne ima ru iyobọ ne iran vbobọvbobọ ne iran ya suẹn gha lele odẹ nọ rrie arrọọ. Ma gha miẹn emwa vbenian, te ọ khẹke ne ima gi iran rẹn vbekpa e Baibol na gu ọmwa ruẹ, ma ghi vbe tie iran gha die iko vbe ẹghẹ okaro ne ima wa ya kporhu ma iran.​—Tie 1 Kọrint 9:26.

4. Ya unu kaẹn igiemwi ọghe okhuo ọkpa nọ mu egbe nọ ya suẹn gha ruẹ e Baibol vbobọvbobọ.

⁴ Gi iran rẹn wẹẹ, u hoo ne u gha gu iran ruẹ e Baibol. Emwa eso ne ima kporhu ma mu egbe ne iran ya suẹn gha ruẹ e Baibol vbobọvbobọ. Vbe igiemwi, vbe ẹdẹ Tọsde ọkpa, ọvbokhan okhuo ọkpa nọ rre Canada kegha die uhanhan na waa ebe yi, ọ na rhie brochure na tie ẹre Sọyẹnmwẹ Arrọọ Vbe Etẹbitẹ!. Ọtẹn nokhuo nọ ghaa rre evba na ghi tama rẹn wẹẹ, a gha sẹtin do gha gu ẹre ruẹ e Baibol vbe ọghe ọhẹ. Ọvbokhan okhuo na na wa kue yọ, ẹre ọ na ghi rhie efọn nọmba ọghẹe ne ọtẹn nokhuo nii, ọ na vbe rhie ọghe nene ọtẹn nokhuo. Ẹdẹrriọ nii, ọvbokhan okhuo nii keghi ya efoni gie uhunmwu gie ọtẹn ima, ọ na nọ rẹn ẹghẹ ne iran khian ya suẹn gha ruẹ e Baibol. Ọtẹn nokhuo nii keghi tama rẹn wẹẹ, irẹn gha rre vbe ufomwẹ uzọla nii, ẹre nene ọvbokhan okhuo na ghi nọ rẹn wẹẹ: “U gha sẹtin rre vbe akhuẹ ra? I gha miẹn obọ vbe akhuẹ.” Ọtẹn nii na gele ya gu ẹre ruẹ e Baibol vbe ẹdẹ nọ lelẹe nọ re ẹdẹ Fraide. Ọvbokhan okhuo nii keghi rrie iko vbe ufomwẹ uzọla nii, vbe na guan na, ọ wa ye mwẹ alaghodaro.

5. Vbe ima khian ya ya ẹwaẹn suẹn gha gu emwa ruẹ e Baibol hẹ? (Vbe ya ghee avbe efoto.)

⁵ Ọghe ne ẹmwata, ma ma ya aro yọ wẹẹ, emwa hia ne ima kporhu ma, ẹre ọ khian gha yevbe ọvbokhan okhuo ne ima guan kaẹn ban. Ọ sẹtin rhie ẹghẹ eso ke kue yọ ne ima gu iran gha ruẹ e Baibol. Ma sẹtin ka loo uhunmwuta nọ kakabọ yẹẹ iran ya suẹn gha kporhu ma iran. Adeghẹ ima ma na gi egbe wọọ ima, ma na gha rhie ẹre ma wẹẹ, ma mwẹ ẹmwẹ iran vbe orhiọn, vbene ima te rẹn iran sẹtin kue yọ ne ima gha gu iran ruẹ e Baibol. De vbene ima khian ya tama ọmwa hẹ we ima hoo ne ima gu ẹre gha ruẹ e Baibol? Gi ima ghee ẹmwẹ ne etẹn eso ni wa guẹ vbene a ya suẹn gha gu emwa ruẹ e Baibol tae vbe a nọ iran ọta na.

