Laluahóun inarüni

Lidan saragu milu irumu le sügühalibei, adügati sandi galugurahati lun hóunwegun saragu míñunu gürigia ladüga meha ibidiñewa lan lóunabagüle álügüdahani le. Lau lásügürün dan, aba hasubudiruni aturiahatiña siensia inarüni. Ábati híchugun fe kátaña lan ha wéiribei hañüraü darí lun siñá lan harihíniwa, ha subudiwabaña kei virus luma bacteria, adügübaña lun hasandirun gürigia. Adügati lasubudirúniwa inarüni le lun madagarun lan sandi burí le hawagu gürigia luma lun lasubudirúniwa ida luba lan lagaranihóun lun saragu lídangiñe, ítarati, ibihaaña saragu míñunu gürigia lun gíbetima lan dan habagaridun luma lun buídutima lan hátuadi.

Ka gayaraabei lariñawagún luagu amu burí álügüdahani súdiniti? Afiñetün san gayara lan lasansirun hibagari anhein hasubudira inarüni luáguti lóunabagüle álügüdahani burí le?

• Katei san Bungiu?

• Katei san Hesukrístu?

• Katei san Larúeihan Bungiu?

• Kaba san asusereda ámuñegü?

Darí hamaali saragu míñunu gürigia lóunabagüle álügüdahani burí le ani buídutimahali habagari. Gayaraati lasuseredun ligiaméme hun.

GAYARAATI SAN HASUBUDIRUNI INARÜNI?

Háfuga álügüdagua humá hungua anhein le lubéi lúgubu gayara lan ladarirúniwa inarüni luagu burí katei. Lugundun eibu dan, güreweitimahali lasubudirúniwa inarüni luéi iyeeni. Ka uagu?

Gíbetiña gürigia mafiñentiña luagu le hariñagubei taburiña burí bísinisi, gumadimatiña ni luagu le áfuachubei lidan burí ñunsu. Güreweiti houn hasubudiruni anhein inarüni lubéi le ariñawagúbei, anhein hariñagarügüñein lubéi gürigia hasaminan, haramuduña lan lídangiñe inarüni o hariñaguña lan marasualugu. Kei weiri lubéi heyeehan gürigia ayanuha hagía luagu le ibidiñebei houn, mámarügaali luagu kátima lan inarünibei uágubei mafiñerun hamá, mafiñentiña giñe luagu ligaburi gunfurandawa lan.

Íbini ítara, gayaraati hadarirun óunabagülei inarüniti lun burí álügüdahani le súdinitimabei lidan ibagari. Ida? Lau hadügüni lememe hadügübei lun hadariruni lóunabagüle furumiñeguarügü amu álügüdahani.

KA LUNBEI HADÜGÜNI LUN HASUBUDIRUNI INARÜNI?

Le linarün katei sagü weyu wáluahani inarüni. Kéiburi Jessica to adügübalin sun tiyaraati lun tachoururuni magana lan éigini burí le tagañeihabei ni murusun tárigirugu gagawaadi. Ariñagatu: “Wéiriti luriban téiguadun gagawaadi tun nisaani darí lun gayara lan tounwen láurügü teigin murusun tife gagawaadi. Ligía naliihanbalin buidu ka burí lan laganabei éigini lubaragiñe nagañeihani. Lárigiñe, sigitina akutiha libügürü darí lun nagúarun lidoun burí fulasu le ídanbei ladügǘwa éigini le nagañeihabei lun nachoururuni ánheindügü gayara lubéi habulieidagun amigisirei éigini ligía tuma gagawaadi. Áluahatina giñe ariñahani lidan burí fulasu le uágubei gayara lan lafiñerúniwa lun lachoururagüdüni nun chouru lan ligaburi lahandilihóun éigini tidan bísinisi tuguya”.

Háfuga mama lan mosu háluahani inarüni luagu burí katei wéiriti lisudinin kei lira sagü weyu, íbini ítara, gayaraati hadügüni libeméme le tadügübei Jessica lun hadarirun óunabagülei lun amu burí álügüdahani:

• Háluahan ariñahani.

• Hakutihan lanwoun ariñahani.

• Hachoururuni lídangiñeti lan fulasu chóuruti ariñahani ligía.

Líderagubadün ligaburi laluahóun ariñahani lira lun hadariruni lóunabagüle álügüdahani létima súdinibei lidan ibagari. Ida?

ANIHEIN INARÜNI TIDAN ABAN LÍBURU TO ÚATU AMU KEI TUGUYA

Lun tasubudiruni Jessica inarüni le tarufudahabei Lererun Bungiu, adügatu aban katei libe le tadügübei lun tachoururuni ua tan gagawaadi lidan éigini le tagañeihabei. Ariñagatu: “Íderagua láadina naliihan luma nakutihan buidu buidu lun nafurendeiruni inarüni le tarufudahabei Bíbülia”. Adüga hamaali saragu míñunu gürigia lememe tadügübei Jessica ani akutiha hamaali ka lan óunabagülei tíchugubei Lererun Bungiu lun álügüdahani burí le:

• Ka lisuunibei wabagari?

• Ka asuseredubei houn hilaaña?

• Ka uagu anihein lubéi saragu asufuriruni?

• Ka ladaagubei Bungiu guentó lun lagidaruni asufuriruni?

• Ida luba gunda hamá iduheñu?

Gayaraabei giñe hadariruni óunabagülei inarüniti lun burí álügüdahani le anhoun haliiha Lererun Bungiu, áluaha huguyame ariñahani lidan páhina www.jw.org/cab.