Dan le lasuseredun somu günringuaü

“Furumiñe, aba wasandirun féridi wamaali lan wemenigin sunsuinagubei. Günringualá meha fuludu luma lagululudagun múa sun wámati” (Andrew, Siera Leona).

“Dan wagiribudunbei múnadoun lárigiñe herigini, madarihadiwa ni kata. Aba lebeluragun woun lun wayahun. Huduguatu nisaani múarugu ábati tagumeserun ayahuaha” (David, ubouhu Bírühenesi).

WÍNWANHADÜN san aban sügǘ ítarati? Anhein ítara liña lubéi, chóuruti gunfuranda humani le hasufurirubei ha erederubaña wínwanñu: lebelurun houn lun hayahun, hadiheridun saragu, mafiñerun hamani le asuseredubei, libidiñedun houn kaba lan hadüga o gewenedü hamá katei wuribati. Wéiriti maguraasuni luma lubucha uagu le hawagubei saragu darí lun lénrendun houn áfaagua lun hasigirun habaruaguóun lidan habagari.

Anhein féridi humaali lubéi sun húmati ladüga somu günringuaü, másiñati giñe sandí humá siñá lan hun. Gayaraati hálügüdaguña lan hungua anhein lunti lubéi hasigirun abagarida. Arufudahatu Lererun Bungiu anihein lan resun buiti lun hasigirun abagarida luma lun hachoururuni laranseraguba lan léibugun katei ámuñegü.

RUTI WASUBUDIRUNI LE TARIÑAGUBEI LERERUN BUNGIU RESUN BUITI WOUN LUN WASIGIRUN ABAGARIDA

Ariñagati Apurichihati 7:8 buítima lan “lagumuchun aban katei sügǘ lau lagumeserun”. Anhein súfurihadün lubéi ladüga somu hárabaganali, herigini o katei líbeina lira ani mosu hadügün aban óunwenbu áfaaguni lunya ítara lan hibagari kei meha, háfuga sandí humá úaali lan resun lun hasigirun hubaruaguóun. Íbini ítara, lachülürayaba dan lun laranseragun sun katei anhaün áfaagua lau gaguraasuni lun hiñuragun lídangiñe gádantün.

Ariñagatu Lererun Bungiu lidan aban profesía luagu lachülürüba lan weyu lun maganbúnwadigiaali lanme “ayahuni [...] ni agúaraguni lánina idiheri” (Isaíasi 65:19). Lagunfuliruba dimurei burí le danme le ábanhali lan paraísu Ubóu lábugiñe Larúeihan Bungiu (Sálumu 37:11, 29). Masuseredundigiaalime hárabaganali, herigini o katei líbeina lira. Wabulieidubei sun luriban sügǘ le winwan wamaalibei sunsuinagubei. Füramase haali Bungiu suntigabafu: “Labulieidúaba sun le sügühalibei, úaalime aritaguti luagun” (Isaíasi 65:17).

Samina huméi le: adüga laali Bungiu le mégeiwabei lun wawinwanduni “dan le lunbei liabin buin lau emenigini”, busenti lun wawinwandun darangilañu lábugiñe lagumadihan le úabei charati lidan (Heremíasi 29:11). Gayaraati san líchugun emenigini le resun buiti hun lun hasigirun abagarida? Ariñagatu Sally, to buga wíriduboun lidan furumiñeti arütíkulu: “Gayaraabei líderagunün hasaminarun luagu lubuidun ibagari le lunbei wibihini lábugiñe Larúeihan Bungiu ámuñegü lun masigirun humá asaminara luagu sun le sügühalibei gayara láamuga hawanduni turobuli le úmabei hagagibudagua guenlé”.

Kaba amu katei ladüga Larúeihan Bungiu yarafa madise? Agunbiraha wamutün lun hakutihani. Ítara luba híchugun fe anihein lan resun buiti lun hasigirun abagarida íbini súfurihadün lan ani málühali lan fuludu, herigini, hárabaganali luma katei líbeina lira agidarúa. Lidan awanha lan agurabahei lira, íderagua lumutiwa lubuidun burí adundehani le tídanbei Lererun Bungiu agagibudagua luma lamiselu.

Bérusu burí le gayaraabei líderagunün

Arumuga humá buidu

“Buítimati aban úhabu buin lau emeraaguni sügǘ lau biama lau lubucha uagu ladügarügü labusenrun lárügüdüni garabali” (Apurichihati 4:6).

Según fiu akutihani le adügǘbei “anhein lougua lubéi harumugun gürigia ha sügühañabaña lídangiñe somu lamiselu, wuribatimabei hasandiragun houngua, gürewei ligíame houn hárügüdagun houngua”. Ligía súdini lubéi lun hemeraagun buidu.

Ayanuha humá luagu ligaburi hasandiragun hungua

“Hírugüda lumuti idiheri gürigia; anhein dimurei buiti, gúndaaguagüda lumuti” (Ariñawagúni 12:25).

Ayanuha humá luma somu hiduhe o humada le uáguti hafiñera. Lárigiñe líchugun arigei hun, gayaraabei giñe líderagunün luma líchugun gurasu hun.a

Samina humá buídutimabei lan katei ámuñegü

“Aguraba wamuti iseri sielu luma iseri ubóu le füramase láalibei Bungiu woun; úaraguabei sun katei ñein ani buídubei sun katei ñein, richagua” (2 Féduru 3:13).

a Anhein álüda aban gürigia lau luriban lasandiragun lungua o lau saragu idiheri, háfuga mégeibei lan lidin lumoun surusia.