6. De emwi ne ima khian tama ọmwa nọ mwẹ ẹkorhiẹnrhiẹnmwẹ, nọ mieke na kue yọ ne ima gu ẹre zẹ iro vbe ẹdẹ ọvbehe?

⁶ Etẹn eso kevbe avbe arọndẹ eso na nọ rẹn ọta vbekpa vbene a ya suẹn gha gu ọmwa ruẹ e Baibol khare wẹẹ, vbe ihe eso, ọ gha maan sẹ adeghẹ ima ma sunu ye “iruẹmwi e Baibol” ra “te I khian gha ma ruẹ emwi” vbe ima ghaa ta ẹmwẹ e Baibol na ruẹ ma ọmwa. Iran we emwi nọ wa mobọ biẹ ọmọ esi ọre deghẹ ima na gha loo ifiẹmwẹ eso vbe na ghee “ne ima gba zẹ iro” kevbe “na rẹn e Baibol sayọ.” Deghẹ u hoo ne uwa dọlegbe zẹ iro yan emwi ne uwa guan kaẹn vbe ẹghẹ okaro ne u ya miẹn ọnrẹn, u sẹtin kha wẹẹ, “Emwa ni bun keghi do bẹghe ẹre wẹẹ, e Baibol zẹ ewanniẹn ye avbe inọta ni kpokpo iran vbe orhiọn” ra “E Baibol i wa re ebe ne avbe ugamwẹ loo kẹkan, ọ wa ru iyobọ ne ima vbe ẹdagbọn ima.” U sẹtin vbe rhie tẹ wẹẹ: “Ẹ i zẹdẹ rhie ẹghẹ; odẹ ifuanro 10 ya mu ifuanro 15 u gha miẹn emwi kpataki ruẹ nọ gha ru iyobọ nuẹn vbe ẹdagbọn ruẹ.” Ma ghi hia ne ima ghẹ loo ifiẹmwẹ eso vbe na ghee “gia bu ẹdẹ yọ” ra “uzọla uzọla,” rhunmwuda, ma gha ru vberriọ, iran sẹtin do gha roro ẹre wẹẹ, esalẹbẹ nọ ne iran ya mu eyan ne iran yan rẹn sẹ.

7. De ẹghẹ ne emwa eso ka ya rẹn we iran miẹn odẹ ẹmwata nẹ? (1 Kọrint 14:​23-25)

⁷ Tie iran gha die iko. Ọ khọ wẹẹ, vbe ẹghẹ ọghe ukọ ighẹ e Pọl, ẹghẹ okaro ne emwa ya rẹn wẹẹ, iran miẹn odẹ ẹmwata nẹ, ọre vbe iran yo iko ọghe Ivbi Otu e Kristi. (Tie 1 Kọrint 14:​23-25.) Ọ wa mobọ sunu vberriọ vbe ẹdẹnẹrẹ. Emwa ni bun ne ima kporhu ma gha suẹn iko na yo, iran ghi wa suẹn gha mwẹ alaghodaro vbe ugamwẹ e Jehova. De ẹghẹ nọ khẹke ne ima ya tie emwa gha die iko? Agharhemiẹn wẹẹ, iruẹmwi 10 vbe ebe na tie ẹre Sọyẹnmwẹ Arrọọ Vbe Etẹbitẹ! gie na tie emwa ne iran gha die iko, esa i rrọọ ne ima ka sẹ iruẹmwi 10 nẹ ma ke tie emwa ne iran gha die iko. Vbe ẹghẹ okaro ne ima wa ya miẹn ọmwa vbe ikporhu, ma sẹtin gie na tie ẹre gha die iko ne ima do vbe ufomwẹ uzọla, ọ gha kẹ, u sẹtin ya unu kaẹn uhunmwuta ọghe ọta azagba na khian ya guan vbe iko vbe ẹdẹrriọ, ra olika ẹmwẹ eso nọ rre ebe Owa Ọkhẹ na khian ruẹ vbe uzọla nii.

