Uganu buiti le labürüdübei Matéu
2 Lárigiñebei lagüriahóun* Hesusu lidan fulasu le gíribei Belén lumúanrugu Hudéa, lidan lidaani larúeihan Erodesi,* aba hayabin fiu aturiahatiña waruguma Herusaléun lídangiñe oubaü le ñéingiñe lubéi laboucha Weyu, 2 ariñageina: “Hagéi san harúeite huríu le málügilibei lúmagiñe lagüriahóun? Ladüga ariha wamutu luaruguman yágüta luéigiñe oubaü le ñéingiñe lubéi laboucha Weyu ani wayabiña abuluchagua ligibugiñe”. 3 Ábati mederaaguagüdünhaali lan lisaminan urúei Erodesi habu sun lílana Herusalén dan le haganbunbalin lira. 4 Óundaraguagüda lumutiña urúei sun hábutigu fádirigu hama arufudahatiña Lilurudun Moisesi lun lálügüdüniña halíaba lan lagüriahóua Kristu.* 5 Ábati hóunabuni: “Uburugu Belén, le lumúanrugubei Hudéa, ladüga ítara liña meha labürüdüni profeta: 6 ‘Ánheinti buguya Belén, le lumúanrugubei Hudá, mama aban uburugu le mebegibei hadan gumadimatiña Hudá buguya, ladüga bídangiñeba láfurida gumadimati le lunbei ladundehaniña ísraelina ha numutuniña’”.
7 Ábati lóunahan Erodesi agúara houn aturiahatiña waruguma aramudaguarügü lun lálügüdüniña kátima lan dan harihoun waruguma tuguya. 8 Lárigiñe, aba lóunahaniña uburugun Belén, ábati lariñagun houn: “Heiba áluahei irahü ligía darí hadariruni. Danme le darí humaali, ábame hagiribudun ariñagei nun lun giñe nidin abuluchagua ligibugiñe”. 9 Lárigiñebei haganbuni le lariñagubei urúei, aba hasigiruni héibugun. Warugumati to buga harihuboun luéigiñe oubaü le ñéingiñe lubéi laboucha Weyu, aba tidin habá habá darí tararamagun tóugiñe muna to ñein lubéi irahü. 10 Ábati hagundaaragun dan le harihinbarun waruguma. 11 Dan le hebelurunbei múnadoun, aba harihini irahü tuma María to lúguchu. Ábati háhuduragun ani aba habuluchagun ligibugiñe. Aba giñe hadaarunu hagafun lun hedewehan golu, oliwanu luma mira lun. 12 Keiti aba lubéi líchugun Bungiu gumadi houn lidan aban uénedü lun magiribudun hamá arihei Erodesi, ábagubei houdin hageiroun luéigiñe amu üma.
13 Lárigiñebei houdin aturiahatiña waruguma, aba larufudagun lani Heowá* ánheli lungua lun Hosé lidan aban uénedü, ábati lariñagun lun: “Saraba, anurahabá Ehiptun labu irahü le tau sun lúguchu, ani redeibá ñein darime nariñaguni bun, ladüga láluahaali Erodesi irahü le lun láfaruni hilagubei”. 14 Ábati lásaarun Hosé áriebu ligía, aba lanügüni irahü tau sun lúguchu Ehiptun. 15 Ábati herederun ñein darí lounwen Erodesi. Ítara liña lagunfulirun le meha lariñagubei Heowá* lau lídehan lani profeta: “Wátina lun niráü Ehiptugiñe”.
16 Ábati lagañidun Erodesi dan le líchugunbei fe yeeda hamaali lan aturiahatiña waruguma. Aba lóunahan áfaraguagüdaña sun irahüñü ha bianbei irumu hau lun ǘnabun, ha awinwandubaña Belén luma geyegu lau, según dan le hariñagunbei wügüriña hagía lun ariha hamanu waruguma. 17 Ítara liña lagunfulirun le meha ariñawagúbei lau lídehan profeta Heremíasi: 18 “Aganbúati aban umalali uburugu Ramá, ayahuni luma igarigu. Rakeli meha ayahuahaboun hawagu tisaanigu; mabusenrúntu támalihoun ladüga hilagua lan”.
19 Lárigiñebei lounwen Erodesi, aba larufudagun lani Heowá* ánheli lungua lun Hosé lidan luénedü yágüta Ehiptu. 20 Ábati lariñagun lun: “Saraba, giribubá Ísraelin lau irahü le tau sun lúguchu, ladüga hilagua sun meha ha busenbaña háfaruni hilagubei”. 21 Ligía aba lubéi lásaarun Hosé ani aba lagiribudun Ísraelin lau irahü tau sun lúguchu. 22 Keiti aba lan laganbun Hosé Arkeláu lan agumadihabei Hudéa leweñegua Erodesi le lúguchi, aba lanufudedun lidin ñeinhin. Ani kei giñe resibi lan aban eweridihani lúmagiñeti Bungiu lidan aban uénedü, ábagubei lidin Galiléoun. 23 Ábati lerederun awinwanda hau ñein lidan aban uburugu gíriti Nasarétü. Ítara liña lagunfulirun le hariñagubei profetagu: “Nasarétüna* luba laguarún lun”.