Minnɔgɔ bɛ mɔgɔ o mɔgɔ la, an ka wele bila o tigi ma
1 Iko Amɔs y’a fɔ cogo min na kiraya la, bi bi in na hadamaden denbaya bɛ muɲuli la “ji minnɔgɔ ko tɛ, fo Jehowa ka kuma mɛnni kɔngɔ”. (Amɔs 8:11.) Walisa ka mɔgɔw dɛmɛ minnu b’a la k’o ala-ka-miiriko kɔngɔ muɲu, Ala ye fɛɛrɛ minnu tigɛ walisa k’a kaminɛbagaw kunmabɔ jurumu ni saya la, an b’u ladɔnniya u la. An bɛna o kɛ cogo di Feburuyekalo la? An kɛtɔ ka La vie: Comment est-t-elle apparue? Évolution ou création? gafe jira. A dɔ rɔ, an bɛna kumatacogo nata ninnu lajɛ.
2 Mɔgɔ caman bɛ hami kɛnɛya kow la; o la, an bɛna nafa sɔrɔ nin kuma daminɛcogo in na:
◼“Mɔgɔ caman bɛ jɔrɔ furakɛli ko ɲuman sɔngɔ la min bɛ yɛlɛnna ka taa’ fɛ. Yali i delila ka miiri o la wa? [An k’a to a ka jaabi di.] Yali i ɲɛ bɛ ɲɛnabɔli cogo la o kunko in na min n’o ban pewu wa? [An k’a to a ka jaabi di.] Dakabana jigiya dɔ filɛ in ye.” An ka Jirali 22:1, 2 kalan. O kɔ, an ka Création gafe dayɛlɛ a ɲɛw 238-9 jaw la. An ka dakun 14nan ta a ɲɛ 240nan na ka kuma u kan. An k’a laban, an kɛtɔ k’a fɔ: “Nin gafe in bɛ kuma ɲɛnamaya jujɔ ani Ala sagonata kan ka ɲɛsin hadamadenw ma.” An ka gafe jira a la ani ka fɛɛrɛ ɲini ka segin ka n’a lajɛ.
3 Tuma min na an bɛna segin-ka-bɔnyeli kɛ, an bɛ se ka hakilijiginni kɛ an ka baro laban kan, an kɛtɔ ka nin fɔ:
◼“An ka ɲɔgɔnye laban na, an kumana ɲɛnabɔlicogo kan min bɛ kɛnɛya kunkow ban pewu. I ka miiri la, yali don dɔ mɔgɔ si tɛna bana tun wa? [An k’a to a ka jaabi di.] Nin kuma kabakoma in lajɛ.” An ka Esayi 33:24 kalan. O kɔ, an ka Wajibiya gafenin dayɛlɛ a kalansen 5nan na k’a dakunw 5nan ni 6nan mafilɛ an kɛtɔ ka ɲininkaliw lawuli minnu bɛ bɛn u ma kalansen daminɛ na. An ka Bibulu tɛmɛsira dama-dama ta minnu dilen bɛ u kɔnɔ. An ka ɲɛfɔ ko bana ni saya banni sen bɛ Ala sagonata fɔlɔ la ka ɲɛsin dugukolo ma. An ka ɲɔgɔnye boloda walisa ka baro kɛ o kalansen kelen kan, a dakun fɔlɔ la ka na 4nan ni 7nan na.
4 Ni kɔsanna in na kibaruyaw ye mɔgɔ dɔ ka saya kofɔ, n’o kɛra k’a kɔn a tuma ɲɛ, an bɛ se ka nin jiracogo lajɛ:
◼“I sɔrɔla cɔ ka nin kuma mɛn [kibaruya fɔ]. Ni ɲɛnamayaw balila ka tiɲɛ kaasara dɔ sen fɛ, caman b’u yɛrɛ ɲininka dususaalo jumɛn bɛ se ka lase kaasaratɔw ka denbayaw ma. I bɛ mun miiri o ko la?” An k’a to a ka jaabi di. O kɔ, an ka Création gafe dayɛlɛ a ɲɛ 245nan na ani an ka ja jira min bɛ lakununni kan. An ka taa’ fɛ, an kɛtɔ ka fɔ: “A bɛ bala caman na k’a mɛn ko tilennenw iko tilenbaliw bɛna lasegin ɲɛnamaya la alijɛnɛ kɔnɔ dugukolo kan. [Kɛwalew 24:15 min fɔlen bɛ ɲɛ 244nan na, a dakun 25nan na, an k’o kalan ani ɲɛfɔli min jiralen bɛ dakun 26nan na, an k’o kɛ.] Nin gafe in bɛ kunnafoni nafama dɔ wɛrɛw di Ala sagonata ko la ka ɲɛsin sini ma. N’i b’a fɛ ka dɔ wɛrɛ dɔn o ko la, n’ bɛ se ka nin to i bolo.” An k’a ɲini a fɛ ka segin ka na ani an k’an barokɛɲɔgɔn mago yɔrɔw an’a haminankow sɛbɛn.
5 Segin-ka-bɔnyeli sen fɛ, an k’an ka jiracogo bɛn o mɔgɔ ma. Laala, an na se ka nin kɔlɔsili sugu kɛ:
◼“Siɲɛ laban min na an kumana ɲɔgɔn fɛ, i ye fɛn dɔ fɔ min diyara ne ye Ala sagonata ko la ka ɲɛsin dugukolo ma. [A tigi ye min fɔ an ka hakilijigin kɛ o la.] N’ ye hakililaw sɔrɔ minnu bɛna i na nafa ne ɲɛ na.” An ka Wajibiya gafe dayɛlɛ a kalansen 5nan na. Dakun minnu bɛɛ bɛ se k’a kun minɛ, an k’u bɛɛ kalan ani ka baro kɛ u kan. An kɛlen kɔ ka ɲɔgɔnye boloda walisa ka taa’ fɛ kalansen mafilɛli la, an ka jɛkulu ka lajɛw kɛwaatiw fɔ. An ka ɲɛfɔ foroba jɛmu ye min ye. An k’a wele a ka na u la.
6 N’an bɛ jiracogo nɔgɔ dɔ de fisaya an kɛtɔ ka baara kɛ ni sɛbɛndennin dɔ ye, an bɛ se ka nin lajɛ:
◼“N’ b’a fɛ ka nin sɛbɛdennin to i bolo, n’o tɔgɔ ye Quel espoir y a-t-il pour nos chers disparus?” An ka sin a ma ani an k’a ɲini a fɛ ka dakun fɔlɔ kalan lamɛn. An ka to a ka kumasen laban ɲininkali lawulilen jaabi. An ka dakun filanan kalan. O kɔ, an ka Création gafe ja jira a ɲɛ 245nan na walima Révélation: dénouement gafe ta a ɲɛ 299nan na. An ka taa’ fɛ an kɛtɔ ka fɔ: “Nin gafe in bɛ kunnafoni caman di lakununni ko la ani Bibulu ka dakabana layidu wɛrɛw ko la ka ɲɛsin sini ma. N’i b’a fɛ k’a kalan, a y’i ta ye.” An ka fɛɛrɛw tigɛ walisa ka segin-ka-bɔnyeli kɛ.
7 An bɛ wele min bila an mɔgɔɲɔgɔnw ma, o bɛ se k’u sama ka na ɲɛnamaya jiw la, Jehowa b’o min bɔnna sisan. O tuma na, minnɔgɔ bɛ mɔgɔ o mɔgɔ la, an b’a fɔ o tigi ye ko: “Na!”—Jir. 22:17.