8. De emwi eso ne ima gha sẹtin tama ọmwa ne ima tie gha die iko? (Aizaia 54:13)

⁸ U gha tie ọmwa gha die iko, u ghi gi ẹre rẹn vbene iko ọghe ima ya lughaẹn ne avbe ugamwẹ nọ ka rẹn. Vbe ẹghẹ okaro ne okhuo ọkpa na gu ruẹ e Baibol ya rrie iko, ọ keghi nọ ọtẹn nokhuo nọ gu ẹre ruẹ e Baibol wẹẹ, “Te ọmwa nọ siẹnro ebe Owa Ọkhẹ wa rẹn eni emwa hia ni rre emwa ra?” Ọtẹn nokhuo nii keghi tama rẹn wẹẹ, te ima wa hia ne ima rẹn eni etẹn ima ni rre uwu iko zẹvbe ne ima rẹn eni etẹn ima vbe uwu ẹgbẹe. Okhuo nii na gu ruẹ e Baibol keghi kha wẹẹ, emwa ma mobọ rẹn eni egbe vbe esosi irẹn. Ma gha vbe sẹtin gi ọmwa ne ima tie gha die iko rẹn odẹ ọvbehe ne iko ọghe ima ya lughaẹn ne avbe esosi ọvbehe. (Tie Aizaia 54:13.) E Jehova ẹre ima ya gha ga vbe iko, ma ruẹ emwi vbe obọ ọre, ma vbe rhie igiọdu ne egbe. (Hib 2:12; 10:​24, 25) Ọna ẹre ọ si ẹre ne iko ọghe ima na khian hẹnẹhẹnẹ, emwa ghi wa vbe miẹn emwi kpataki ruẹ vbọ, a i vbe ru emwi nọ ma khianrẹn vbọ. (1 Kọr 14:40) Te a vbe bọ avbe Ọgua Arriọba ọghomwa nọ gha re ehe nọ maan na na ruẹ emwi. Ma i vbe mwẹ otu azẹ ne ima ye ẹre ike, rhunmwuda ma i mwẹ obọ vbe ẹmwẹ otu azẹ. Ọ gha wa ru iyobọ ne ọmwa ne u gu ruẹ e Baibol deghẹ u na kpee vidio nọ mwẹ uhunmwuta nọ khare wẹẹ, De Emwi Na Ru Vbe Ọgua Arriọba? ma rẹn vbene ọ te sẹ ẹghẹ na ya do iko. Ẹghẹ nii, ọ ghi rẹn emwi nọ khian miẹn vbe ọ gha sẹ evba.

9-10. De emwi ne ima gha sẹtin tama ọmwa ne ima tie gha die iko nọ gha yae rẹn wẹẹ, ọmwa rhọkpa i khian kpikpi ẹre nọ gha mwẹ obọ vbe iko nii? (Vbe ya ghee efoto.)

⁹ Emwa eso i hoo ne iran rrie iko rhunmwuda iran roro ẹre wẹẹ, iran gha rre, ma gha we ne iran do khian “Osẹe Jehova.” Gi iran rẹn wẹẹ, ma wa ghọghọ vbe emwa gha rrie iko ọghe ima, kevbe wẹẹ, ẹ i re esalẹbẹ nọ zẹ ewanniẹn ra nọ ru emwi rhọkpa vbe ọ gha sẹ iko. Emwa hia vbe uwu ẹgbẹe sẹtin gha dee, uhiẹn ya sẹ egbe ibiẹka. Ibiẹka i ya gha do iko ọghe iran vbe ihe ọvbehe. Nọghayayerriọ, emwi ọkpa ẹre ibiẹka vbe eniwanrẹn ruẹ vbe iko ọghe ima. Odẹ vbenian, aro evbibiẹ emọ ghi sẹ otọ vbe egbe ivbi iran, iran ghi vbe rẹn emwi na ma iran re. (Diut 31:12) Ma i nọ emwa igho, ma i vbe rhie ẹnvẹlop ne emwa ne iran rhie igho yọ. Nọghayayerriọ, emwi ne Jesu we ne ima gha ru ẹre ima rhie owẹ lele, ọ wẹẹ: “Te a rhie ne uwa ọghe ọhẹ, wa vbe gha rhie ne emwa ọvbehe ọghe ọhẹ.” (Mat 10:8) U sẹtin vbe gi ẹre rẹn wẹẹ, esa i rrọọ nọ ya yọ ukpọn wa do ghee vbe ọ ghaa die iko. Ekhọe ẹre Osanobua ghee, ẹ i re ukpọn ne ọmwa yọ.​—1 Sam 16:7.

¹⁰ Deghẹ ọmwa ne u tie re na rrie iko, hia vbe odẹ ke odẹ ne u ru emwi nọ gha ya orhiọn ọnrẹn sẹ otọ. U sẹtin rhie ẹre bu ediọn eso kevbe etẹn ọvbehe vbe iko. Adeghẹ ọ na bẹghe obọ esi ne emwa ya muẹn, ọ ghi gha hoo nọ gha dee vbe ẹdẹ ọvbehe. Adeghẹ ẹ i mwẹ e Baibol, uwẹ vbe ọre ghi gba koko loo ọghuẹ, u ghi vbe gi ẹre rẹn otọ ọta na ya guan, kevbe vbene ima ya koko ruẹ emwi vbe iko hẹ.

MA GHA SUẸN GHA GU ỌMWA RUẸ E BAIBOL NẸ

11. Vbua khian ya rhie ẹre ma wẹẹ, u mwẹ amuroro vbe ọ gha de ọghe ẹghẹ ne uwa ya ruẹ emwi?

¹¹ De emwi nọ khẹke ne ima kọ ye orhiọn vbe ima ghaa gu ọmwa ruẹ e Baibol vbe owa? Inu ẹghẹ ne ọmwa nii hoo ne ima ya gha gu ẹre ruẹ emwi ẹre ọ khẹke ne ima wa lele zẹẹ. Vbe igiemwi, ọ gha sẹ ẹdẹ ne uwa we uwa khian ya ruẹ emwi, te ọ khẹke ne u rherhe sẹ evba, ọ gha khọnrẹn wẹẹ, emwa i mobọ ru emwi ye ẹghẹ vbe ẹvbo nii. Ọ ma vbe khẹke ne u kpẹẹ gbe vbe ẹghẹ okaro ne u khian ya gu ẹre ruẹ emwi. Etẹn eso ni fuẹro khare wẹẹ, ọ gha maan sẹ deghẹ u ma gi iruẹmwi nii taan gbe, ọ gha khọnrẹn wẹẹ, ọmwa nii te hoo nọ ye ruẹ sayọ. Ghẹ vbe talọ ẹmwẹ nọ bun gbe. Kie ẹkpotọ ne ọmwa ne u gu ruẹ emwi ya ta emwi nọ rre ọre ekhọe.​—Itan 10:19.

12. De emwi nọ khẹke ne ima hia ne ima ru ke ẹghẹ ne ima wa ya suẹn gha gu ọmwa ruẹ e Baibol kpa?

¹² Ke ẹghẹ ne u wa ya suẹn gha gu ọmwa ruẹ e Baibol kpa, te ọ wa khẹke ne u hia vbe odẹ ke odẹ ne u ru iyobọ nẹẹn ya do rẹn e Jehova vbe Jesu, kevbe nọ vbe hoẹmwẹ iran ẹsẹsẹmwẹse. Odẹ ne u khian ya ru ọna ọre ne u gi ẹre rẹn wẹẹ, e Baibol ẹre emwi hia ne u ta ke rre, ẹ i re ẹmwẹ obọ ruẹ. (Iwinna 10:​25, 26) Jesu ẹre ukọ ighẹ e Pọl wa mobọ gha guan kaẹn, ọni ọre ọmwa ne Jehova gie nọ do ru iyobọ ne ima ya rẹn irẹn sayọ kevbe ne ima vbe hoẹmwẹ ọnrẹn. (1 Kọr 2:​1, 2) E Pọl vbe rhan otọ ẹre vbene ọ ru ekpataki sẹ hẹ na ru iyobọ ne emwa ọgbọn ya gha mwẹ uyinmwẹ esiesi na gha sẹtin ya gie igoru, esiliva, kevbe okuta ighobioye. (1 Kọr 3:​11-15) Usun emwi ne Pọl we ne iran gha mwẹ ọre, amuẹtinyan, ẹwaẹn, kevbe imuohan ọghe Jehova. (Psm 19:​9, 10; Itan 3:​13-15; 1 Pit 1:7) Ya egbe taa odẹ ne Pọl ya gha ma emwa emwi, u ghi ru iyobọ ne emwa ne u ma ẹre emwi ya gha mwẹ amuẹtinyan nọ wegbe, kevbe ne iran sẹtin sikẹ e Jehova nọ re Erha iran nọ rre ẹrinmwi.​—2 Kọr 1:24.

13. Vbe ima khian ya sẹtin rhie ẹre ma wẹẹ, ma mwẹ izinegbe kevbe amuroro vbe egbe ọmwa ne ima gu ruẹ emwi? (2 Kọrint 10:​4, 5) (Vbe ya ghee efoto.)

¹³ Ya egbe taa e Jesu vbe odẹ nọ ya gha ma emwa emwi, ne u gha mwẹ izinegbe vbe egbe emwa ne u ma ẹre emwi, ne u vbe gha mwẹ amuroro daa iran. Ghẹ gha nọ ọta nọ gha ya ekhue mu iran. Adeghẹ esa na gha rrọọ, uwa sẹtin ka gberra ako eso nọ ma rherhe rẹn otọ ọre, wa ghi dọlegbe do zẹ iro yan rẹn vbọ ghaa zẹ kpẹẹ. Ne u gha te ya gbagbae imamwaemwi ọghe ima ye ọre egbe, u ghi rhie ẹghẹ nẹẹn, ne ẹmwata mieke na rọn la ẹre ekhọe. (Jọn 16:12; Kọl 2:​6, 7) E Baibol keghi ya avbe imamwaemwi ohoghe ne ima hoo ne ima bizugbe gie owa ọkhẹ nọ wegbe. (Tie 2 Kọrint 10:​4, 5; ghee study note nọ khare wẹẹ, “overturning strongly entrenched things.”) Ne u gha te ya gi owa ọkhẹ nọ wegbe ọghe ọmwa ne u gu ruẹ emwi siẹn yan rẹn, ru iyobọ nẹẹn ya lẹẹ gbinna e Jehova.​—Psm 91:9.

EMWA ỌGBỌN GHA RRIE IKO

14. De obọ nọ khẹke ne ima ya gha mu emwa ọgbọn ni rrie iko ọghomwa?

¹⁴ E Jehova hoo ne ima gha ya obọ ọkpa mu emwa hia, ya sẹ egbe emwa ọgbọn ni rrie iko, ọ ma khẹke ne ima gha lele ẹvbo ne iran ke rre, ra vbene iran fe sẹ hẹ. (Jems 2:​1-4, 9) Vbe ima khian ya rhie ẹre ma wẹẹ, ma hoẹmwẹ emwa ọgbọn ni rrie iko ọghomwa?

15-16. De emwi ne ima gha ru ne orhiọn emwa ọgbọn ni rrie iko mieke na sẹ otọ?

¹⁵ Emwa eso keghi rrie iko ọghe ima rhunmwuda iran hoo ne iran do bẹghe emwi ne ima ru vba, a sẹtin vbe miẹn wẹẹ, ọmwa nọ rre ẹdogbo ọvbehe ẹre ọ tie iran gha dee. Nọnaghiyerriọ, u gha miẹn emwa ọgbọn vbe iko bu iran ne u gu iran zẹ iro. Gbe ọbokhian ne iran, sokpan ghẹ ru ẹre gberra egbe ne ekhue ghẹ do gha mu iran. We ne iran do gu ruẹ tota. Wa koko loo e Baibol ruẹ kevbe ebe na ruẹ vbe iko vbe ẹdẹrriọ, ra u sẹtin gualọ rhie ne iran. Vbe deba ọni, gha mwẹ amuroro daa iran. Okpia ọkpa nọ rrie iko keghi tama ọtẹn nokpia ọkpa nọ gbe ọbokhian nẹẹn wẹẹ, te ekhue wa mu irẹn rhunmwuda ne odẹ ne irẹn ya mu egbe na lughaẹn ne ọghe emwa ọvbehe. Ọtẹn na keghi mu ẹre orhiọn sẹ otọ, ọ na gi ẹre rẹn wẹẹ, emwa kẹkan vbene irẹn vbe ye ẹre Avbe Osẹe Jehova khin. Okpia na ye do dinmwiamẹ vbe okiekie sokpan, ọ ma mianmian ẹmwẹ ne ọtẹn nokpia nii tama rẹn vbe ẹghẹ nii. Sokpan, yẹrẹro wẹẹ: U ghaa tuẹ emwa ọgbọn ni rrie iko vbene iko te suẹn ra vbe a gha zobọ nẹ, te ọ khẹke ne u gha begbe ne u ghẹ ya fi ukpẹ ye emwi nọ ma kaẹn ruẹ.​—1 Pit 4:15.

¹⁶ Te ọ vbe khẹke ne ima gha begbe vbe ẹmwẹ ne ima ta vbekpa emwa nẹi re Osẹe Jehova kevbe emwi ne iran yayi vbe ima ghaa guan, vbe ima ghaa zẹ ewanniẹn ra vbe ima ghaa ru abọ vbe iko, ne ima ghẹ mieke na ya ta emwi nọ gha ya ekhue mu iran. Hia ne u ghẹ ta ẹmwẹ nọ gha rrua iran owẹ ra nọ gha ya ohu mu iran. (Taitọs 2:8; 3:2) Vbe igiemwi, ọ ma khẹke ne ima gha ya unu rhia emwi ne iran yayi. (2 Kọr 6:3) Vbe nọ dekaẹn ọnọna, te ọ wa khẹke ne etẹn ni ya ọta azagba guan gha begbe. Te ọ khẹke ne iran gha rhan otọ ẹmwẹ ne iran rẹnrẹn wẹẹ, emwa nẹi Osẹe Jehova i khian sẹtin rẹn otọ re.

17. De emwi nọ khẹke ne ima ru vbe ima gha miẹn emwa “ni mu egbe” ne iran ya ruẹ vbekpa Osanobua?

¹⁷ Vbene ẹdẹ ya gbe erriọ ẹre iwinna ikporhu iyẹn nọ maan ya de ọghe egiẹgiẹ, erriọ ẹre ima wa vbe ya gualọ “emwa hia ni mu egbe, ne iran ya ru emwi nọ gha ya iran gha mwẹ arrọọ ọghe etẹbitẹ.” (Iwinna 13:48) Ma gha miẹn emwa vbenian vbe ikporhu, te ọ khẹke ne ima gi iran rẹn vbekpa e Baibol na gu ọmwa ruẹ ra ma ghi tie iran gha die iko. Ma gha ru vberriọ, te ima ru iyobọ ne iran ya zẹ owẹ nọ gha rhie iran la “odẹ nọ rrie arrọọ.”​—Mat 7:14.